(កំពង់ធំ)៖ សហព័ន្ធកីឡាបេសប្បលកម្ពុជាទទួលបានឱកាសប្រមូលផ្តុំក្រុមជម្រើសជាតិជាផ្លូវការលើកដំបូងពីក្រសួងអប់រំយុវជននិងកីឡា ក្រោយបង្ហាវត្តមានលើទឹកដីកម្ពុជាអស់រយៈពេល២២ឆ្នាំ។
ការប្រមូលផ្តុំក្រុមជម្រើសជាតិជាលើកដំបូងនេះ នឹងត្រូវធ្វើតេសជ្រើសរើសកីឡាករឆ្នើមចំនួន២០នាក់ ហ្វឹកហាត់ប្រមូលផ្តុំជាមួយគ្រូជនជាតិជប៉ុន ដើម្បីពង្រឹងសមត្ថភាព និងបច្ចេកទេស ត្រៀមខ្លួនចូលរួមប្រជែងក្នុងព្រឹត្តិការណ៍ស៊ីហ្គេម លើកទី៣៣ នៅប្រទេសថៃ ចុងឆ្នាំ២០២៥ ។

ការធ្វើតេសស្វែងរកកីឡាករឆ្នើមរយៈពេល២នេះ លោក Takashi Matsuyoshi គ្រូបង្វឹកជនជាតិជប៉ុន បានថ្លែងថា កីឡាករដែលអាចជាប់ក្នុងការជ្រើសរើសរបស់សហព័ន្ធកីឡាបេស្បលចំនួន២០នាក់ ដើម្បីហ្វឹកហាត់ជាកីឡាករជម្រើសជាតិឆ្នាំ២០២៥ ពួកគេត្រូវមានបច្ចេកទេសខ្ពស់ កាយសម្បទាមាំមួន មានវិន័យល្អ និងមានល្បឿនថាមពលខ្លាំងក្លា។

លោក ឆែម ដារ៉ា ប្រធានសហព័ន្ធកីឡាបេស្បលកម្ពុជា បានថ្លែងគូសបញ្ជាក់ដែរថា បន្ទាប់ពីទទួលបានភ្លើងខៀវពីក្រសួងអប់រំយុវជននិងកីឡាសម្រាប់ការជ្រើសរើសក្រុមកីឡាករជម្រើសជាតិជាផ្លូវការលើកដំបូង សហព័ន្ធបានជ្រើសរើសកីឡាករឈុតធំចាប់ពីអាយុ១៨ឆ្នាំឡើងទៅ ដែលមានលក្ខណៈពិសេស ជាងឆ្នាំមុនៗ ដោយសាតែយើងចង់បានគុណភាព ត្រៀមប្រជែងក្នុងព្រឹត្តិការណ៍ស៊ីហ្គេម ឆ្នាំ២០២៥នៅប្រទេសថៃ។

លោក ឆែម ដារ៉ា ក៏បានបង្ហាញក្តីសង្ឈឹមយ៉ាងមុតមាំថា ការរំពឹងទុកតាមរយៈបទពិសោធន៍កន្លងមក និងការប្រមូលផ្តុំចាប់ពីការប្រកួតចម្រាញ់នេះ ស៊ីហ្គេម នៅថៃឆ្នាំ២០២៥ បេស្បលកម្ពុជាមានភាគរយៈខ្ពស់ដណ្តើមបានមេដាយជូនកម្ពុជា ខណៈផែនការគ្រោងទុកគ្រោងនឹងនាយកកីឡាករបេស្បលមានឈាមជ័រខ្មែរប្រមាណជា១០នាក់មកពីអាមេរិកមកជួយក្រុមនៅស៊ីហ្គេមផងដែរ។

ជាមួយការចូលរួមធ្វើតេសជាកីឡាករជម្រើសរើសជាតិ ឆ្នាំ២០២៥ កីឡាករ ញ៉ន ដេវី មកពីក្លឹបថៃហ្គ័រ ទទួលស្វាយព្រៃ បានបង្ហាញអារម្មណ៍រីករាយ និងមានក្តីរំពឹងខ្ពស់ជាប់ជាកីឡាករជម្រើសជាតិ។ ដ្បិតការធ្វើតេសហាក់ទទួលបានភាពវិជ្ជមានច្រើនស ជាងការធ្វើតេសកាលពីឆ្នាំមុនៗ។

សម្រាប់ការផ្តល់ជូនក្រុមជម្រើសជាតិជាលើកដំបូងជូនសហព័ន្ធកីឡាបេស្បលកម្ពុជា ហ្វឹកហាត់ឆ្ពោះទៅប្រជែងក្នុងព្រឹត្តិការណ៍ស៊ីហ្គេម លើកទី៣៣ នៅប្រទេសថៃ នាចុងឆ្នាំ២០២៥ លោក ដួង មាសចំរើន អគ្គនាយករងនៃ អគ្គនាយកដ្ឋានកីឡា តំណាងក្រសួងអប់រំយុវជនិងកីឡា បានជម្រុញលើកទឹកចិត្តកីឡាករឱ្យខិតខំហ្វឹកហាត់ពង្រឹងសមត្ថភាពឱ្យបានខ្លាំងក្លា ព្រោះនេះជាការផ្តល់ជូននូវការប្រមូលផ្តុំលើកដំបូងដែលឧបត្ថម្ភគាំទ្រដោយក្រសួងអប់រំយុវជននិងកីឡា។

លោក បានពន្យល់បន្ថែមថា បេស្បលបានបង្កើតឡើង ជាក្រុមជម្រើសជាតិផ្លូវការទទួលស្គាល់ដោយក្រសួងអប់រំយុវជននិងកីឡា គឺជាក្រុមតំណាងឱ្យជាតិទាំងមូល មានន័យថា តំណាងប្រជានកម្ពុជា១៦លាននាក់ ដូច្នោះសូមប្រឹងប្រែងហ្វឹកហាត់ពង្រឹងសមត្ថភាពឱ្យបានល្អបំផុត ដើម្បីនាំយកជ័យជម្នះលើកមុខមាត់ជាតិលើឆាកអន្តរជាតិ។

គួរឱ្យដឹងការធ្វើតេសជ្រើសរើសកីឡាករជម្រើសជាតិកីឡាបេស្បល ជាប់ជាជម្រើសជាតិឆ្នាំ២០២៥ ដោយគ្រូជប៉ុនមានរយៈពេល២ថ្ងៃ មានកីឡាករចូលរួមជម្រុះចំនួន៦១នាក់ មានក្លឹបមកពីរាជធានីភ្នំពេញ និងមកពីបណ្តាលខេត្ត ដោយចម្រាញ់យក២០នាក់ ត្រៀមចូលរួមប្រជែងដណ្តើមមេដាយ ស៊ីហ្គេម លើកទី៣៣ នៅប្រទេសថៃ៕

ថត ៖ ជីម ភារ៉ា
អត្ថបទ ៖ ជាវ ចន្ធូ