(ភ្នំពេញ)៖ អគ្គលេខាធិការ សហព័ន្ធខ្មែរកីឡាហាប់គីដូ លោក គង់ ចាន់ធីណា បានថ្លែងអំណរគុណ ក្រុមហ៊ុន ISI ជួយសម្រួលបន្ទុក ក្នុងការរៀបចំប្រកួតជើងឯកថ្នាក់ជាតិ ឆ្នាំ២០២៤ ។

នេះជាការបញ្ជាក់របស់លោកអគ្គលេខាធិការ នៅក្នុងឱកាសនាំយកលិខិតថ្លែងអំណរគុណជូនដល់លោក ឡាំ គុយ អ្នកសម្របសម្រួលគម្រោង អង្គការមូលនិធិ ខេ អឹម អេច ក្រុមហ៊ុន ISI កាលពីល្ងាចថ្ងៃទី៣០ ខែធ្នូ ឆ្នាំ២០២៤ ។

លោក គង់ ចាន់ធីណា គូសបញ្ជាក់ថា លោក គួច ហុងជៀក ប្រធានស្តីទីសហព័ន្ធខ្មែរកីឡាហាប់គីដូបានអនុញ្ញាតឱ្យក្រុមការងារសហព័ន្ធយកលិខិតថ្លែងអំណរគុណជូនដល់ក្រុមហ៊ុន ISI ដែលបានជួយឧបត្ថម្ភគាំទ្រដល់កម្មវិធីប្រកួតកីឡាហាប់គីដូ ជ្រើសរើសជើងឯកថ្នាក់ជាតិ ឆ្នាំ២០២៤ ដែលបានរៀបចំឡើងប្រកបដោយភាពជោគជ័យ កាលពីថ្ងៃទី២១-២២ ខែធ្នូ កន្លងទៅថ្មីៗនេះ។

នៅក្នុងឱកាសសំណេះសំណាល និងប្រគល់លិខិតថ្លែងអំណរគុណនេះ លោក ឡាំ គុយ អ្នកសម្របសម្រួលគម្រោង អង្គការមូលនិធិ ខេ អឹម អេច បានបង្ហាញក្តីសប្បាយរីករាយ ដែលបានចូលរួមឧបត្ថម្ភគាំទ្រដល់ការប្រកួតជើងឯកថ្នាក់ជាតិ លើកទី២ ឆ្នាំ២០២៤ ដើម្បីលើកស្ទួយវិស័យកីឡាហាប់គីដូនៅកម្ពុជាឱ្យមានដំណើរការអភិវឌ្ឍបន្តទៀត។

«ក្នុងនាមសហព័ន្ធខ្មែរកីឡាហាប់គីដូ យើងខ្ញុំសូមថ្លែងអំណរគុណដល់ក្រុមហ៊ុន ISI ដែលផ្តល់ការគាំទ្រ ក្នុងឆ្នាំទី១ របស់ក្រុមហ៊ុនដៃគូអភិវឌ្ឍន៍មួយនេះ ដោយនេះគឺជាទឹកចិត្ដដ៏ថ្លៃថ្លាក្នុងការលើកកម្ពស់វិស័យកីឡានៅកម្ពុជាយើង»។

លោកអគ្គលេខាធិការបានបង្ហាញក្តីសង្ឃឹមថា ក្រុមហ៊ុន ISI នឹងបន្តជួយឧបត្ថម្ភគាំទ្រដល់វិស័យកីឡាហាប់គីដូ ដោយក្រុមហ៊ុនបានឧបត្ថម្ភជាថវិកា ដែលជាចំណែកអភិវឌ្ឍន៍មួយដ៏ធំដែរ ក្នុងចំណោមដៃគូឧបត្ថម្ភមួយចំនួនទៀត ដូចជា ក្រុមហ៊ុនដឹកអ្នកដំណើរ ឡារីតា ជាដើម បូកផ្សំនឹងថវិការៃអង្គាសពីសមាជិកគណៈកម្មាធិការប្រតិបត្តិសហព័ន្ធខ្មែរកីឡាហាប់គីដូ ក្នុងឆន្ទៈដ៏មោះមុត ដើម្បីរៀបចំព្រឹត្តិការណ៍ជើងឯកថ្នាក់ជាតិ លើកទី២ ឱ្យចេញជារូបរាងឡើង ក្នុងគោលដៅបន្តដំណើរការផលិតធនធានកីឡាករ កីឡាការិនី ជាពិសេសធនធានវ័យក្មេងៗឱ្យកាន់តែសម្បូរបែប និងប្រកបដោយគុណភាពត្រៀមឆ្ពោះទៅចូលរួមការប្រកួតអន្តរជាតិនាឆ្នាំក្រោយៗទៀត។ជារួម ក្នុងនាមសហព័ន្ធ លោកចាត់ទុកថា ក្រុមហ៊ុន ISI បានជួយសម្រួលបន្ទុកមួយដ៏ធ្ងន់របស់សហព័ន្ធខ្មែរក្នុងការប្រកួតកីឡាហាប់គីដូ ជើងឯកថ្នាក់ជាតិ ឆ្នាំ២០២៤។

គួររម្លឹកថា ការប្រកួតកីឡាហាប់គីដូ ជ្រើសរើសជើងឯកថ្នាក់ជាតិ លើកទី២ កាលពីថ្ងៃទី២១-២២ ខែធ្នូ ឆ្នាំ២០២៤ មានក្លឹបចូលរួមចំនួន៥ ដោយមានប្រតិភូ គ្រូបង្វឹក កីឡាករ កីឡាការិនីសរុបចំនួន ៨៧នាក់ ក្នុងនោះកីឡាករ កីឡាការិនី ៦៧នាក់ (ស្រី ២៧នាក់)ប្រកួតលើ ២៥វិញ្ញាសា។ ចំពោះលទ្ធផលជ័យលាភី រួមមាន៖ ចំណាត់ថ្នាក់លេខ១ ក្លឹបក្រសួងមហាផ្ទៃ មេដាយសរុប ២៦គ្រឿង ក្នុងនោះមេដាយមាស ១២ ប្រាក់៧ និងសំរឹទ្ធ៧, ចំណាត់ថ្នាក់លេខ២ ក្លឹបធីណា មេដាយសរុប ២២គ្រឿង មានមាស ៥ ប្រាក់៩ និងសំរឹទ្ធ៨, លេខ៣ ក្លឹបអូឡាំពិក មេដាយសរុប១៨ មានមាស៤ ប្រាក់៣ និងសំរឹទ្ធ១១, លេខ៤ ក្លឹបម៉ាស្ទ័រសេង មេដាយសរុប១៦គ្រឿង មានមាស ៣ ប្រាក់២ និងសំរឹទ្ធ១១ ខណៈលេខ៥ ក្លឹបឥន្ទ្រីយ៍ មេដាយសរុប១០ មានមាស១ ប្រាក់៤ និងសំរឹទ្ធ៥គ្រឿង៕

អត្ថបទ-រូបភាព ៖ លោក ចាន់ វិចិត្រ