សិស្សានុសិស្សទាំងអស់ត្រូវគិតគូរឱ្យបានច្បាស់លាស់ និងស៊ីជម្រៅពីជំហានបន្ទាប់របស់ខ្លួន ដោយត្រូវរើសជំនាញដែលខ្លួនស្រលាញ់ពេញចិត្ត
(ខេត្តបន្ទាយមានជ័យ)៖ ក្នុងឱកាសអញ្ជើញជួបសំណេះសំណាល និងពិសារអាហារសាមគ្គីជាមួយ សិស្សនិទ្ទេស A ចំនួន ៧៤នាក់ កាលពីរសៀលថ្ងៃទី២៣ ខែធ្នូ ឆ្នាំ២០២៤ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ បានផ្តល់អនុសាសន៍ណែនាំដល់សិស្សានុសិស្សទាំងអស់ត្រូវគិតគូរឱ្យបានច្បាស់លាស់ និងស៊ីជម្រៅពីជំហានបន្ទាប់របស់ខ្លួន ដោយត្រូវរើសជំនាញដែលខ្លួនស្រលាញ់ពេញចិត្ត និងខិតខំរៀនសូត្រ ដើម្បីក្លាយខ្លួនជាធនធានមនុស្សពិតប្រាកដសម្រាប់គ្រួសារ និងសង្គមជាតិ។
ក្នុងពិធីសំណេះសំណាលនេះ ឯកឧត្តមរដ្ឋមន្ដ្រី បានសម្តែងនូវក្តីសប្បាយរីករាយ និងមានមោទកភាពចំពោះសិស្សានុសិស្សដែលបានខិតខំប្រលងបាននិទ្ទេស A បានដោយជោគជ័យចំនួន៧៤នាក់ ដែលជាលទ្ធផលល្អសម្រាប់គ្រួសារ មុខមាត់ខេត្តបន្ទាយមានជ័យ និងសង្គមជាតិ។
ឯកឧត្តមរដ្ឋមន្ដ្រី បានសង្កត់ធ្ងន់ថា សិស្សានុសិស្សត្រូវជៀសឆ្ងាយពីគ្រឿងញៀន បងតូច បងធំ និងអំពើអបាយមុខផ្សេងៗ ដែលធ្វើឱ្យប៉ះពាល់ដល់អនាគត ដោយត្រូវប្រកាន់ខ្ជាប់នូវវិន័យ និងទម្លាប់ល្អៗ។ ជាថ្មីម្តងទៀត ឯកឧត្តមរដ្ឋមន្ដ្រី បានសម្តែងនូវការអបអរសាទរដល់សិស្សនិទ្ទេស A ទាំង៧៤នាក់ និងលើកទឹកចិត្តដល់លោកគ្រូ អ្នកគ្រូ អាណាព្យាបាលទាំងអស់ បន្តខិតខំបង្ហាត់បង្រៀន និងកសាងធនធានមនុស្សបន្ថែមទៀតសម្រាប់សង្គមជាតិ។
សូមបញ្ជាក់ថា ក្នុងពិធីជួបសំណេះសំណាលសិស្សនិទ្ទេស A ទាំង៧៤នាក់ ក៏មានការអញ្ជើញចូលរួមពី ឯកឧត្តម អ៊ុ រាត្រី គណៈអភិបាលខេត្តបន្ទាយមានជ័យ លោកនាយកសាលា នាយិកា លោកគ្រូ អ្នកគ្រូ ៕
ប្រភព ៖ ក្រសួងកសិម្ម
