បន្ទាយមានជ័យ៖នៅសាលប្រជុំសាលាខេត្តបន្ទាយមានជ័យកាលពី​រសៀលថ្ងៃទី១៦ ខែធ្នូ ឆ្នាំ២០២៤មានរៀបចំ​ពិធី​ប្រកាស​​លោក សន ស៊ីផល ប្រធានសាខាពន្ធដារខេត្តបន្ទាយមានជ័យជំនួស លោក ព្រឹម សាលី ដែលត្រូវទៅ​ទទួលភារកិច្ច​ថ្មីនៅក្រសួងសេដ្ឋកិច្ច និងហិរញ្ញវត្ថុ ។ពិធីបានប្រព្រឹត្តទៅក្រោមអធិបតីភាពឯកឧត្តម អ៊ុំ រាត្រី អភិបាលខេត្ត​បន្ទាយមានជ័យ និងលោក កែន សម្បត្តិអគ្គនាយករងនៃអគ្គ​នាយក​ដ្ឋានពន្ធដារ។

លោក ព្រឹម សាលី ធ្វើរបាយការណ៍សង្ខេបរយៈពេល​ជាង១០កន្លងមក ដោយ​លោក​សម្រេចបានក្នុងការ​ប្រមូលពន្ធ​ជូនរដ្ឋកើនឡើងជារៀងរាល់​ឆ្នាំ ។

ក្នុងឱកាសនេះដែរ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានវាយតម្លៃ និងកោតសរសើរ ចំពោះការខិតខំប្រឹង​ប្រែងបំពេញ​ភារកិច្ចការងាររបស់លោកប្រធានសាខាពន្ធដារខេត្តបន្ទាយមានជ័យចាស់ និងសង្ឃឹមយ៉ាងមុតមាំថា លោក​ប្រធាន​សាខា​ពន្ធដារថ្មី នឹងបន្តកិច្ច​សហការល្អជាមួយមន្ទីរ អង្គភាពដែលពាក់ព័ន្ធ ដើម្បីប្រសិទ្ធ​ភាព និងប្រសិទ្ធផលការងារ។

ចំណែក លោក កែន សម្បត្តិអគ្គនាយករងនៃអគ្គនាយកដ្ឋាន​ពន្ធដារ​បានបញ្ជាក់ថា ការផ្ទេតំណែងឬការតែងតាំង គឺជា​កិច្ចការ​ធម្មតា ។ជា​យន្តការរបស់អគ្គនាយកដ្ឋានពន្ធដារ។លោកបានបន្តថា មកទល់​ពេលនេះប្រជាពលរដ្ឋយើង មាន​ការ​យល់ដឹងច្រើនពីច្បាប់ពន្ធដារ ធ្វើឱ្យការប្រមូលចំណូលពន្ធលើសផែនការជាប់ជាប្រចាំ។ទន្ទឹមនេះ​ចំណូលពន្ធមានការកើន​ឡើង ក៏បណ្ដាលមកពីកត្តាសុខសន្តិភាព ធ្វើអ្នកវិនិយោគក្នុង និងក្រៅប្រទេសបណ្ដាក់ទុនរកស៊ី បង្កើតការងារ និងបង្កើនចំណូលពន្ធផងដែរ៕

ដោយ៖ គៀន ច័ន្ទហ៊ីន