(ភ្នំពេញ)៖ ការប្រកួតជ្រើសរើសជើងឯកកីឡាការ៉ាតេថ្នាក់ជាតិ ឆ្នាំ២០២៤ មានសាលាគុន សមាគម ក្លឹប ចំនួន ២៨ បានចូលរួមដោយប្រព្រឹត្តទៅនៅមជ្ឍមណ្ឌលជាតិហ្វឹកហ្វឺនកីឡាការ៉ាតេ សាកលវិទ្យាល័យភូមិន្ទភ្នំពេញ ពីថ្ងៃទី១៨ដល់ថ្ងៃទី២២ ខែធ្នូ ឆ្នាំ២០២៤។

សម្រាប់វិញ្ញាសាប្រកួត មាន២ គឺ កាតា និងប្រយុទ្ធ ដែលចែកចេញជា ៤០វិញ្ញាសា ដូចជា ៖

ក. វិញ្ញាសាកាតាឯកត្តជន ៖ កុមារា កុមារី អាយុក្រោម១២-១៣ឆ្នាំ កុមារា កុមារី អាយុ១៤-១៥ឆ្នាំ បុរស នារី អាយុ១៦-១៧ឆ្នាំ បុរស នារី អាយុ១៨-២៣ឆ្នាំ ។

ខ. វិញ្ញាសាកាតាក្រុម កុមារា កុមារី អាយុ ១២-១៣ឆ្នាំ កុមារា កុមារី អាយុ ១៤-១៥ឆ្នាំ បុរស នារី អាយុ ១៦-៣២ឆ្នាំ។

គ. វិញ្ញាសាប្រយុទ្ធក្រុម កុមារា កុមារី អាយុ១២ឆ្នាំ-១៣ឆ្នាំ កុមារា កុមារី អាយុ១៤-១៥ឆ្នាំ បុរស នារី អាយុ១៦-១៧ឆ្នាំ បុរស នារី អាយុ១៨-២៣ឆ្នាំ។

សម្រាប់សមាសភាពអ្នកចូលរួម មានកីឡាករ ១៣៣នាក់ កីឡាការិនី ១០២នាក់ គ្រូបង្វឹក ៥៥នាក់ ប្រតិភូដឹកនាំមន្ត្រីផ្លូវការចំនួន ៤៦នាក់ អាជ្ញាកណ្ដាល ចៅក្រម ចំនួន ១៦នាក់ សរុប ៣៥២នាក់។
លោក សាយ ណូរ៉ា អនុប្រធានសហព័ន្ធកីឡាការ៉ាតេកម្ពុជាថា វិស័យ កីឡាការ៉ាតេ របស់សហព័ន្ធកីឡាការ៉ាតេកម្ពុជា មានការអភិវឌ្ឍន៍ និងរីកចម្រើន ពីមួយថ្ងៃទៅមួយថ្ងៃ ទាំងផ្នែក បរិមាណ និងគុណភាព ទាំងក្នុងការប្រកួតថ្នាក់ជាតិ និងអន្តរជាតិ ដែលទទួលបានលទ្ធផលជាផ្លែផ្កាល្អប្រសើរ គួរជាទីមោទកភាព ។

លោក បញ្ជាក់ទៀតថា ការប្រកួតកីឡាការ៉ាតេជើងឯកថ្នាក់ជាតិនេះ ជាការបញ្ជាក់នូវសមត្ថភាព ចំណេះដឹង បទពិសោធន៍ បច្ចេកទេស និងទេពកោសល្យរបស់កីឡាករ-កីឡាការិនី ដែលបានធ្វើការហ្វឹកហាត់អស់រយៈពេលជាច្រើនឆ្នាំ កន្លងមក មកបញ្ចេញនូវសមត្ថភាពរបស់ខ្លួនក្នុងការប្រកួតនាពេលនេះ។នាឱកាសនោះ លោកក៏បានផ្តាំផ្ញើនូវចំណុចមួយចំនួន ដល់គណៈកម្មការរៀបចំការប្រកួត គណៈកម្មការបច្ចេកទស គ្រូបង្វឹក ត្រូវលើកកំពស់ស្មារតីទទួលខុសត្រូវចំពោះភារកិច្ចនេះឲ្យបានល្អប្រសើរ ក្មួយៗកីឡាករ កីឡាការិនី ទាំងអស់ត្រូវខិតខំយកចិតទុកដាក់គោរពនូវបទបញ្ជាប្រកួតនានា ដែលសហព័ន្ធ កីឡាការ៉ាតេកម្ពុជា ក៏ដូចជាគណៈកម្មការរៀបចំការប្រកួតបានចែងឡើង និងរក្សានូវឆន្ទៈ គោរពដៃគូរបស់ ខ្លួនក្នុងពេលប្រកួត ដោយមិនសំដែងនូវអាកប្បកិរិយាណាដែលមិនសមរម្យ។ ត្រូវបង្កើននូវសមត្ថភាពរបស់ ខ្លួនឲ្យអស់ពីសមត្ថភាព ដើម្បីអភិវឌ្ឍន៍ខ្លួនឯង សម្រាប់សហព័ន្ធកីឡាការ៉ាតេកម្ពុជា។ ក៏ដូចជាវិស័យកីឡាការ៉ាតេឲ្យកាន់តែបានល្អប្រសើរថែមទៀត ៕

ថតដោយ ៖ ងីម ឆៃហួត
អត្ថបទ ៖ ជាវ ចន្ធូ