សៀមរាប៖ក្រសួងទេសចរណ៍បានឱ្យដឹងថា រយៈពេល២ថ្ងៃនៃដំណាច់​ឆ្នាំ២០២៤ ឆ្លងចូលឆ្នាំថ្មី ឆ្នាំសកល២០២៥ មាន ភ្ញៀវទេសចរជាតិ អន្តរជាតិ​ធ្វើដំណើរកម្សាន្តទូទាំងប្រទេសជាង៣,៥លាននាក់ ខណៈ​ខេត្ត​សៀមរាប​ប្រកាស​ថា មាន ទេសចរជាតិ អន្តរជាតិជាង៣៣ម៉ឺននាក់​មកកម្សាន្តឆ្លងឆ្នាំនៅទឹកដីទេសចរណ៍វប្បធម៌មួយនេះ។

ក្នុងឱកាសបុណ្យចូលឆ្នាំសកល២០២៥ ក៏ដូចជាបណ្ដាខេត្តដទៃ ពិសេសរាជធានីភ្នំពេញដែលប្រារព្ធ​ព្រឹត្តិការណ៍ ​​​”សាទរ កម្ពុជា”​ដែលជាព្រឹត្តិការណ៍បង្កើតភាពរីករាយ និងទាក់ទាញទេសចរដ៏ធំនោះ នៅខេត្តសៀមរាបឯណោះវិញ​នៅថ្ងៃ​ទី៣១ ខែធ្នូ ឆ្នាំ២០២៤ នៅតំបន់​ទេសចរណ៍សំខាន់ៗពោរពេញទៅដោយមនុស្សម្នាប្រុសស្រីក្មេង ទាំងជាតិ និងអន្តរជាតិ បាន​ធ្វើដំណើរកម្សាន្តនិងទស្សនាទស្សនីយ​ភាពនានាដែលរៀបចំឡើងដោយរដ្ឋបាលខេត្ត ។រាត្រីឆ្លងឆ្នាំ ចំណុច​ដែលទាក់​ទាញបំផុតសម្រាប់ប្រជាពលរដ្ឋ និងទេសចរ មានដូចជា សួនខាងមុខព្រះរាជដំណាក់ តំបន់ដងស្ទឹងប្រវត្តិសាស្រ្ត​សៀមរាប សួនទឹករាំតាមចង្វាក់ភ្លេងទើបបង្កើតថ្មី និងពិសេសជាងគេគឺ វិថីរាត្រី ផាប់ស្រ្ទីត ដែលជាចំណុចនៃការកម្សាន្តពេលរាត្រី។

រយៈពេលចុងក្រោយនេះ ឯកឧត្តម ប្រាក់ សោភ័ណ អភិបាល​ខេត្ត​សៀមរាប ចូលរួមដោយវិស័យឯកជនផង​បាន​បង្កើត​កន្លែងទស្សនា​ថ្មីៗនិងបង្កើតព្រឹត្តិការណ៍ជាច្រើនបន្ថែមទៀត សម្រាប់ប្រជាពលរដ្ឋ ក៏ដូចជាភ្ញៀវទេសចរជាតិ អន្តរជាតិកម្សាន្ត។

តួលេខដំបូងដែលបញ្ជាក់ឱ្យដឹងដោយមន្ទីរទេសចរណ៍ខេត្តសៀមរាបថា នៅថ្ងៃឆ្លងឆ្នាំសកល២០២៤ឈានចូល ឆ្នាំ២០២៥ ខេត្តទទួល​បានភ្ញៀវចំនួន ៣៣៣ ៦៦០ នាក់ ។ចំនួននេះកើន​ឡើងប្រមាណ ៩.៧៣ភាគរយ​បើប្រៀបធៀបនឹង​ឆ្នាំ២០២៣ ដែមានចំនួន៣០៤ ៦៤០នាក់។ក្នុងចំនួនភ្ញៀវជាង៣៣ម៉ឺននាក់ មានភ្ញៀវទេសចរ​ជាតិចំនួន ៣២៣.៤០០នាក់ កើនឡើង​ប្រមាណ៩.៦៣ភាគរយ ,ទេសចរអន្តរជាតិ ១០ ២៦០នាក់កើនឡើង ១៣.២០ភាគរយ។

ដោយឡែកក្រសួងទេសចរណ៍បានប្រកាសឱ្យដឹងថា ទេសចរជាតិ និងអន្តរជាតិធ្វើកម្សាន្តទូទាំងប្រទេស ក្នុងឱកាសឆ្លងឆ្នាំ​សកល នៅតាមបណ្ដារាជធានី-ខេត្ត ចាប់ពីថ្ងៃទី៣០-៣១ ខែធ្នូ ឆ្នាំ២០២៤​មានចំនួន ៣ ៥៣៥ ៣២៥នាក់ ក្នុងនោះ​ទេសចរជាតិប្រមាណ ៣ ៤៨៨ ០៦៥ នាក់ និងទេសចរអន្តរជាតិប្រមាណ ៤៧ ២៦០នាក់ ៕

អត្ថបទនិងរូបភាព៖ ប៊ុន រដ្ឋា,មុនី