ឆ្នាំ២០២៥ រដ្ឋាករទឹកបាត់ដំបង នឹងពង្រីកបណ្តាញមេ-មេរងបន្ថែមនៅក្នុងតំបន់សេវាកម្មរបស់ខ្លួន
បាត់ដំបង៖ឯកឧត្តម អ៊ុត ក្លឹង អគ្គនាយករដ្ឋាករទឹកបាត់ដំបង បានបញ្ជាក់ថា នៅឆ្នាំ២០២៥រដ្ឋាករទឹកបាត់ដំបង នឹងពង្រីកបណ្តាញមេ-មេរងបន្ថែមនៅក្នុងតំបន់សេវាកម្មរបស់ខ្លួនពង្រឹងលើការងារថែទាំ ជួសជុល ប្រព័ន្ធផលិតកម្ម និងរៀបចំបង្កើននូវការបំពាក់ក្បាលវ៉ានបាញ់ទឹកសម្រាប់រថយន្តពន្លត់អគ្គិភ័យបន្ថែមទៀត។
ក្នុងកិច្ចប្រជុំបូកសរុបលទ្ធផលការងាររយៈពេលមួយឆ្នាំរបស់រដ្ឋាករទឹកបាត់ដំបងប្រចាំឆ្នាំ២០២៤ និងលើកទិសដៅអនុវត្តការងារបន្តឆ្នាំ២០២៥ កាលពីថ្ងៃទី៩ ខែមករា ឆ្នាំ២០២៥ ឯកឧត្តម អ៊ុត ក្លឹង បានបញ្ជាក់ថា ជាទិសដៅបន្ត រដ្ឋាករទឹកបាត់ដំបង នឹងពង្រីកបណ្តាញមេ-មេរងបន្ថែមនៅក្នុងតំបន់សេវាកម្មរបស់ខ្លួនពង្រឹងលើការងារថែទាំ ជួសជុល ប្រព័ន្ធផលិតកម្ម និងរៀបចំបង្កើននូវការបំពាក់ក្បាលវ៉ានបាញ់ទឹកសម្រាប់រថយន្តពន្លត់អគ្គីភ័យបន្ថែមទៀត នៅតាមតំបន់ទីប្រជុំជន និងថែទាំក្បាលវ៉ានអគ្គិភ័យ ដែលមានស្រាប់ ដើម្បីធានាបាន នៅពេលអន្តរាគមន៍បាញ់ពន្លត់អគ្គិភ័យបានទាន់ពេលវេលា ក្នុងករណីកើតមានគ្រោះអគ្គិភ័យជាយថាហេតុកើតឡើង។
បច្ចុប្បន្នក្រុមការងារកំពុងតែពន្លឿននូវការសាងសង់ស្ថានីយបូមទឹកឆៅថ្មី និងរោងចក្រប្រព្រឹត្តកម្មទឹកស្អាតថ្មីមួយកន្លែង មានសមត្ថភាពផលិត៥០ ០០០ ម៉ែត្រគូបក្នុង១ថ្ងៃ ដែលមានទីតាំង នៅភូមិកំពង់សីមា សង្កាត់វត្តគរ ក្រុងបាត់ដំបង និងការងារពង្រីកបំពង់មេទឹកស្អាតប្រវែង ៩៤គីឡូម៉ែត្រ ។
ឯកឧត្តមអគ្គនាយកបានបញ្ជាក់បន្ថែមថា សមត្ថភាពរោងចក្រផលិតទឹកស្អាតថ្មី ខាងលើនេះបូករួមជាមួយរោងចក្រផលិតទឹកស្អាតដែលបាននិងកំពុងដំណើរការប្រចាំថ្ងៃ នាពេលបច្ចុប្បន្ន ចំនួន២ទីតាំង អាចនឹងធ្វើឱ្យរដ្ឋាករទឹកបាត់ដំបងមានសមត្ថភាពក្នុងការផលិតទឹកស្អាត កើនដល់ទៅ ៨៣ ៥២០ម៉ែត្រគូប ក្នុងមួយថ្ងៃ និង បំពង់បណ្តាញទឹកស្អាត មានប្រវែងសរុប ៩២២គីឡូម៉ែត្រ និងមានវិសាលភាពគ្របដណ្តប់យ៉ាងទូលំទូលាយក្នុងការផ្គត់ផ្គង់ទឹកស្អាត មិនត្រឹមតែអាចគ្របដណ្តប់ក្នុងដែនសេវាកម្មអាជ្ញាបណ្ណ រដ្ឋាករទឹកបាត់ដំបងផ្ទាល់ប៉ុណ្ណោះទេ គឺអាចមានលទ្ធភាពចែកចាយនៅតំបន់ខាងក្រៅផ្សេងៗទៀតដែលស្ថិតនៅជិតជុំវិញនោះទៀតផង។
ឯកឧត្តម អ៊ុត ក្លឹង អគ្គនាយករដ្ឋាករទឹកបាត់ដំបងបានគូសរំលេចថា ការអភិវឌ្ឍរោងចក្រផលិតទឹកស្អាតខ្នាតធំនេះ ដើម្បីឆ្លើយតបទៅនឹងកំណើនប្រជាពលរដ្ឋ និង ពីតម្រូវការទឹកស្អាត ព្រមទាំងការអភិវឌ្ឍក្រុង និងទីប្រជុំជននានាក្នុងការលើកកម្ពស់សុខភាពសាធារណៈ និង ជីវភាព របស់ប្រជាជន ស្របតាមគោលនយោបាយរបស់រាជរដ្ឋាភិបាលកម្ពុជា ដែលផ្តោតសំខាន់លើផែនការយុទ្ធសាស្រ្តបញ្ចកោណដំណាក់កាលទី១ នីតិកាលទី៧ ដែលមានសម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា ដោយកំណត់នូវអាទិភាពគន្លឹះចំនួន៥គឺ ធនធានមនុស្សផ្លូវ ទឹក ភ្លើង និងបច្ចេកវិទ្យា៕
អត្ថបទ-រូបភាព៖ អ៊ុក សំអាន បប.
