វេទិការៀនសូត្រ និងឆ្លុះបញ្ចាំងថ្នាក់ខេត្ត ស្តីពីការអប់រំរបស់កុមារតូចនៅបឋមសិក្សាខេត្តបន្ទាយមានជ័យ
បន្ទាយមានជ័យ ៖លោក យឹម សំណាង អភិបាលរងខេត្តបន្ទាយមានជ័យ តំណាងឯកឧត្ដម អ៊ុ រាត្រី អភិបាលខេត្ត កាលពីថ្ងៃទី១៧ ខែធ្នូ ឆ្នាំ២០២៤ បានអញ្ជើញជាអធិបតីភាព ក្នុងវេទិការៀនសូត្រ និងឆ្លុះបញ្ចាំងថ្នាក់ខេត្តស្តីពីការអប់រំកុមារនៅបឋមសិក្សាខេត្តបន្ទាយមានជ័យ” ។ពិធីនេះរៀបចំដោយអង្គការទស្សនៈពិភពលោក (World Vision), អង្គការមជ្ឈមណ្ឌលអប់រំបណ្តុះបណ្តាលអាស៊ីអាគ្នេយ៍-កម្ពុជា (SEAPC-C), អង្គការរូមធូរីដ (RtR), អង្គការហ្គូដណេប៊ឺស(Good Neighbors) និងអង្គការដៃគូពាក់ព័ន្ធ។
ក្នុងវេទិកាពេញមួយថ្ងៃនៅមន្ទីរអប់រំ យុវជន និងកីឡាខេត្តបន្ទាយមានជ័យ លោកស្រី ងួន សោភ័ណ្ឌ ប្រធានប្រចាំតំបន់ខេត្តបន្ទាយមានជ័យ បាត់ដំបង នៃអង្គការទស្សនៈពិភពលោកបានបញ្ជាក់ថា វេទិកានេះមានគោលបំណងបីសំខាន់ៗគឺ ១-ឆ្លុះបញ្ចាំងពីវឌ្ឍនភាពនៃផែនការសកម្មភាពពីវេទិការៀនសូត្រលើកទី១, ២-ចែករំលែកបទពិសោធន៍នៃការអនុវត្តល្អៗ និងការរៀនសូត្រផ្សេងៗ ពាក់ព័ន្ធនឹងលទ្ធផលការរៀន សូត្ររបស់កុមារ ជាពិសេសកុមារបាត់បង់ឱកាសនៅក្នុងកម្រិតបឋមសិក្សានិង៣-ស្វែងរកការគាំទ្រពីសំណាក់អាជ្ញាធរ និងអ្នកពាក់ព័ន្ធ ក្នុងការឆ្លើយតបនឹងបញ្ហាប្រឈមចំពោះគុណភាពនៃការសិក្សារបស់កុមារងាយគ្រោះ និងកុមារបាត់បង់ឱកាសិក្សា។
ចំណែកលោក យឹម សំណាង បានបញ្ជាក់ថា ធនធានមនុស្សជាទុនយ៉ាងសំខាន់មិនអាចខ្វះបានក្នុងការអភិវឌ្ឍប្រទេស។ក្នុងនាមរដ្ឋបាលខេត្តលោក ក៏បានថ្លែងនូវកោតសសើរដោយស្មោះចំពោះមន្ទីរអប់រំយុវជន និងកីឡាខេត្ត មន្ទីរជំនាញពាក់ព័ន្ធ និងអង្គការដៃគូអប់រំទាំងអស់ដែលបានខិតខំប្រឹងប្រែងដើម្បីលើកស្ទួយគុណភាពអប់រំនៅខេត្ត និងទទួលបានលទ្ធផលគួរជាទីមោទនៈពីមួយឆ្នាំទៅមួយឆ្នាំ។
សូមជម្រាបជូនថា វេទិកានេះបានផ្តល់ឱកាសដល់អ្នកពាក់ព័ន្ធនានាចែករំលែកនិងពិភាក្សាលើបញ្ហាប្រឈមដែលធ្វើឱ្យរាំងស្ទះដល់ការសិក្សារបស់កុមារ ឬក៏អាចធ្វើឱ្យកុមារបាត់បង់ឳកាសរៀនសូត្រផងដែរ។វេទិកានេះ ក៏ជាការចូលរួមចំណែកមួយផ្នែកដើម្បីជួយលើកស្ទួយគុណភាពនៃការអប់រំនៅក្នុងខេត្តបន្ទាយមានជ័យ ដើម្បីឆ្ពោះទៅសម្រេចបាន “គោលដៅអភិវឌ្ឍន៍ប្រកបដោយចីរភាពទី៤ ឆ្នាំ២០៣០” របស់ក្រសួងអប់រំ យុវជន និងកីឡា៕
ដោយ៖ឃិន គន្ធា
