សម្តេចធិបតី ហ៊ុន ម៉ាណែត ៖ ការយកចិត្តទុកចំពោះអតីតយុទ្ធជន គឺផ្ដោតលើចំណុចសំខាន់ពីរ
(ពោធ៌សាត់)៖ ក្នុងពិធីសម្ពោធដាក់ឱ្យប្រើប្រាស់ សមិទ្ធផលនានានៅក្នុងភូមិប៊ុនរ៉ានីសែនជ័យដំណាក់ត្រយឹង ឃុំព្រងិល ស្រុកភ្នំក្រវាញ ខេត្តពោធិ៍សាត់ នាព្រឹកថ្ងៃទី២០ ខែមករា ឆ្នាំ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានគូសបញ្ជាក់ថា ការយកចិត្តទុកជាសំខាន់ចំពោះអតីតយុទ្ធជន គឺផ្ដោតការយកចិត្តទុកដាក់សំខាន់ ២ចំណុចជាប្រចាំ ក្នុងនោះមាន៖
ទី១ គឺជីវភាពរបស់អតីតយុទ្ធជន តាមរយៈការដំឡើងប្រាក់ខែ និងប្រាក់ឧបត្ថម្ភនានាទៅតាមកម្រិតនៃការរីកចម្រើនរបស់សេដ្ឋកិច្ចជាតិ ដូចមន្ត្រីរាជការទូទៅដែរ រួមទាំងការផ្ដល់សេវាព្យាបាល និងសេវាតម្រូវការនានាជាច្រើនទៀត។ ការយកចិត្តទុកដាក់ទី២ គឺកិត្តិយស តាមរយៈការកំណត់យកថ្ងៃទី២១ មិថុនា ដើម្បីប្រារព្ធទិវាអតីតយុទ្ធជនជារៀងរាល់ឆ្នាំ ។
សម្តេចធិបតី ហ៊ុន ម៉ាណែត បានបន្តថា រាជរដ្ឋាភិបាល មិនដែលទុកបងប្អូនអតីតយុទ្ធជនចោលឡើយរាប់ចាប់តាំងពីកម្ពុជាងើបចេញមកពីបាតដៃទទេរហូតមកដល់ពេលនេះ គឺរាជរដ្ឋាភិបាលតែងតែគិតរឿងពីរយ៉ាងដល់បងប្អូនអតីតយុទ្ធជន ក្នុងនោះគឺជីវភាព និងកិត្តិយស ទៅដល់បងប្អូនអតីតយុទ្ធជន ។
សម្តេចធិបតី ក៏បានអះអាងជាថ្មីម្តងទៀតថា រាជរដ្ឋាភិបាលកម្ពុជាដឹកនាំដោយគណបក្សប្រជាជនកម្ពុជា នឹងធ្វើឲ្យប្រទេសមានការរីកចម្រើនពីមួយឆ្នាំទៅមួយឆ្នាំ ជាក់ស្តែងដូច ភូមិប៊ុនរ៉ានីសែនជ័យ ដំណាក់ទ្រយឹងយ៉ាងដូច្នេះដែរ បានប្រែក្លាយពីតំបន់គ្មានមនុស្សនៅ តំបន់សង្រ្គាម មកជាតំបន់មានមនុស្សច្រើនមានមន្ទីរពេទ្យ មានសាលារៀន និងផ្លូវថ្នល់ជាដើម ។
សម្តេចនាយករដ្ឋមន្ត្រី បានថ្លែងដោយសង្កត់ធ្ងន់ថា តើយើងអាចអភិវឌ្ឍប្រទេសជាតិបានទេ បើគ្មានសន្តិភាព? បើសិនជាយើងមិនឈប់បាញ់គ្នា នៅឆ្នាំ១៩៩៨ ទេនោះប្រទេសកម្ពុជា បន្តមានសង្រ្គាមប្រយុទ្ធគ្នារហូតដល់សព្វថ្ងៃនេះ ហើយយើងមិនអាចទទួលបានសុខសន្តិភាពពេញលេញបានឡើយ ។
សម្តេចធិបតី ហ៊ុន ម៉ាណែត បានថ្លែងបន្ថែមថា បើសិនជាកម្ពុជា នៅបន្តមានសង្រ្គាមនោះ អតីតយុទ្ធជនក៏ដូចជាប្រជាពលរដ្ឋខ្មែរយើង នឹងបន្តរងគ្រោះបាត់បង់អាយុជីវិតដោយសារសង្រ្គាមជាក់ជាមិនខាន ពោល គឺយើងមិនអាចមានឱកាសក្នុងការអភិវឌ្ឍតំបន់សមរភូមិ ដែលធ្លាប់ប្រយុទ្ធគ្នាទៅជាកន្លែងដែលមានការអភវិឌ្ឍ មានហេដ្ឋារចនាសម្ព័ន្ធបានឡើយ ។
សម្តេចធិបតី បានបញ្ជាក់ថា ផ្លែផ្កានៃសន្តិភាព បានប្រែក្លាយតំបន់ដែលគ្មានមនុស្សរស់នៅ និងពីអតីតយុទ្ធជន ដែលមានហានិភ័យ ទៅជាតំបន់ដែលមានការអភិឌ្ឍ ពោល គឺជួយឱ្យអតីតយុទ្ធជនអាចកែប្រែជីវិតថ្មីប្រកបដោយសេចក្តីសង្ឃឹមចំពោះអនាគត ៕
អត្ថបទ៖ វណ្ណលុក
រូបភាព៖ វ៉េង លីមហួត និង សួង ពិសិដ្ឋ
