ភ្នំពេញ៖ពិព័រណ៍សៀវភៅកម្ពុជា លើកទី១១ ឆ្នាំ២០២៤ នឹង​ប្រព្រឹត្ត​ទៅរយៈពេល៤ថ្ងៃ ចាប់ពីថ្ងៃទី១៩-២២ ខែធ្នូ ឆ្នាំ២០២៤​ក្រោម​ប្រធានបទ៖ «អ្នកអាន ជាអ្នករៀនពេញមួយជីវិត»នៅបរិវេណមុខ​សួនច្បារសាលាបុរីកោះពេជ្រ រាជធានីភ្នំពេញ។នេះបើយោងតាមការ​បញ្ជាក់របស់គណៈកម្មការរៀបចំពិព័រណ៍សៀវភៅកម្ពុជា។

ព្រឹត្តិការណ៍នេះដើម្បីជំរុញការអានសៀវភៅ អភិវឌ្ឍន៍ចំណេះដឹង និងបង្កើនគំនិតសម្រាប់​ការសិក្សា។គណៈកម្មការ​ពិព័រណ៍សៀវភៅ​កម្ពុជា បានបញ្ជាក់ក្នុងសន្និសីទសារព័ត៌មានកាលពីសប្ដាហ៍​កន្លង​ទៅថា ពិព័រណ៍​សៀវភៅ​កម្ពុជា លើក​ទី១១ មានគោលដៅដូចតទៅ៖១- ជួយផ្សព្វផ្សាយការបោះពុម្ពសៀវភៅគ្រប់ប្រភេទ (ទាំងស្នាដៃអ្នកនិពន្ធ​ចាស់ថ្មី) ដើម្បីឱ្យមានទីផ្សារទាំងក្នុងនិងក្រៅប្រទេស។២- ជំរុញឱ្យ​ប្រជា​ជន​ខ្មែរមានទម្លាប់ក្នុងការអានសៀវភៅហើយ​ជាសារមួយ​បញ្ជូនទៅដល់យុវជនឱ្យស្គាល់ពីគុណតម្លៃនៃការអានដើម្បីអភិវឌ្ឍន៍ចំណេះដឹងនិងបង្កើនគំនិតសម្រាប់ ការសិក្សានិង​ការងារ។៣- បង្កើន​កម្មវិធីនិទានរឿងនិងគូរគំនូររូបភាពផ្សេងៗដល់កុមារដើម្បីបណ្តុះទឹកចិត្តកុមារ​ឱ្យស្រលាញ់និងចូលចិត្ត​សៀវភៅតាំងពីនៅតូចៗ។៤- គាំទ្រ​ឧស្សាហកម្មបោះពុម្ពផ្សាយនៅកម្ពុជានិងនៅក្នុងពិភពលោក៥- លើកទឹកចិត្តក​វីនិពន្ធ អ្នកនិពន្ធ អ្នកស្រាវជ្រាវ វិចិត្រករខ្មែរ ដើម្បីបង្កើត​ស្នាដៃថ្មីៗបន្ថែមទៀត។

គណៈកម្មការរៀបចំព្រឹត្តិការណ៍មានសុទិដ្ឋិថា កម្មវិធីពិព័រណ៍​សៀវភៅនេះ បាន ក្លាយជាព្រឹត្តិការណ៍វប្បធម៌មួយដ៏សំខាន់​ក្នុងការផ្សព្វផ្សាយនិងជំរុញលើកទឹកចិត្តឱ្យប្រជាជនខ្មែរ មានទម្លាប់​ក្នុងការអានសៀវភៅ និងស្គាល់ពីគុណតម្លៃនៃការ​អាន​ដើម្បីអភិវឌ្ឍន៍​ចំណេះដឹងនិងការងារ។

ក្នុងពិព័រណ៍សៀវភៅកម្ពុជា ឆ្នាំ២០២៤ «១៩-២២ ធ្នូ ២០២៤» នេះដែរនឹងមានសកម្មភាពនានាមានដូចជា ការដាក់​តាំងសៀវភៅ​ដែលចូលរួមពី អ្នកនិពន្ធ គ្រឹះស្ថាន​បោះ​​ពុម្ពផ្សាយ និងបណ្ណាគារ​នានាក្នុងព្រះរាជាណាចក្រកម្ពុជា (សៀវភៅ​មួយចំនួននឹង​ដាក់លក់ក្នុងតម្លៃពិសេស) វេទិកាស្តីពីការ​បោះពុម្ពផ្សាយតាម​ប្រព័ន្ធអេឡិកត្រូនិក, ការធ្វើបទបង្ហាញ​នានាទាក់ទងទៅនឹងអក្សរ​សាស្ត្រ អក្សរសិល្ប៍ខ្មែរ និងវិទ្យាសាស្ត្រ ការនិពន្ធសៀវភៅទៅជា​ខ្សែភាពយន្ត និងការអភិវឌ្ឍ​ជំនាញការអាន ការជួបពិភាក្សា និងការទទួលយក​បទពិសោធពីអ្នកនិពន្ធល្បីៗ និងមានការចុះ​ហត្ថលេខា ពីអ្នកនិពន្ធព្រម​ទាំងវិចិត្រករ, កម្មវិធីនិទានរឿង និងល្បែងសិក្សា​សម្រាប់កុមារ, ការប្រគំតន្ត្រី និងសំណួរចម្លើយ​ចាប់យករង្វាន់ផ្សេងៗ៕ដោយ៖មុនី
រូបថត ៖ គណៈកម្មការរៀបចំពិព័រណ៍សៀវភៅកម្ពុជា