បាត់ដំបង៖លោក ខៃ សុដា អនុប្រធានមន្ទីរទទួលបន្ទុកក្តាប់រួមនៃ​មន្ទីរធនធានទឹក និងឧតុនិយមខេត្តបាត់ដំបង រួមជាមួយ​មន្ត្រីធន​ធានទឹក និងអាជ្ញាធរមូលដ្ឋានបានចុះពន្យល់ដល់ប្រជា​កសិករនៅ​ស្រុករុក្ខគិរី និងស្រុកមោងឫស្សី ពីរបៀប​គ្រប់គ្រង​ទឹកទុកសម្រាប់​ប្រើប្រាស់នារដូវប្រាំងខាងមុខ។

ក្នុងសកម្មភាពជាក់ស្តែងកាលពីថ្ងៃអាទិត្យទី១៥ ខែធ្នូ ឆ្នាំ២០២៤ នៅចំណុចអាងស្តុកទឹកបាសាក់ ភូមិច្រាំងខ្ពស់ ឃុំបាសាក់ ស្រុករុក្ខគិរី ខេត្តបាត់ដំបង និងឆ្លើយតបចំពោះសំណើរបស់ប្រជាកសិករស្រុករុក្ខគិរី និងស្រុកមោងប្ញស្សី ដែលសុំបើក​​ទឹក​ដើម្បីយកទៅស្រោចស្រពស្រូវ​ប្រាំង លោក ខៃ សុដា បានពន្យល់ថា ការធ្វើស្រូវប្រាំងរបស់ប្រជា​កសិករ មានទំហំធំ​ច្រើន​លើសពីអ្វីដែលអាចជួយសង្គ្រោះបាន ហើយបរិមាណទឹកក៏មានចំនួនតិចតួច ដែលមិនអាចធានាបាន ក្នុងការជួយសង្គ្រោះ​ស្រូវទាំងនោះបានឡើយ។

លោកអនុប្រធានមន្ទីរធនធានទឹក ពន្យល់ដល់ប្រជាកសិករម្តង​ហើយម្តងទៀតថា​មន្ទីរបានរៀបចំរក្សាទឹកទុកនៅ​ក្នុងអាង​នេះគឺសម្រាប់ប្រើប្រាស់ក្នុងជីវភាពរស់នៅប្រចាំថ្ងៃតែប៉ុណ្ណោះ ។

លោក​ ខៃ សុដា បានឱ្យដឹងថា បន្ទាប់ឆ្លងកាត់ការពិភាក្សាជាមួយ​កសិករដោយស្និទស្នាល និងយល់ពីគ្នាទៅវិញទៅមក​គឺ កសិករទាំង​អស់ឯកភាពគ្នាដោយមិនយកទឹកទៅស្រោចស្រពសង្គ្រោះដំណាំស្រូវទេ គឺសុំត្រឹមតែយកទឹកទៅបំពេញអណ្តូង ឬអាងទឹក និងស្រះតូចៗ ដែលស្ថិតនៅជិតផ្ទះ សម្រាប់ត្រៀមទុកប្រើប្រាស់ក្នុងជីវភាពរស់នៅ​ប្រចាំថ្ងៃ និងសត្វតែប៉ុណ្ណោះ

ជាមួយគ្នានោះ លោក ខៃ សុដា ក៏បានអំពាវនាវយ៉ាងទទូច ដល់​ប្រជាពលរដ្ឋទាំងអស់ត្រូវសន្សំសំចៃទឹកទុក ។លោកបានប​ន្ថែមថា ក្រោយមានការឯកភាពគ្នា មន្រ្តីជំនាញ និង អាជ្ញាធរស្រុក បានបើក​ផ្ដល់ទឹក​ជូនដល់​ប្រជា​ពលរដ្ឋ សម្រាប់បំពេញតម្រូវការ និងបាន​កំណត់រក្សាទុកកម្ពស់ទឹកត្រឹម៤ម៉ែត្រ ខណៈបច្ចុប្បន្ន​ទឹកនៅសល់ក្នុង​កម្ពស់៥,៨ម៉ែត្រ៕

អត្ថបទ-រូបភាព៖ អ៊ុក សំអាន បប.