រីយ៉ាដ ៖ Cristiano Ronaldo ដែលជាអត្តពលិកបាល់ទាត់ពិភពលោក មានទ្រព្យសម្បត្តិច្រើនជាងគេបំផុតមួយរូប បានបង្ហាញយន្តហោះឯកជនថ្មីមួយគ្រឿងរបស់លោក ដែលត្រូវបានគេរាយការណ៍រថា វាមានតម្លៃដល់ទៅ ៧៣លានដុល្លារឯណោះ។ នេះបើតាមការចេញផ្សាយដោយសារព័ត៌មាន al-arabiya។

ប្រភពបានទម្លាយឱ្យដឹងថា ជាមួយនឹងការរចនាដ៏អស្ចារ្យរបស់វា យន្តហោះ Gulfstream G650 របស់ Ronaldo គឺជាប្រភេទយន្តហោះឯកជនមានល្បឿនលឿនបំផុតមួយ ដែលអាចហោះហើរក្នុងចម្ងាយដល់ទៅជាង ១២,០០០គីឡូម៉ែត្រឯណោះ ហើយក៏ជាយន្តហោះមួយស្ថិតក្នុងចំណោមយន្តហោះលឿនបំផុតនៅលើពិភពលោក។

យន្តហោះដ៏ទំនើបនេះ មានកាប៊ីនមួយសម្រាប់មនុស្ស៣នាក់ស្នាក់នៅផ្សេងគ្នា ហើយអាចផ្ទុកអ្នកដំណើរបានដល់ទៅ ១៩នាក់។ យន្តហោះឯកជនថ្មីរបស់កំពូលកីឡាករសញ្ជាតិព័រទុយហ្គាល់រូបនេះ មានលក្ខណៈខុសប្លែកពីគេ ដោយតួខ្លួនវាធ្វើពីលោហធាតុភ្លឺចែងចាំង រំលេចដោយអក្សរ CR7 រួមជាមួយនឹងរូបភាពពណ៌ខ្មៅ ដែលបង្ហាញពីស្តាយអបអរសាទរដ៏ល្បីនៅលើពិភពលោករបស់គាត់។

យោងតាមរបាយការណ៍ដែលចុះផ្សាយដោយសារព័ត៌មាន The Sun បានឱ្យដឹងថា Ronaldo ពីមុនជាម្ចាស់យន្តហោះ Gulfstream G200 តែលោកបានលក់វា ដើម្បីវ៉ៃឡើងស៊េរី Gulfstream G650 វិញ។

គួរបញ្ជាក់ថា Ronaldo ដែលឥឡូវនេះលេងឱ្យក្លឹបបាល់ទាត់អារ៉ាប៊ីសាអូឌីត Al Nassr បានឈរនៅលើកំពូលតារាងរបស់ទស្សនាវដ្តី Forbes ក្នុងនាមជាអត្តពលិករកប្រាក់ចំណូលបានច្រើនបំផុតសម្រាប់ឆ្នាំ ២០២៤ ដល់ទៅ ២៦០លានដុល្លារ រួមទាំង ២០០លានដុល្លារពីប្រាក់ខែរបស់គាត់នៅក្លឹប Al Nassr និង ៦០ លានដុល្លារពីម៉ាកយីហោរបស់គាត់ CR7 ដែលមានទាំងសំលៀកបំពាក់, គ្រឿងប្រើប្រាស់, សណ្ឋាគារ និងកន្លែងហាត់ប្រាណជាដើម។

មិនត្រឹមតែប៉ុណ្ណោះ Ronaldo ក៏ជាមនុស្សមានឥទ្ធិពលនៅលើបណ្តាញសង្គមមួយរូបផងដែរ ដោយមានអ្នកតាមដានច្រើនជាងគេនៅលើ Instagram ជាមួយនឹងអ្នកចុច Follow គាត់ ដល់ទៅ ៦៤៥លាននាក់។ បន្ថែមលើនេះ Ronaldo ក៏ ទទួលបានសញ្ញាប៊ូតុងមាស (Gold Play Button) ផងដែរ បន្ទាប់ពីការបង្កើត YouTube Channel ដែលមានឈ្មោះថា (UR Cristiano) និងទទួលបាន Subscribers ដំបូងដល់ទៅ ១លាននាក់ក្នុងរយៈពេលត្រឹមតែ ៩០នាទី៕

ប្រភព៖ al-Arabiya ប្រែសម្រួល ៖ ឈឹម ទីណា