អង្គការបេះដូងមាស រំពឹងថា មុខវិជ្ជាអប់រំកាយបែបថ្មីផ្តល់សារៈប្រយោជន៍ចំពោះកុមារទាំងសុខភាព និងប្រាជ្ញាស្មារតី
ភ្នំពេញ៖ លោក នីស៊ីយ៉ាម៉ា ណាអូគិ អគ្គលេខាធិការអង្គការក្រៅរដ្ឋាភិបាលបេះដូងមាសរបស់ប្រទេសជប៉ុន ប្រចាំនៅ ប្រទេសកម្ពុជា បានពណ៌នាថា មុខវិជ្ជាអប់រំកាយបែបថ្មី ដែលជាការចងក្រងរបស់អង្គការក្រៅរដ្ឋាភិបាលបេះដូងមាស គាំទ្រដោយក្រសួងអប់រំ យុវជន និងកីឡា នឹងក្លាយជាសារៈប្រយោជន៍សម្រាប់សិស្សានុសិស្ស ដើម្បីទទួលបានទាំងសុខភាព និងប្រាជ្ញាស្មារតី ពិសេស ជួយឱ្យសិស្សានុសិស្សទទួលបានមូលដ្ឋានកីឡា ដើម្បីអភិវឌ្ឍខ្លួនក្លាយជាកីឡាករអាជីពតាមចំណងចំណូលចិត្តនៅពេលអនាគត។លោកបានបញ្ជាក់ដូច្នេះ ក្នុងសិក្ខាសាលាបញ្ចប់គម្រោង អប់រំកាយសម្រាប់ទាំងអស់គ្នា រយៈពេល៥ឆ្នាំ នៅមជ្ឈមណ្ឌលជាតិហ្វឹកហ្វឺនកីឡា ក្នុងពហុកីឡដ្ឋានជាតិអូឡាំពិក។
លោក នីស៊ីយ៉ាម៉ា ណាអូគិ បានបង្ហាញថា តាមរយៈគម្រោងនេះ លោកជឿជាក់ថា លោកគ្រូអ្នកគ្រូ ក៏ដូចជាការិយាល័យនៃមន្ទីរអប់រំយុវជននិងកីឡា តាមស្រុកខណ្ឌចេះវាយតម្លៃផែនការអប់រំកាយនៅតាមសាលានីមួយៗប្រកដដោយប្រសិទ្ធិភាព ដែលជាផ្នែកមួយជួយពង្រឹងគុណភាពអប់រំកាយនៅតាមសាលារៀនចាប់ពីបឋមដល់វិទ្យាល័យបានកាន់តែប្រសើរឡើង។
ចំណែកលោកគ្រូ អ្នកគ្រូ និងតំណាងការរិយាល័យកីឡា មកពីខេត្តគោលដៅ បានវាយតម្លៃចំពោះសិក្ខាសាលាស្ថិតនៅក្នុងគម្រោងអប់រំកាយសម្រាប់ទាំងអស់គ្នារបស់អង្គការបេះដូងមាស ដែលពួកគាត់បានចូលរួមរហូតដល់ថ្ងៃបញ្ចប់គម្រោង៥ឆ្នាំនេះ ពិតជាមានសារៈសំខាន់ណាស់ ព្រោះសិក្ខាសាលាបានបណ្តុះបណ្តាលអំពីការវាយតម្លៃផែនការកិច្ចតែងការដែលជាការអនុវត្តក្នុងការបង្រៀនមុខវិជ្ជាអប់រំកាយបែបថ្មី ។ជាមុខវិជ្ជាផ្តល់សារៈប្រយោជន៍ដល់សិស្សទៅលើសុខភាព ប្រាជ្ញាស្មារតី និងអាចឱ្យសិស្សមានមូលដ្ឋានគ្រឹះផ្នែកកីឡា។
សូមជម្រាបថា គម្រោងកីឡាដើម្បីទាំងអស់គ្នា បង្កើតឡើងដោយអង្គកា របេះដូងមាសនេះ ចាប់តាំងពីខែមីនា ២០២១ ដល់ខែមករា ២០២៥ បានបង្កើតមុខវិជ្ជាអប់រំកាយបែបថ្មី ដែលបានរួមបញ្ចូលនូវកីឡាជាច្រើនប្រភេទ ដែលអាចឱ្យសិស្សានុសិស្សទទួលបានមូលដ្ឋានគ្រឹះកីឡាចាប់ពី ថ្នាក់បឋម សិក្សារហូតដល់ថ្នាក់វិទ្យាល័យ ហើយកីឡានៅក្នុងមុខវិជ្ជាអប់រំកាយបែបថ្មីនេះ ក៏ជាផ្នែកមួយបណ្តុះឧបនិស្ស័យឱ្យសិស្សានុសិស្សចាប់យកជំនាញកីឡាមួយអភិវឌ្ឍខ្លួនក្លាយជាកីឡាអាជីពនាពេលអនាគតទៀតផង ។
ក្នុងគម្រោងរយៈពេល៥ឆ្នាំ បានបណ្តុះបណ្តាលដល់គ្រូៗនិងការិយាល័យ នៃមន្ទីរអប់រំយុវជននិងកីឡា រាជធានី ខេត្តគោលដៅចំនួន៣មាន ខេត្តបាត់ដំបង ស្វាយរៀង និងរាជធានីភ្នំពេញ៕
ថតដោយ៖ ជីម ភារ៉ា
អត្ថបទ៖ជាវ ចន្ធូ
