(ភ្នំពេញ)៖ ឯកឧត្តម គង់ ភោគ រដ្ឋលេខាធិការ នៃក្រសួងការបរទេស និងសហប្រតិបត្តិការអន្តរជាតិ ជាឧត្តមមន្រ្តីអាស៊ាន និងជាឥស្សរជន​ជាន់ខ្ពស់ (Eminent Person) នៃក្រុមការងារកម្រិតខ្ពស់សម្រាប់​ចក្ខុវិស័យសហគមន៍អាស៊ានក្រោយឆ្នាំ២០២៥ (High-Level Task Force on ASEAN Community’s Post-2025 Vision – HLTF-ACV) បានដឹកនាំគណៈប្រតិភូចូលរួម​កិច្ចប្រជុំលើកទី១៩ នៃ HLTF-ACV នៅទីក្រុងវៀងចន្ទន៍ ប្រទេសឡាវ ពីថ្ងៃទី១០ ដល់ថ្ងៃទី១១ ខែធ្នូ ឆ្នាំ ២០២៤ ។

កិច្ចប្រជុំបានបន្តពិភាក្សា និងសម្រេចបាននូវវឌ្ឍនភាពគួរឱ្យកត់សំគាល់​ក្នុងការចរចារបញ្ចប់ផែនការយុទ្ធសាស្រ្តសហគមន៍នយោបាយ-សន្តិសុខ​អាស៊ាន (APSC) សម្រាប់ចក្ខុវិស័យសហគមន៍អាស៊ានឆ្នាំ២០៤៥។

ដើម្បីធានាបាននូវភាពស៊ីចង្វាក់គ្នានៃផែនការយុទ្ធសាស្រ្តថ្មីក្នុងសហគមន៍អាស៊ាន ក្រុមការងារ HLTF-ACV បានជួបពិភាក្សាជាមួយប្រធានក្រុម​ការងារ​ជាន់ខ្ពស់សម្រាប់សមាហរណកម្មសេដ្ឋកិច្ចអាស៊ាន (HLTF-EI) សហប្រធាននៃក្រុមការងារចំពោះកិច្ចសម្រាប់រៀបចំផែនការយុទ្ធសាស្ត្រសហគមន៍សង្គម-វប្បធម៌អាស៊ាន ក្រោយឆ្នាំ២០២៥ (Ad Hoc Working Group on Development of ASCC Post-2025 Strategic Plan) និងប្រធានបច្ចុប្បន្ន និងប្រធានប្តូរវេននៃគណៈកម្មាធិការសម្រប​សម្រួល​ការតភ្ជាប់អាស៊ាន (ACCC) ដើម្បីផ្លាស់ប្តូរយោបល់ និងធ្វើបច្ចុប្បន្នភាព​លើ​វឌ្ឍនភាពក្នុងដំណើរការតាក់តែងរៀបចំផែនការយុទ្ធសាស្ត្ររបស់ខ្លួន។

លើសពីនេះ ក្រុមការងារ HLTF-ACV ក៏បានជួបជាមួយអង្គការយុវជន​អាស៊ាន ដើម្បីផ្លាស់ប្តូរ ទស្សនៈអំពីតួនាទីរបស់យុវជនក្នុងការចូលរួមចំ​ណែក​កសាងអនាគតរបស់អាស៊ាន ៕

ដោយ សួង ពិសិដ្ឋ