(កំពត)៖ លោក មាស ម៉ាប់ អគ្គលេខាធិការរងសហព័ន្ធកីឡាម៉ូតូទឹកកម្ពុជា បានបញ្ជាក់ថា ការប្រកួតកីឡាម៉ូតូទឹកជើងឯកថ្នាក់ជាតិ ឆ្នាំ២០២៤ បានស្វែងរកឃើញម្ចាស់មេដាយមាស លើគ្រប់វិញ្ញាសា ជាមួយនឹងការគាំទ្រយ៉ាងច្រើនពីមហាជន ក្នុងព្រឹត្តការណ៍បុណ្យសមុទ្រលើកទី១១ ជុំទី៣ ឆ្នាំ២០២៤ នាឆ្នេរកោះស្មៅ ក្រុងកំពត ខេត្តកំពត។

ក្នុងនាមឯកឧត្តម ណុះ ស្លេះ ប្រធានសហព័ន្ធ លោក មាស ម៉ាប់ បន្ថែមទៀតថា រយៈពេល៣ថ្ងៃនៃព្រឹត្តការណ៍បុណ្យសមុទ្រ កីឡាករម៉ូតូទឹករបស់សហព័ន្ធបានធ្វើការជិះបង្ហាញជូនគណៈប្រតិភូថ្នាក់ដឹកនាំ ភ្ញៀវទេសចរជាតិ និងអន្តរជាតិ ទស្សនាកម្សាន្ត និងផ្សព្វផ្សាយជូនមហាជនអោយស្គាល់ច្បាស់ពីកីឡាម៉ូតូទឹករយៈពេល២ថ្ងៃ ជាពិសេសផ្តលឱកាសអោយប្រជាពលរដ្ឋជិះលេងកម្សាន្តសប្បាយស្រប់តាមអនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន «ប្រជាជនម្នាក់គម្បីលេងកីឡាមួយប្រភេទប្រចាំជីវិត» ។

អគ្គលេខាធិការរងរូបនេះ បន្តថា សម្រាប់ថ្ងៃទី៣ សហព័ន្ធបានរៀបចំការប្រកួតជើងឯកថ្នាក់ជាតិ ដោយមានកីឡាករ២០នាក់ មកពី៦ក្លឹប មានក្លឹបកីឡាម៉ូតូទឹកខេមរា , ក្លឹបកីឡាម៉ូតូទឹកមេគ្គង ,ក្លឹបកីឡាម៉ូតូទឹកចតុមុខ, ក្លឹបកីឡាម៉ូតូទឹក Flamingo Jet ski កម្ពុជា , ក្លឹបកីឡាម៉ូតូទឹក JET SKI BOAT និងក្លឹបកីឡាម៉ូតូទឹក HAPPY JET SKI ចូលរួមប្រកួតប្រជែងយ៉ាងស្វិតស្វាញប្រកបដោយភាពទាក់ទាញ និងសមត្ថភាព បច្ចេកទេសល្អប្រសើរ។

លោក មាស ម៉ាប់ អោយដឹងទៀតថា ជើងឯកឆ្នាំនេះ លោកមានការសោកស្តាយដោយាសារកីឡាករម៉ូតទឹកជម្រើសជាតិ ដូចជា វីរៈកីឡាករ សាលី អ៊ូម៉ើត , សាលី ហ្វីលីន ,មីន ម៉ូស្តាន់ ,កៃ វ៉ាន់ស៊ីដែន ,មីន អូស្មាន់ និងកីឡាករ ទៀត សាលេះ ជាប់ភារកិច្ចប្រកួតម៉ូតូទឹក World Series និង World Cup នៅប្រទេសថៃ ទើបកីឡាករសហព័ន្ធបានផ្តល់ឪកាសដល់បណ្តាក្លឹបនានា បញ្ជូនកីឡាករវ័យក្មេងមកធ្វើការប្រកួតប្រជែង ដើម្បីស្វែងរក កីឡាករវ័យក្មេងមកធ្វើការហ្វឹកហាត់ក្នុងក្រុមជម្រើសជាតិជាមួយរៀបច្បង ត្រៀមប្រកួតកម្រិតជាតិនិងអន្តរជាតិ ជាពិសេសព្រឹត្តការណ៍កីឡាស៊ីហ្គេម លើកទី៣៣ ឆ្នាំ២០២៥ នៅប្រទេសថៃខាងមុខនេះ។

លោក សៅ ចន្ថា អគ្គហិរញ្ញិកសហព័ន្ធកីឡាម៉ូតូទឹកម្ពុជា បានអោយដឹងថា លទ្ធផល នៃការប្រកួតកីឡាម៉ូតូទឹកជើងឯកថ្នាក់ជាតិ ឆ្នាំ២០២៤ លើ៣វិញ្ញាសា គឺវិញ្ញាសា Runabout 1100 Stock មាសមេដាយបានលើកីឡាករ ហ៊ង ហេងគៀង មេដាយប្រាក់ កីឡាករ ព្រាបសរ និងមេដាយសំរិទ្ធ កីឡាករ ព្រាប ម៉ូ ។ វិញ្ញាសា Enduran Runabout Open មាសមេដាយបានលើកីឡាករ ឃុន សេងប៉ុនហាក់ មេដាយប្រាក់ កីឡាករ គ្រុយ តារា និងមេដាយសំរិទ្ធ កីឡាករ យិន កក់ខង និងវិញ្ញាសា Ski 1100 Stock មាសមេដាយបានលើកីឡាករ ឃុន សេងប៉ុនហាក់ មេដាយប្រាក់ កីឡាករ ម៉ម សុវណ្ណា និងមេដាយសំរិទ្ធ កីឡាករ យិន កក់ខង ៕

អត្ថបទ-រូបភាព ៖ លោក ចាន់ វិចិត្រ និង ងីម ឆាយហួត