កំពត៖បន្ទាប់ពីទទួលសំណើរ និងសំណូមពររបស់ប្រជាពលរដ្ឋចំនួន ២៥គ្រួសារ រស់នៅភូមិត្រពាំងគគីរ និងភូមិត្រពាំងថ្ម ឃុំល្បើក ស្រុកឈូក ខេត្តកំពត ដែលរងផលប៉ះពាល់ពីគម្រោងពង្រីកផ្លូវ នៅព្រឹកថ្ងៃទី១៧ ខែធ្នូ ឆ្នាំ២០២៤ ឯកឧត្តម ម៉ៅ ធនិន អភិបាល​ខេត្តកំពត បានដឹកនាំអាជ្ញាធរមូលដ្ឋាន មន្ត្រីនៃមន្ទីរជំនាញពាក់ព័ន្ធ ចុះពិនិត្យទីតាំង ដែលប្រជាពលរដ្ឋ លើកឡើងថាមានផលប៉ះ​ពាល់​ដើម្បីស្វែងរកដំណោះស្រាយ  និងធ្វើយ៉ាងណា កុំឱ្យមានការរាំង​ស្ទះដល់ការ​ស្ថាបនា​ពង្រីកផ្លូវនេះ។

ក្រោយចុះពិនិត្យជាក់ស្តែងបានពិនិត្យឃើញថា ការពង្រីកផ្លូវក្នុងភូមិ​ទាំងពីរនោះ មិនមានផលប៉ះពាល់ធ្ងន់ធ្ងរ ដល់លំនៅ​ឋានរបស់​ប្រជាពលរដ្ឋនោះទេ  គ្រាន់តែប៉ះពាល់ដល់របងផ្ទះ អណ្តូងទឹក និងផលដំណាំមួយចំនួនប៉ុណ្ណោះ ។

នៅក្នុងឱកាសនេះឯកឧត្តម ម៉ៅ ធនិន អភិបាលខេត្តកំពត បានស្នើពលរដ្ឋទាំងអស់ឱ្យមានការចូលរួមបរិច្ចាគ​មួយចំនួន ដែលរងផលប៉ះពាល់ពីការពង្រីកផ្លូវនេះ ។ឯកឧត្តមបាន​លើក​ទឹកចិត្តថា ការចូលរួមរបស់ប្រជាពលរដ្ឋ គឺជាការរួមចំណែក​ក្នុងការអភិវឌ្ឍមូលដ្ឋានខ្លួន ក៏ដូចជាសង្គមជាតិទាំងមូល ព្រោះកាលណាមូលដ្ឋានភូមិឃុំ មានផ្លូវថ្នល់ល្អ ធំទូលាយ ឃុំនឹងមានការអភិវឌ្ឍឆាប់រហ័ស។

សម្រាប់ក្រុមហ៊ុនស្ថាបនាផ្លូវថ្នល់វិញ ឯកឧត្តមអភិបាល​ខេត្តបាន​ណែនាំ ឱ្យ​ពិនិត្យលទ្ធភាពក្នុងការដោះស្រាយសំណង​ផ្សេងៗ ជូនដល់ប្រជាពលរដ្ឋដែលរងផលប៉ះពាល់ផង ។ពេលស្ថាបនាត្រូវ​ធ្វើតាមលក្ខណៈបច្ចេកទេសដែលធានាបានទាំងគុណភាព និងសុខភាព​ប្រជាជនដែលរស់នៅជាប់នឹងការដ្ឋាន៕

ដោយ៖ សិលា សារិន