(ភ្នំពេញ)៖ ព្រឹត្តិការណ៍ប្រកួតពានរង្វាន់កីឡាបាល់ទាត់ក្រសួងមហាផ្ទៃ លើកទី២ ឆ្នាំ២០២៥ បានប្រកាស នឹងធ្វើឡើងចាប់ថ្ងៃទី១៦ ខែមករា ដល់ថ្ងៃទី១១ ខែមីនា ឆ្នាំ២០២៥ ដោយមានក្រុមចូលរួមសរុបចំនួន ១៤ក្លឹប មកពីបណ្តាក្លឹបកីឡាបាល់ទាត់អគ្គស្នងការដ្ឋាន ក្លឹបអគ្គលេខាធិការដ្ឋាននិង ក្លឹបអគ្គនាយកដ្ឋាននានា ក្រោមចំណុះក្រសួងមហាផ្ទៃ។

ឯកឧត្តម ឧត្តមសេនីយ៍ឯក យិត ភីរៈ អគ្គលេខាធិការ នៃអគ្គលេខាធិការ​ដ្ឋាន​ក្រុមប្រឹក្សាកីឡាក្រសួងមហាផ្ទៃ និងជាអនុប្រធានប្រចាំការគណៈ​កម្មាការ​រៀបចំការប្រកួតបានគូសបញ្ជាក់ថា ព្រឹត្តិការណ៍ប្រកួតនេះ ទទួល​បានអនុសាសន៍ដ៏ខ្ពង់ខ្ពស់ និងការអនុញ្ញាតពីឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្នុងគោលបំណង ដើម្បីរួមចំណែកលើកកម្ពស់វិស័យកីឡាបាល់ទាត់ សំដៅបណ្តុះស្មារតី​ស្រឡាញ់កីឡា ដើម្បីសុខភាព មិត្តភាព សាមគ្គីភាព និងកិច្ចសហប្រតិ​បត្តិការល្អ រវាងមន្រ្តីរាជការស៊ីវិល មន្រ្តីនគរ បាលជាតិ និងមន្រ្តីពន្ធនាគារ ចំណុះក្រសួងមហាផ្ទៃ។

ឯកឧត្តម បានបន្ថែមថា នេះជាការរៀបចំលើកទី២ ដោយទទួលបានការចូលរួមពីបណ្តាក្លឹបកីឡាបាល់ទាត់អគ្គស្នងការដ្ឋាន ក្លឹបអគ្គលេខាធិការដ្ឋាន ក្លឹបអគ្គនាយកដ្ឋាននានាសរុបចំនួន ១៤ក្លឹប ដែលបានដាក់ពាក្យចូលរួមប្រកួត ។ ឯកឧត្តមថា ពិធីបើកការប្រកួត ពានរង្វាន់កីឡាបាល់ទាត់ ក្រសួងមហាផ្ទៃ លើកទី២ គ្រោងនឹងធ្វើឡើងនៅថ្ងៃទី១៦ ខែមករា និងពិធីបិទការប្រកួតនៅថ្ងៃទី១១ ខែមីនា ឆ្នាំ២០២៥ នៅពហុកីឡដ្ឋានជាតិអូឡាំពិក ខណៈការប្រកួតទូទៅបានកំណត់យកទីតាំងប្រកួតផ្លូវការនៅវិទ្យាល័យបឹងត្របែក។

ឯកឧត្តម សរ សិទ្ធិ រដ្ឋលេខាធិការ ក្រសួងមហាផ្ទៃ ជាប្រធានគណៈកម្មការ​រៀបចំ​ការប្រកួតបានអំពាវនាដល់ជនរួមជាតិ យុវជន យុវនារីទាំងអស់ចូល​រួម​លេងកីឡា ទោះបីជាប្រភេទកីឡាណាក៏ដោយ ដើម្បីបង្កើនសុខភាព​ផ្ទាល់​ខ្លួនផង ហើយបើលេងបានពូកែទៅ គឺអាចចេញទៅប្រកួត​តំណាង​ជាតិនៅលើឆាកអន្តរជាតិ ដែលនាំមកនូវកិត្តិយសជាតិ ហើយគេស្គាល់​ប្រទេសយើងតាមរយៈកីឡាផងដែរ ដោយនេះគឺជាផ្នែកដ៏មានសារៈ​សំខាន់ក្នុងការរួមចំណែករបស់យុវជន យុវនារីយើង។

