ភ្នំពេញ៖ ចេតិយដើម្បីឧទ្ទិសជូនលោក ហ្សង់ អ៊ែលដឺរេម៉ុង ស្នងការចុង​ក្រោយនៃសាធារណរដ្ឋបារាំងប្រចាំនៅកម្ពុជា ពោល​គឺមុនសម័យកាល​ដែលប្រទេសកម្ពុជាទទួលឯករាជ្យត្រូវបានជួសជុលឡើងវិញដូចទម្រង់ដើមរួចរាល់។ចេតិយមានប្រវត្តិ​សាងសង់នៅឆ្នាំ១៩៥១ នេះស្ថិតនៅ​ក្នុងបរិវេណនៃក្រុមប្រឹក្សាអភិវឌ្ឍន៍កម្ពុជា ។

ក្រសួងវប្បធម៌ និងវិចិត្រសិល្បៈបានឱ្យដឹងនៅព្រឹកថ្ងៃទី១៧ ខែធ្នូ ឆ្នាំ២០២៤នេះថា អគ្គនាយកដ្ឋានបេតិកភណ្ឌ នៃក្រសួង​វប្បធម៌​និងវិចិត្រសិល្បៈ បានសហការជាមួយក្រុមប្រឹក្សាអភិវឌ្ឍន៍កម្ពុជា ជួសជុល និងអភិរក្សទម្រង់ដើមនៃចេតិយលោក ហ្សង់ អ៊ែលដឺរេម៉ុង។

ប្រភពដដែលរំលឹកពីប្រវត្តិចេតិយនេះថា ចេតិយនេះសាងសង់ឡើង​នៅឆ្នាំ ១៩៥១ក្នុងបរិវេណនៃក្រុមប្រឹក្សាអភិវឌ្ឍន៍កម្ពុជា ដើម្បីឧទ្ទិស​ជូនលោក ហ្សង់ អ៊ែលដឺរេម៉ុង ស្នងការចុងក្រោយនៃសាធារណ​រដ្ឋ​បារាំងប្រចាំនៅកម្ពុជា ពោលគឺមុនសម័យ​កាលដែលប្រទេសកម្ពុជា​ទទួល​ឯករាជ្យ។

ការងារអភិរក្សនិងជួសជុលនេះ បានចាប់ផ្តើមកាលពីខែកក្កដា ឆ្នាំ២០២៤ ហើយបានបញ្ចប់ក្នុងខែវិច្ឆិកា ឆ្នាំ២០២៤។ ការងារនេះ ជាទម្រង់មួយ នៃកិច្ចការអភិរក្សចេតិយនាសតវត្សរ៍ទី២០ ដែល​បានកសាងឡើងក្នុងសម័យអាណា​ព្យាបាល​បារាំង។
ក្រសួងវប្បធម៌បញ្ជាក់ថា កិច្ចសហការលើការងារអភិរក្សនេះ គឺជាគម្រូមួយនៃកិច្ចសហការអន្តរក្រសួង និងស្ថាប័ន លើវិស័យ​សេដ្ឋកិច្ចនិងវប្បធម៌ ដែលកើតឡើងក្នុងបរិយាកាសនៃ​កិច្ចប្រឹង​ប្រែងធ្វើឲ្យបេតិកភណ្ឌអាចរក្សាបានយូរអង្វែង៕
ដោយ៖មុនី
រូបថតៈក្រសួងវប្បធម៌ និងវិចិត្រសិល្បៈ