ហាណូយ ៖ រថភ្លើងក្រោមដី ឬ Metro
ដំបូងរបស់ទីក្រុងហូជីមិញ ប្រទេសវៀតណាម ទទួលបានអ្នកដំណើរ ចំនួន១៥ម៉ឺននាក់ នៅក្នុងថ្ងៃបើកដំណើរការដំបូង ប៉ុន្តែ ជាការជិះ មិនគិតប្រាក់ ៣០ថ្ងៃ​ នេះបើតាមកាសែត VNexpress ។

ខ្សែរថភ្លើងក្រោមដី នៅចន្លោះរវាងតំបន់ Ben Thanh និង Suoi Tien ត្រូវបានដាក់ឲ្យដំណើរ ជាលើកដំបូង កាលពីថ្ងៃអាទិត្យ បន្ទាប់ពីពន្យាពេលដំណើរការ ជាង១០ឆ្នាំ។

លោក Le Minh Triet នាយកក្រុមហ៊ុនផ្លូវរថភ្លើង HURC1 ដែលជាអង្គភាពគ្រប់គ្រងប្រតិបត្តិការរថភ្លើងក្រោមដីមួយនេះ បាននិយាយថា មនុស្សច្រើនសម្រុកមកជិះ ព្រោះជាថ្ងៃអាទិត្យ ហើយក៏ចង់ទទួលបានបទពិសោធន៍ថ្មី នៅលើខ្សែរថភ្លើងនេះ។

កាសែត VNexpress បានចេញផ្សាយថា បន្ទាប់ពីជិះមិនគិតថ្លៃ១ខែ អ្នកដំណើរនឹងមានជម្រើស ក្នុងការទិញសំបុត្រជិះ ក្នុងនោះ មានតម្លៃសម្រាប់ជិះតែមួយដង, ជិះមួយថ្ងៃ, បីថ្ងៃ ឬ ជាប្រចាំខែ។ បើសំបុត្រជិះម្តង នឹងមានតម្លៃ ចាប់ពី ០.២៧ ទៅ ០.៧៩ ដុល្លារអាមេរិក អាស្រ័យលើចម្ងាយផ្លូវធ្វើដំណើរ។ ផ្លូវរថភ្លើងក្រោមដីនេះ បានចំណាយថវិកាសាងសង់ សរុប១.៧២ពាន់លានដុល្លារអាមេរិក។ ដំបូងឡើយ គ្រោងថា បញ្ចប់ការសាងសង់ ចាយពេលត្រឹម ៦ឆ្នាំ ប៉ុន្តែ ពន្យាពេល ១២ឆ្នាំ មកដល់បច្ចុប្បន្ន ទើបដំណើរការ៕

ប្រភពពី VNexpress ប្រែសម្រួល៖ សារ៉ាត