ឯកឧត្តម សរ សិទ្ធិ ក៏បានបំផុសស្មារតីដល់ប្រជាពលរដ្ឋ យុវជន យុវនារីសូមចូលរួមលេងកីឡា ដើម្បីបង្កើនសុខភាព មិត្តភាព សាមគ្គីភាព ដែលកីឡាមានសារៈសំខាន់ណាស់ ហើយយើងនាំគិតពីកីឡា ដោយការលេងកីឡានេះបានជួយសម្រួលគ្រប់យ៉ាងទាំងអស់ ទាំងផ្លូវអារម្មណ៍ កាយសម្បទារ ក្រោយយើងបំពេញកិច្ចការជាច្រើន។

សម្រាប់ការប្រកួតបាល់ទាត់ ពានរង្វាន់ក្រសួងមហាផ្ទៃ រដូវកាលទី២ នាឆ្នាំ២០២៥ ខាងមុខ ឯកឧត្តមប្រធានគណៈកម្មការរៀបចំបានអំពាវ​នាវដល់អគ្គនាយកដ្ឋាន អង្គភាពនានាក្រោមចំណុះក្រសួងមហាផ្ទៃចូលរួម​ផ្សព្វផ្សាយឱ្យមន្ត្រីចូលរួមលេងកីឡា ឱ្យយល់ដឹងពីគុណតម្លៃនៃកីឡា ដោយឆ្លៀតពេលលេងកីឡាដើម្បីសុខភាព ព្រោះកីឡានឹងជួយឱ្យពួកគាត់​បាន​មកជួបជុំគ្នាលេងកីឡា ដើម្បីបានស្គាល់គ្នា ក្នុងន័យរិតចំណង​សាមគ្គីភាព​ជា​មួយគ្នាពីអង្គភាពមួយទៅអង្គភាពមួយកាន់តែល្អប្រសើរ​បន្ថែមទៀតផងដែរ។

សម្រាប់ការប្រកួតនេះ គណៈកម្មការរៀបចំការប្រកួត នឹងកំណត់យកនៅថ្ងៃទី០៣ ខែមករា ឆ្នាំ២០២៥ ដើម្បីរៀបចំការចាប់ឆ្នោតចែកពូលប្រកួត ដោយមានវត្តមាន ឯកឧត្តមប្រធានក្លឹប តំណាងកីឡាករ ព្រមទាំងវត្តមាន អញ្ជើញចូលរួមពីមន្រ្តីបច្ចេកទេសអាជ្ញាកណ្តាលពីសហព័ន្ធកីឡាបាល់ទាត់កម្ពុជា និងតំណាងក្រុមហ៊ុន ចូលរួមសហការឧបត្ថម្ភមួយចំនួន ព្រមទាំងអ្នកសារព័ត៌មានជាច្រើនអង្គភាពចូលរួមផងដែរ។ ការប្រកួតចែកចេញជា ៤ពូល គឺពូលA,B មាន ៤ក្រុម, ពូល C,D មាន ៣ក្រុម សរុប ២៦ប្រកួត ក្នុង១ប្រកួតមានរយៈពេល ៩០នាទី ដោយ​ប្រកួតជម្រុះក្នុងពូល ជ្រើសរើសយកក្រុមឈ្នះ ២ក្រុមឡើងទៅវគ្គបន្ត។

គួររម្លឹកថា កាលពីការប្រកួតលើកទី១ ឆ្នាំ២០២៤ កន្លងទៅ ក្លឹបអន្តោ​ប្រ​វេសន៍​​មានជ័យបានឈ្នះជើងឯកបន្ទាប់ពីបានយកឈ្នះក្រុម​អគ្គស្នងការ​នគរបាលជាតិ ដោយលទ្ធផលបច្ចេកទេស ៣-០៕

ថតដោយ ៖ ជីម ភារ៉ា
អត្ថបទ ៖ ជាវ ចន្ធូ