អភិបាលខេត្តកែប រំលឹកមន្រ្តីមន្ទីរអប់រំ និងអ្នកពាក់ព័ន្ធបន្តពិនិត្យគុណភាពចំណីអាហារគ្រប់សាលារៀន
កែប៖ ការការពារសុខភាពកុមារ ឱ្យមានការលូតលាស់ល្អជារឿងចាំបាច់ដែលអ្នកពាក់ព័ន្ធត្រូវគិតគូរ ក្នុងដំណាក់កាលដំបូងនៃការចូលរៀនរបស់កុមារ ដែលត្រូវយកចិត្តទុកដាក់ ក្រៅពីបំពាក់បំប៉ននូវចំណេះដឹងដល់ពួកគេ បញ្ហាសុខភាពរឹតតែសំខាន់ថែមទៀត ។ដូចនេះមន្រ្តីនៃមន្ទីរអប់រំ និងអាជ្ញាធរដែនដី ត្រូវបន្តត្រួតពិនិត្យការលក់ដូរចំណីអាហារទាំងក្នុង និងក្រៅសាលា ជាពិសេសហាមដាច់ខាតការលក់ភេសជ្ជៈផ្អែមដល់កុមារតែម្តង។
នេះជាការលើកឡើងរបស់ឯកឧត្តមបណ្ឌិត សោម ពិសិដ្ឋអភិបាលខេត្តកែប ក្នុងពិធីបើកសន្និបាតបូកសរុបវាយតម្លៃការងារមន្ទីរអប់រំ យុវជន និងកីឡាខេត្តកែប ឆ្នាំ២០២៣-២០២៤ និងលើកទិសដៅបន្តឆ្នាំ២០២៤-២០២៥ នៅសាលប្រជុំមន្ទីរ កាលពីថ្ងៃទី២១ ខែមករា ឆ្នាំ២០២៥នេះ។
ឯកឧត្តមបានរំលឹកក្នុងឱកាសបើកកិច្ចប្រជុំដំបូងរបស់គណៈរដ្ឋមន្រ្តី អាណត្តិទី៧នៃរដ្ឋសភា សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជាបានដាក់ចេញនូវវិធានការគន្លឺះ៤ ក្នុងគោលដៅពង្រឹងគុណភាពគ្រឹះស្ថានសិក្សារដ្ឋចាប់ពីមត្តេយ្យសិក្សាដល់មធ្យមសិក្សា ។ក្នុងនោះចំណុចទី៣ គឺការយកចិត្តទុកដាក់ដល់សុខភាពរបស់សិស្ស តាមរយៈកម្មវិធីអាហារូបត្ថម្ភដល់កុមារនិងការត្រួតពិនិត្យគុណភាពចំណីអាហារនៅតាមសាលារៀន។
យោងរបាយការណ៍របស់ លោក ងួន ច័ន្ទសុជាតា ប្រធានមន្ទីអប់រំ យុវជន និងកីឡាខេត្តកែប បានឱ្យដឹងថា ឆ្នាំសិក្សា២០២៣-២០២៤ នៅទូទាំងខេត្ត មានថ្នាក់មត្តេយ្យចំនួន ២៥កន្លែង និងថ្នាក់រៀនសរុបចំនួន ៥៨ថ្នាក់ ទទួលបានកុមារអាយុ៣ឆ្នាំ ដល់៥ឆ្នាំឱ្យទទួលសេវាអប់រំកុមារតូចគ្រប់រូបភាពសរុបចំនួន ១ ៦០៨នាក់ (ស្រី៧៥០នាក់)។ កុមារអាយុ ៣ឆ្នាំ បានចូលរៀន មាន១៦,៦៧ភាគរយ ,កុមារអាយុ ៤ឆ្នាំ បានចូលរៀនមាន ៦៣,៣៣ភាគរយ និងកុមារអាយុ៥ឆ្នាំ ចូលរៀនមាន ៧៧,១២ភាគរយ ក្នុងនោះកុមារអាយុ៥ឆ្នាំ បានចូលរៀនថ្នាក់ទី១ សរុបចំនួន ៦៨៦នាក់ (ស្រី ៣៣០នាក់) ស្មើនឹង ១០០ភាគរយ៕
ដោយ៖ សិលា សារិន
