បរទេស ៖ អង្គការសហប្រជាជាតិបាននិយាយថា ជនជាតិស៊ីរីមួយលាននាក់ដែលបានភៀសខ្លួន អាចនឹងវិលត្រឡប់ចូលប្រទេសវិញ នៅឆមាសទីមួយ នៃឆ្នាំ២០២៥ ក្រោយការដួលរលំរបស់លោក Assad។

អង្គការសហប្រជាជាតិនិយាយថា ខ្លួនរំពឹងថា មនុស្សប្រហែលមួយលាននាក់ នឹងត្រឡប់ ទៅប្រទេសស៊ីរីវិញ នៅឆមាសទីមួយ នៃឆ្នាំ២០២៥ បន្ទាប់ពីការដួលរលំ នៃការគ្រប់គ្រង របស់ប្រធានាធិបតី Bashar al-Assad នេះបើយោងតាមលោកស្រី Rema Jamous Imseis នាយកប្រចាំតំបន់មជ្ឈិមបូព៌ា និងអាហ្វ្រិកខាងជើងនៃទីភ្នាក់ងារជនភៀសខ្លួន អង្គការសហប្រជាជាតិ ហៅកាត់ UNHCR បានប្រាប់អ្នកយកព័ត៌មាន នៅទីក្រុងហ្សឺណែវ កាលពីថ្ងៃអង្គារ។

លោកស្រី Rema Jamous Imseis បានអះអាងថា «យើងបានព្យាករណ៍ថា ជនជាតិស៊ីរីមួយលាននាក់ ត្រឡប់មកវិញ នៅចន្លោះខែមករា និងខែមិថុនា ឆ្នាំក្រោយ»។

លោកស្រីបាននិយាយថា ការវិវត្តន៍ នាពេលថ្មីៗនេះ បាននាំមកនូវ «ចំនួនដ៏ច្រើននៃក្តីសង្ឃឹម … សម្រាប់វិបត្តិផ្លាស់ទីលំនៅដ៏ធំបំផុត ដែលយើងមាននៅលើភពផែនដី ត្រូវបានដោះស្រាយ ជាចុងក្រោយ» ។

ប៉ុន្តែ លោកស្រីបានសង្កត់ធ្ងន់ថា «យើងក៏ត្រូវទទួលស្គាល់ដែរថា ការផ្លាស់ប្តូររបបនេះ មិនមានន័យថា មានការបញ្ចប់វិបត្តិមនុស្សធម៌ នៅទីនោះទេ»។

ជាមួយគ្នានេះ លោកស្រីបានអំពាវនាវឱ្យបណ្តាប្រទេស ដែលបាននិងកំពុងទទួលជនភៀសខ្លួនស៊ីរី រាប់លាននាក់ ជៀសវាងការបញ្ជូនពួកគេ ត្រឡប់ទៅវិញ ដោយប្រញាប់ប្រញាល់។

លោកស្រី Imseis បានបានសង្កត់ធ្ងន់ថា «គ្មាននរណាម្នាក់គួរតែត្រូវបានគេឲ្យត្រឡប់ ទៅប្រទេសស៊ីរីវិញ ដោយបង្ខំ ហើយអះអាងសិទ្ធិរបស់ជនជាតិស៊ីរី ក្នុងការរក្សាសិទ្ធិជ្រកកោន ត្រូវតែទទួលបានការការពារ»៕

ប្រភពពី AFP ប្រែសម្រួល៖ សារ៉ាត