បរទេស ៖ លោក Jacob Tetteh-Ashong កំពុងបន្តកេរដំណែលពីគ្រួសារក្នុងអាជីពអ្នកធ្វើក្ដារមឈូសជនជាតិហ្គាណាដ៏ល្បីល្បាញ ដោយយកក្តារមឈូសមកកែច្នៃ និងរចនាម៉ូតជារូបភាពផ្សេងៗ ដែលគេមិនធ្លាប់ឃើញពីមុនមកនៅក្នុងប្រពៃណីបញ្ចុះសព ទាំងនៅប្រទេសហ្គាណា និងជុំវិញពិភពលោក។

លោក Tetteh-Ashong មិនត្រឹមតែធ្វើក្ដារមឈូសធម្មតាទូទៅប៉ុណ្ណោះទេ ប៉ុន្តែគាត់ថែមទាំងច្នៃប្រឌិតធ្វើក្ដារមឈូសចេញជារូបសត្វផ្សេងៗទៀត មានដូចជារូបតោ រូបគោ រូបដំរី និងរូបរថយន្ត ព្រមទាំងរូបជាច្រើនទៀតផងដែរ។

យ៉ាងណា គាត់មិនបានបញ្ជាក់ថាតើក្ដារមឈូសរូបភាពទាំងនេះ គឺសម្រាប់ដាក់សាកសព ឬគ្រាន់តែទុកជាស្នាដៃសិល្បៈនោះទេ។ ប៉ុន្តែវាពិតជាអស្ចារ្យខ្លាំងណាស់ ដែលអ្នកធ្វើក្ដារមឈូសម្នាក់អាចច្នៃប្រឌិតធ្វើក្ដារមឈូសចេញជារូបភាពផ្សេងៗដ៏គួរឱ្យភ្ញាក់ផ្អើល។

ប្រពៃណីនៃការរចនាក្ដារមឈូសបែបសិល្បៈនៅប្រទេសហ្គាណានេះ គឺជាការបង្ហាញអំពីអត្តសញ្ញាណវប្បធម៌លាយឡំដោយសិល្បៈហត្ថកម្ម និងអត្ថន័យផ្ទាល់ខ្លួន ហើយស្នាដៃសិល្បៈរបស់លោក Tetteh-Ashong នេះ បានបង្ហាញថា ទម្រង់សិល្បៈបែបនេះ នឹងនៅតែបន្តរីកចម្រើនទៅមុខទៀត៕

ប្រភព ៖ intrepidtravel ប្រែសម្រួល ៖ ឈឹម ទីណា