ស្ទឹងត្រែង៖ ចង្ក្រានបង្កើនថាមពលដែលជាជំនួយរបស់ក្រុមហ៊ុន គ័ង ចូវអាយស្បឺត ត្រូវបានចែកជូនប្រជាពលរដ្ឋ ៨៥៧​គ្រួសារ នៅក្នុង​សង្កាត់ ៤ក្នុងក្រុងស្ទឹងត្រែងក្រោមវត្តមានឯកឧត្តម សរ សុពុត្រា អភិបាលខេត្តស្ទឹងត្រែង និងមានការចូលរួម​ពីមន្ត្រីក្រោមឱវាទផងដែរ កាលពីថ្ងៃទី៥មករា២០២៥ នៅក្នុងបរិវេណ «វិទ្យាល័យព្រះរាជ​បូជនីយកិច្ច» ខេត្តស្ទឹងត្រែង។

លោក សាយ កុសល អភិបាលក្រុងស្ទឹងត្រែងបានឱ្យដឹងថា ប្រជាពលរដ្ឋដែលទទួល​បានចង្ក្រាន​ថាមពលពីអាជ្ញាធរ​នៅពេលនេះ មកពីសង្កាត់ ៤ក្នុងក្រុង ក្នុងនោះ សង្កាត់ស្ទឹងត្រែង ទទួលបាន ២៥៩ចង្រ្កាន សង្កាត់ស្រះឫស្សី ទទួលបាន ២០៧ចង្ក្រាន សង្កាត់ព្រះបាទ ១៩១ចង្រ្កាន និងសង្កាត់សាមគ្គី ២០០ចង្រ្កាន។

ក្នុងឱកាសនេះអភិបាលខេត្តស្ទឹងត្រែង ឯកឧត្តម សរ សុពុត្រា បានថ្លែងអំណរគុណក្រុមហ៊ុន គ័ង ចូវអាយស្បឺត ដែល​បានផ្តល់​ចង្ក្រានថាមពលជូនដល់ប្រជាពលរដ្ឋជាង ៨០០គ្រួសារ ដែលជួយ​លើការងារបរិស្ថាន ការបន្ថយការប្រើប្រាស់អុស និងបានរួមចំណែក​ជួយដល់បងប្អូនជនពិកានៅខេត្តកំពង់ឆ្នាំង ដែលទទួលបានប្រាក់​ចំណូលពីការផលិតចង្រ្កាននេះ មានគុណភាពប្រើប្រាស់បានរហូតដល់ ៣ឆ្នាំ ខុសពីចង្រ្កានប្រភេទផ្សេងៗ ប្រើប្រាស់យ៉ាងយូបំផុតបានត្រឹមតែ ១ឆ្នាំ​ប៉ុណ្ណោះ។
លោក សាខុន ប៉ូរិន តំណាងក្រុមហ៊ុន គ័ង ចូវអាយស្បឺត បានថ្លែងថា ការចែកជូនចង្រ្កានបង្កើនថាមពលនៅពេលនេះ ដើម្បីឱ្យប្រជាពលរដ្ឋ​ប្រើ​ប្រាស់កាត់បន្ថយបរិស្ថាន និងកាត់បន្ថយការប្រើប្រាស់អុស​ច្រើន​កាត់បន្ថយ ផ្សែងចូល ទៅក្នុង បរិយាកាស និងកាត់បន្ថយភាពក្រីក្រ តាមរយៈការទិញអុសយកមកប្រើប្រាស់។ លោកថា ចង្រ្កាននេះ​បានផលិតនៅខេត្ត កំពង់ឆ្នាំង ហៅថា សិប្បកម្មព្រៃមាន់ និងបានផ្គត់​ផ្គង់ជាច្រើនកន្លែងនៅកម្ពុជា៕

ដោយ៖ឡុង សំបូរ