ក្រុងកំពង់ឆ្នាំង ក្នុងមួយថ្ងៃមានសំរាមជាង៤០ តោន ត្រូវបានបោះចោលជាសាធារណៈ
កំពង់ឆ្នាំង៖លោក ហ៊ីង ភ័ព្វមិនា អភិបាលក្រុងកំពង់ឆ្នាំងបានឱ្យដឹងថា ក្នុងក្រុងកំពង់ឆ្នាំងមានប្រជាពលរដ្ឋរស់នៅប្រមាណជាងមួយម៉ឺនខ្នងផ្ទះ ប៉ុន្តែអ្នកទទួលភ្ជាប់សេវាបង់សំរាម មានតែជាង ២ពាន់ខ្នងផ្ទះប៉ុណ្ណោះ ។ហេតុនេះហើយសម្រាមដែលនៅសេសសល់ ត្រូវបានយកទៅបោះចោលនៅក្នុងសួនសាធារណៈ តាមមាត់ទន្លេ តាមក្រោមផ្ទះ ក្រោយផ្ទះ ឬដុតចោល ដែលតាមការប្រមាណក្នុងមួយថ្ងៃមានសំរាមប្រមាណ ៤០តោន ត្រូវបានបោះចោលជាសាធារណៈ ។
ក្នុងចំនួនដ៏សម្បើមនេះនិងដើម្បីគ្រប់គ្រងសំណល់រឹង កាលពីថ្ងៃទី២៥ ខែធ្នូ លោកអភិបាលក្រុងកំពង់ឆ្នាំងបានអំពាវនាវដល់ប្រជាពលរដ្ឋក្នុងក្រុង សូមចូលរួមទទួលសេវាប្រមូលសម្រាមឱ្យបានគ្រប់ៗគ្នា ព្រោះថាតម្លៃប្រមូលសំរាមមិនថ្លៃដូចការលើកឡើងនោះទេ។
អភិបាលក្រុងកំពង់ឆ្នាំង បានបញ្ជាក់ថា ដោយទទួលបានការណែនាំពី ឯកឧត្តមអភិបាលខេត្ត ក្នុងការអនុវត្តថ្លៃប្រមូលសំរាម គឺត្រូវអនុវត្តតាមគោលការណ៍សមធម៌ មិនអាចអនុវត្តទៅតាមសមភាពបានទេ។លោកបន្តថា យើងអនុវត្តតាមគោលការណ៍កំណត់ពិតណាស់ប្រជាពលរដ្ឋ អ្នករកស៊ីតូចតាច មិនអាចទទួលសេវានេះបានឡើយ ។ឧទាហរណ៍ អ្នកលក់ទឹកអំពៅ អ្នកលក់ដូង អ្នកលក់គ្រឿងទេស ពួកគាត់មានចំណូលតិច តែមានសំរាមច្រើន ដែលខុសប្លែកពីធនាគារ មីក្រូហិរញ្ញវត្ថុ តាមមន្ទីរសាធារណៈ និងស្ថានីយប្រេងឥន្ធនៈ មានសម្រាមតិចតែ មុខរបរធំ ។ជាមួយគ្នានេះ អាជីវកម្មខ្នាតតូច មួយចំនួនដែលមិនមានដំណើរការក៏រដ្ឋបាលក្រុងកំពង់ឆ្នាំងជំរុញឱ្យពួកគាត់ទទួលសេវាទាបស្មើនឹងទំហំខ្នងផ្ទះធម្មតា មានតម្លៃត្រឹមតែ១១ ៥០០រៀល ប៉ុណ្ណោះ។
លោកអភិបាលក្រុងបន្ថែមថា ក្នុងក្រុងកំពង់ឆ្នាំងដដែលមានជាប្រភេទដីឡូត៍ដែលមានទំហំធំៗ ដូច្នេះអាជ្ញាធរក្រុងក៏បានទម្លាក់តម្លៃមកស្មើនឹងខ្នងផ្ទះតូចៗដែ។រ ជាងនេះទៀតនៅតាមគ្រួសារដែលមានបណ្ណសមធម៌ បណ្ណក្រីក្រ ក៏សាលាក្រុងមិនបង្ខំយកតម្លៃពីពួកគាត់នោះដែរ។
ដោយយកចិត្តទុកដាក់ផង និងក្នុងបំណងជំរុញឱ្យផែនការគ្រប់គ្រងសំរាមក្នុងក្រុងដំណើរការដោយរលូនសាលាក្រុងបានរៀបចំឱ្យមានកន្លែងពិភាក្សាជាមួយប្រជាពលរដ្ឋរឿងតម្លៃប្រមូលសម្រាមបើពួកគាត់មិនពេញចិត្តនៅសាលាក្រុងរៀងរាល់ម៉ោងធ្វើការ។
អភិបាលក្រុងកំពង់កំពង់ឆ្នាំងបានបន្ថែមទៀតថា កន្លងមកប្រជាពលរដ្ឋដែលមិនព្រមទទួលសេវាបង់ថ្លៃប្រមូលសំរាមចេញទៅក្រៅក្រុង ព្រោះពួកគាត់យល់ថា ការប្រមូលសម្រាមរបស់ក្រុមហ៊ុនគឺអនុវត្តមិនបានត្រឹមត្រូវ ទុកសម្រាមគរចោលមុខផ្ទះ យូៗម្តង ទើបមកយកម្តង ។
ប៉ុន្តែលើចំណាត់ការថ្មីនេះ អាជ្ញាធរក្រុងកំពង់ឆ្នាំងបានរៀបចំការប្រមូលសម្រាមបែបថ្មី ដោយបែងចែករថយន្តប្រមូលសម្រាមតាមទិសដៅច្បាស់លាស់ ជាមួយនិងការបំពាក់ម៉ាស៊ីនជីភីអេស( GPS) នៅតាមរថយន្តនីមួយៗ ដើម្បីគ្រប់គ្រងទិន្នន័យរបស់រថយន្ត ប្រមូលសម្រាម ។ចំពោះបញ្ហារថយន្តប្រមូលសំរាមដែលតែងតែហូរទឹកស្អុយតាមផ្លូវសាធារណៈ ក៏បានណែនាំឱ្យជួសជុលរថយន្ត មិនឱ្យទឹកចេញក្រៅនោះឡើយ។
លោកអភិបាលក្រុងកំពង់ឆ្នាំងរំពឹងថាតាមរយៈការប្រមូលសំរាមដែលម៉ឺងម៉ាត់នេះ ប្រជាពលរដ្ឋតាមផ្ទះនឹងចូលរួមទទួលយកសេវាសំរាម ដើម្បីទីក្រុងស្អាត បរិស្ថានល្អ និងដើម្បីសុខភាពយើងទាំងអស់គ្នា៕
ដោយ៖សុខ គឹមសៀន
