ព្រឹត្តិការណ៍សំណេរអង្គរលើកទី២ នឹងប្រារព្ធនៅថ្ងៃទី១៩ ខែមករានៅប្រាសាទអង្គរវត្ត
សៀមរាប៖ ព្រឹត្តិការណ៍សំណេរអង្គរលើកទី២ នឹងប្រារព្ធនៅថ្ងៃទី១៩ ខែមករា ឆ្នាំ២០២៥ ខាងមុខវេលាម៉ោង៧ព្រឹក នៅលើស្ពានហាលខាងលិចប្រាសាទអង្គរ ខណៈបេក្ខជនជាង១ ២០០នាក់បានចុះឈ្មោះចូលរួមប្រកួតប្រជែង ។
បញ្ជាក់ក្នុងសន្និសីទសារព័ត៌មានកាលពីថ្ងៃទី៥ ខែមករា ឆ្នាំ២០២៥ ឯកឧត្តម ឡុង កុសល អគ្គនាយកអាជ្ញាធរជាតិ អប្សរា ,លោក លឹម ប៊ុនហុក គណៈកម្មការរៀបចំកម្មវិធីសំណេរអង្គរ បានលើកឡើងពីគុណតម្លៃនៃរមណីយដ្ឋានអង្គរ ផ្សាភ្ជាប់ជាមួយការប្រកួតសំណេរអង្គរ និងការលើកកម្ពស់អក្សរសាស្រ្តខ្មែរ ។លោក លឹម ប៊ុនហុក បានបញ្ជាក់ថា ព្រឹត្តិការណ៍សំណេរអង្គរលើកទី២នេះ នឹងធ្វើឡើងនៅថ្ងៃទី១៩ ខែមករាខាងមុខវេលាម៉ោង៧ព្រឹក នៅស្ពានហាលខាងលិចប្រាសាទអង្គរ។មានបេក្ខជនចូលរួម១ ២២០នាក់ ក្នុងនេះបេក្ខជន៨១៨នាក់ អាយុចាប់ពី១៩ឆ្នាំឡើង និង បេក្ខជន៣៩៦នាក់ អាយុចាប់ពី ៦ឆ្នាំ ទៅដល់១៨ឆ្នាំ ។
លោកបញ្ជាក់ថា ព្រឹត្តិការណ៍ប្រឡងសរសេរតាមអានសំណេរអង្គរលើកទី២នេះ ប្រព្រឹត្តទៅក្រោមការចូលរួមរបស់ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងធ្វើជាអ្នកអានអត្ថបទសម្រាប់បេក្ខជនប្រកួត ព្រមទាំងវត្តមានរបស់ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ ផងដែរ ។
លោក លឹម ប៊ុនហុក បានគូសរំលេចថា ក្នុងចំណោមបេក្ខជនចុះឈ្មោះជាង១ ២០០នាក់នោះ មានបេក្ខជនចាស់ជាងគេអាយុ៨១ឆ្នាំ,បេក្ខជនក្មេងជាងគេអាយុ៦ឆ្នាំ និងមានជនបរទេស ព្រមទាំងព្រះសង្ឃ ៨០អង្គផងដែរ។ ។ បេក្ខជនខេត្តសៀមរាបច្រើនជាងគេ បន្ទាប់មករាជធានីភ្នំពេញ និងបាត់ដំបង ។
លោកបន្តថា ការប្រឡងសរសេរតាមអានសំណេរអង្គរ គណៈកម្មការនឹងចាប់ផ្ដើមកែសន្លឹកកិច្ចការបេក្ខជន បន្ទាប់ពីចប់ការប្រឡង ហើយនឹងប្រកាសលទ្ធនារសៀលថ្ងៃដដែល ។សម្រាប់ជ័យលាភីនឹងត្រូវបែងចែកជា២ គឺបេក្ខជនអាយុ១៨ឆ្នាំចុះក្រោម មានជ័យលាភីលេខ១ដល់លេខ៣ និងបេក្ខជនអាយុ១៩ឆ្នាំឡើង មានជ័យលាភីលេខ១ដល់លេខ៣ ដូចគ្នា និង ជ័យលាភីអក្សរស្អាត និងជ័យលាភីផ្សេងៗទៀតផងដែរ ។
សូមជម្រាបថា ព្រឹត្តិការណ៍សំណេរអង្គរ សហការរៀបចំដោយ ក្រសួងអប់រំ យុវជន និងកីឡា ក្រសួងវប្បធម៌ និងវិចិត្រសិល្បៈ អាជ្ញាធរជាតិអប្សរា រដ្ឋបាលខេត្តសៀមរាប និង សមាគមក្លឹបទេសចរណ៍ខេត្តសៀមរាប ៕
ដោយ៖ប៊ុនរដ្ឋា
