(រតនគិរី)៖ ឯកឧត្តម ញ៉ែម សំអឿន អភិបាលខេត្តរតនគិរី បានថ្លែងនូវការ​កោត​សរសើរ និងវាយតម្លៃខ្ពស់ចំពោះ ឯកឧត្តម លោកជំទាវ អស់លោក លោកស្រី ដែលជាថ្នាក់ដឹកនាំមន្ទីរ អង្គភាព និងមន្ត្រីរាជការ គ្រប់លំដាប់ថ្នាក់ ដែលបានចូលរួមចំណែកយ៉ាងសកម្មក្នុងកិច្ចការងារអភិវឌ្ឍន៍ខេត្ត និងកិច្ច​សហការគាំទ្រ ដល់រដ្ឋបាលខេត្ត ក្នុងការបំពេញបេសកកម្មបម្រើជាតិ មាតុ​ភូមិ និងប្រជាជន រហូតសម្រេចបានលទ្ធផល នានាជាច្រើនគួរជាទីមោទនៈ ដែលបានធ្វើឱ្យខេត្តរតនគិរីមានការរីកចម្រើនជាលំដាប់ ប្រជាពលរដ្ឋ មាន​ការរីករាយបានទទួលផ្លែផ្កាពីសន្តិភាព និងការអភិវឌ្ឍ ព្រមទាំងដោះស្រាយ​បាននូវបញ្ហាប្រឈម និងសំណូមពរចាំបាច់នានា ស្របតាមគោលនយោ
បាយដ៏ត្រឹមត្រូវរបស់រាជរដ្ឋាភិបាលកម្ពុជា។

ការថ្លែងកោតសរសើរនេះធ្វើឡើងក្នុងឱកាសដែល ឯកឧត្តម អញ្ជើញជា
អធិបតីក្នុងសន្និបាតបូកសរុបលទ្ធផលការងារប្រចាំឆ្នាំ២០២៤ និងលើក​ទិសដៅអនុវត្តឆ្នាំ២០២៥ ដែលបានប្រារព្ធធ្វើឡើងនៅសាលប្រជុំ​អគារ D សាលាខេត្ត ព្រឹកថ្ងៃទី១៦ ខែមករា ឆ្នាំ២០២៥។

សន្និបាតនេះធ្វឡើងក្នុងគោលបំណង៖

១.ឆ្លុះបញ្ចាំងអំពីលទ្ធផល នៃការអនុវត្តតួនាទី ភារកិច្ចរបស់រដ្ឋបាលខេត្ត ក្នុងនាមតំណាងក្រសួង ស្ថាប័ននៃរាជរដ្ឋាភិបាល ក្នុងការថែរក្សាសន្តិភាព សុវត្ថិភាព ស្ថិរភាពនយោបាយ និងសន្តិសុខសណ្តាប់ ធ្នាប់សាធារណៈ ជាពិសេសការផ្តល់សេវារដ្ឋបាល សេវាសាធារណៈនានាជូនប្រជាពលរដ្ឋ​នៅមូលដ្ឋាន។

២.ផ្សព្វផ្សាយសមិទ្ធផលនានាដែលរដ្ឋបាលខេត្ត ក្រុង ស្រុក ឃុំ សង្កាត់ និង​មន្ទីរ អង្គភាពពាក់ព័ន្ធសម្រេចបានក្នុងឆ្នាំកន្លងមក ក្នុងការអនុវត្ត​កម្ម​វិធីន​យោ​បាយយុទ្ធសាស្ត្របញ្ចកោណដំណាក់កាលទី១ របស់រាជរដ្ឋភិបាល សម្រាប់​នីតិកាលទី៧ នៃរដ្ឋសភា។

៣.ធានាឱ្យមានការចូលរួមពីគ្រប់ភាគីពាក់ព័ន្ធនានាក្នុងដំណើរការអភិវឌ្ឍន៍ខេត្ត។

៤.ស្វែងរកដំណោះស្រាយចំពោះបញ្ហាប្រឈមនានា ដែលកើតមានឡើង​ពាក់ព័ន្ធនឹងការអនុវត្តតួនាទី ភារកិច្ចរបស់រដ្ឋបាលគ្រប់លំដាប់ថ្នាក់។

៥.លើកទិសដៅអនុវត្តការងារសំខាន់ៗរបស់រដ្ឋបាលខេត្ត ដើម្បីផ្សារភ្ជាប់នឹង​កម្មវិធីគោលនយោបាយ យុទ្ធសាស្ត្របញ្ចកោណដំណាក់កាលទី១ របស់​រាជ​រដ្ឋា​ភិបាលកម្ពុជា និងផែនការយុទ្ធសាស្ត្រអភិវឌ្ឍន៍ជាតិ ជាពិសេសជំរុញ​ផែន​ការក្នុងការនាំឆ្ពោះទៅសម្រេចបានជាប្រទេសមានចំណូលខ្ពស់នាឆ្នាំ២០៥០។

សូមបញ្ជាក់ថា សន្និបាតដំណើរការទៅរយៈពេល១ ថ្ងៃកន្លះ ហើយនឹង​ត្រូវប្រារព្ធបិទព្រឹកថ្ងៃទី១៧ ខែមករា ឆ្នាំ២០២៥ នេះ ៕

ដោយ ៖ គតិ យុត្ត