សម្តេចកិត្តិព្រឹទ្ធបណ្ឌិត ចាត់តំណាង ចូលរួមរំលែកមរណទុក្ខក្រុមគ្រួសារសព មន្ត្រីអង្គភាពស៊ីម៉ាក់ ក្នុងឧបទ្ទវហេតុផ្ទុះមីនតោនស្លាប់ នៅខេត្តឧត្តរមានជ័យ
(ខេត្តឧត្តរមានជ័យ)៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅថ្ងៃសៅរ៍ ទី១៨ ខែមករា ឆ្នាំ២០២៥ បានបន្តចាត់ឯកឧត្តម យូ ឡាណា អគ្គលេខាធិការរងទី២ កាកបាទក្រហមកម្ពុជា និងមានការចូលរួមពីក្រុមប្រតិបត្តិសាខាកាកបាទក្រហមកម្ពុជាខេត្តបាត់ដំបង និងអនុសាខាកាកបាទក្រហមកម្ពុជាស្រុកបាណន់ ចូលរួមរំលែកមរណទុក្ខដ៏ក្រៀមក្រំបំផុតជាមួយក្រុមគ្រួសារសព លោក អឿន ចាន់ដារ៉ា មន្ត្រីអង្គភាពស៊ីម៉ាក់ ( CMAC ) ដែលបានពលីជីវិតក្នុងឧបទ្ទវហេតុផ្ទុះមីនតោនខណៈពេលកំពុងបំពេញការងារខេត្តឧត្តរមានជ័យ ហើយបាននិងកំពុងរៀបចំធ្វើបុណ្យតាមប្រពៃណីនៅលំនៅដ្ឋាន ក្នុងភូមិស្នឹងកើត ឃុំស្នឹង ស្រុកបាណន់ ខេត្តបាត់ដំបង ។
ស្ថិតក្នុងសមានទុក្ខដ៏ក្រៀមក្រំសោកសង្រេងជាទីបំផុតជាមួយក្រុមគ្រួសារក្នុងឱកាសចូលរួមក្នុងពិធីបុណ្យសពនេះ ឯកឧត្តម យូ ឡាណា បានមានប្រសាសន៍ថា ៖ មរណភាពរបស់ លោក អឿន ចាន់ដារ៉ា គឺជាការបាត់បង់កូនជាទីស្រឡាញ់ ញាតិមិត្ត និងជាពលរដ្ឋដ៏ល្អមួយរូបរបស់សង្គមជាតិ ដែលតែងតែប្រកាន់យ៉ាងខ្ជាប់ខ្ជួននូវកតញ្ញូតាធម៌ និងប្រតិបត្តិតាមគន្លងធម៌ចំពោះ ឪពុក ម្តាយ និងក្រុមគ្រួសារ នេះជាការបាត់បង់វីរយុទ្ធជនរបស់អង្គភាពស៊ីម៉ាក់ (CMAC) ប្រចាំទិសឧត្តរមានជ័យមួយរូប ដែលបានខិតខំបំពេញភារកិច្ចប្រកបដោយសេចក្តីមោះមុត អង់អាចក្លាហាន រហូតពលីជីវិត ក្នុងបុព្វហេតុសេចក្តីសុខក្សេមក្សាន្តរបស់ប្រទេសជាតិ មាតុភូមិ ក្រោមម្លប់សន្តិភាពពេញបរិបូរណ៍។ ទោះបីរូបកាយរបស់ លោក អឿន ចាន់ដារ៉ា បានលាចាកទៅមែនពិត ប៉ុន្តែអំពើជាកុសល សេចក្តីថ្លៃថ្នូរ គុណធម៌នឹងស្ថិតនៅក្នុងក្តីចងចាំរបស់លោក លោកស្រី និងក្រុមគ្រួសារ ព្រមទាំងមិត្តភក្តិ ញាតិសន្តានទាំងអស់ ជានិច្ចនិរន្តរ៍។
ក្រុមគ្រួសារសពក្រៅពីគោរពថ្លែងអំណរគុណ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានចាត់តំណាងមកចូលរួមរំលែកមរណទុក្ខ ព្រមជាមួយថវិកា២០លានរៀល និងគ្រឿងឧបភោគបរិភោគមួយចំនួនទៀតក្នុងពេលដ៏សោកសង្រេងនៅពេលនេះ ក៏បានគោរពជូនពរសម្តេចកិត្តិព្រឹទ្ធបណ្ឌិត សូមមានសុខភាពល្អបរិបូណ៌ កម្លាំងពលំមាំមួន និងជន្មាយុយឺនយូរ ។
ហើយពិធីបុណ្យសព លោក ពៅ ណេពីន ក៏ត្រូវបានទទួលការយកចិត្តទុកដាក់ គិតគូរនិងចូលរួមរំលែកមរណទុក្ខព្រមជាមួយថវិកា ២០លានរៀល និងគ្រឿងឧបភោគបរិភោគមួយចំនួនពីសម្តេចកិត្តិព្រឹទ្ធបណ្ឌិត តាមរយះការចាត់ឯកឧត្តម យូ ឡាណា អគ្គលេខាធិការរងទី២ កាកបាទក្រហមកម្ពុជា ចូលរួមផ្ទាល់ដល់ទីរៀបចំពិធីបុណ្យសពផ្ទាល់នៅភូមិចំការគរ ឃុំស្វាយចេក ស្រុកស្វាយចេកខេត្តបន្ទាយមានជ័យ នាថ្ងៃទី១៦ ខែមករា ឆ្នាំ២០២៥ផងដែរ ៕
ដោយ / គ្រី សម្បត្តិ
