បរទេស៖ អង្គការសហប្រជាជាតិបាននិយាយ កាលពីថ្ងៃសុក្រថា មនុស្សជាង៣.៥លាននាក់ ត្រូវបានផ្លាស់ទីលំនៅ ដោយសារជម្លោះប្រដាប់អាវុធ នៅក្នុងប្រទេសមីយ៉ាន់ម៉ា កើនឡើងពី១.៥លាននាក់ ធៀបនឹងឆ្នាំមុន ដោយព្រមានថា វិបត្តិមនុស្សធម៌របស់ប្រទេសនេះ អាចកាន់តែអាក្រក់ទៅៗ។

ចាប់តាំងពីយោធាបានដណ្តើមអំណាច នៅក្នុងរដ្ឋប្រហារ ឆ្នាំ ២០២១ ប្រទេសមីយ៉ាន់ម៉ា បានកើតមានការប្រយុទ្ធគ្នារវាងក្រុមឧទ្ទាមជនជាតិភាគតិត និងកងទ័ព។ ក្រុមទាំងនោះបានប្រយុទ្ធប្រឆាំងនឹងយោធា ដើម្បីស្វ័យភាព និងការគ្រប់គ្រងធនធានធម្មជាតិដែលអាចរកកម្រៃបាន។

ទីភ្នាក់ងារមនុស្សធម៌របស់អង្គការសហប្រជាជាតិ ហៅកាត់ OCHA បាននិយាយ នៅក្នុងសេចក្តីថ្លែងការណ៍មួយថា ជម្លោះនេះ បានរីករាលដាលពីតំបន់ព្រំដែន ទៅកាន់តំបន់ភាគច្រើន នៅទូទាំងប្រទេស ដោយបង្ខំឱ្យមនុស្សរត់ចេញពីផ្ទះរបស់ពួកគេ ដើម្បីស្វែងរកសុវត្ថិភាព និងបំពេញតម្រូវការជាមូលដ្ឋានរបស់ពួកគេ។

OCHA បាននិយាយថា គិតត្រឹមថ្ងៃទី ១៦ ខែធ្នូ «គេប៉ាន់ប្រមាណថា មនុស្សជាង ៣.៥លាននាក់ – ច្រើនជាង ៦% នៃចំនួនប្រជាជន សរុប៥៧លាននាក់ នៅទូទាំងប្រទេសមីយ៉ាន់ម៉ា ឥឡូវនេះ ត្រូវបានផ្លាស់ទីលំនៅ ហើយប្រហែលមួយភាគបី នៃពួកគេ គឺជាកុមារ»។

ទីភ្នាក់ងារនេះបាននិយាយថា ថ្ងៃចុងក្រោយនៃឆ្នាំ២០២៤ ក៏មានការប្រយុទ្ធគ្នាដ៏ខ្លាំងក្លា មានទាំងការវាយប្រហារតាមអាកាស យន្តហោះគ្មានមនុស្សបើក ការបាញ់ផ្លោងកាំភ្លើងធំ ការវាយឆ្មក់ និង ការចាប់ខ្លួន តាមអំពើចិត្ត៕

ប្រភពពី AFP ប្រែសម្រួល៖ សារ៉ាត