សៀមរាប៖គណបក្សប្រជាជនកម្ពុជាក្រុងសៀមរាប ខេត្តសៀមរាបកាលពី​ថ្ងៃ​ទី២២ ខែមករា ឆ្នាំ២០២៥​បាន​ប្រជុំបូក​សរុបលទ្ធផលការងារបក្ស​ប្រចាំឆ្នាំ​២០២៤និងលើកទិសដៅអនុវត្តបន្តឆ្នាំ២០២៥ ក្រោមការអញ្ជើញចូល​រួមពី​ឯកឧត្តម ឥត សារ៉ាត់ សមាជិកគណៈអចិន្ត្រៃយ៍នៃគណៈកម្មាធិការ​កណ្តាល​គណបក្សប្រជាជនកម្ពុជា និងជាប្រធានក្រុម​ការងារ​គណបក្ស​ចុះជួយក្រុង​សៀមរាប ឧញ៉ា សៀង ណាំ តំណាងរាស្រ្តមណ្ឌលខេត្តសៀមរាប លោក នួន ពុទ្ធារ៉ា ប្រធានគណៈ​កម្មាធិការ​គណបក្សក្រុងសៀមរាប ។

ក្នុងកិច្ចប្រជុំនៅសាលប្រជុំគណបក្សខេត្តសៀមរាបឯកឧត្តម ឥត សារ៉ាត់ បាននាំនូវសេចក្តីនឹករលឹក និងការផ្តាំផ្ញើសាក​សួរសុខទុក្ខរបស់ សម្តេចអគ្គមហា សេនាបតីតេជោ ហ៊ុន សែន ប្រធានគណបក្សប្រជាជនកម្ពុជា, សម្តេចមហា​បវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា សម្តេចពិជ័យ​សេនា ទៀ បាញ់ អនុប្រធានគណបក្សប្រជាជនកម្ពុជា និងជាប្រធានក្រុម​ការងារគណបក្សចុះជួយខេត្តសៀមរាប, ឯកឧត្តម ទៀ សីហា សមាជិកគណៈ​អចិន្ត្រៃយ៍ នៃគណៈ​កម្មាធិការកណ្តាលគណបក្សប្រជាជនកម្ពុជា និងជាអនុប្រធានក្រុមការងារគណបក្សចុះជួយខេត្តសៀមរាប ជូនចំពោះ​សមាជិក សមាជិការ គណបក្សប្រជាជនកម្ពុជា ក្នុងក្រុងសៀមរាប ។

ឯកឧត្តម ឥត សារ៉ាត់ បានវាយតម្លៃខ្ពស់ចំពោះលទ្ធផលដ៏ល្អ​ប្រសើរ​នៅឆ្នាំ២០២៥ និងផ្តល់នូវទិសដៅការងារដែលត្រូវអនុវត្ត​បន្ត ក្នុងនោះត្រូវយកចិត្តទុកដាក់ជាចម្បងលើការងារ​អប់រំសតិអារម្មណ៍​ឱ្យប្រជាពលរដ្ឋ​ចូលរួមអនុវត្តរាល់​គោល​នយោបាយ​របស់គណបក្ស​និងការដឹកនាំរបស់រាជរដ្ឋាភិបាលដែលមាន សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

ក្នុងឱកាសនេះឯកឧត្តម ឥត សារ៉ាត់ បានប្រគល់កុំព្យូទ័រចំនួន ១៣ គ្រឿងជូនដល់ចៅសង្កាត់ទាំង១២ សម្រាប់ទុក​បម្រើការងាររដ្ឋបាល បម្រើសេវាសាធារណៈជូនប្រជាពលរដ្ឋ៕
ដោយ៖ ប៊ុន រដ្ឋា