បន្ទាយមានជ័យ៖កសិករដែលជាម្ចាស់ដំណាំស្រូវប្រាំងជាងមួយម៉ឺន​ហិកតា​នៅស្រុកព្រះនេតព្រះ និងស្រុកភ្នំស្រុក​ខេត្ត​បន្ទាយមានជ័យបានធូរចិត្តជាងមុន បន្ទាប់ពីដំណាំស្រូវរបស់ពួកគាត់ដែលកំពុងខ្វះទឹក ត្រូវបានជួយសង្គ្រោះដោយ មន្ត្រីនៃមន្ទីរធនធានទឹក និងឧតុនិយមខេត្តបន្ទាយមានជ័យ ។

ជាការពិនិត្យជាក់ស្តែង និងលើកទឹកដល់មន្រ្តីជំនាញ ក៏ដូចជាកសិករ ឯកឧត្តម អ៊ុ រាត្រី អភិបាលខេត្តបន្ទាយមានជ័យ បានអញ្ជើញទៅកាន់វាលស្រែប្រាំងដែល​ត្រូវបានជួយសង្រ្គោះ ។នៅទីនោះឯកឧត្តមអភិបាលខេត្តបានលើកឡើងថា ស្រូវ ប្រាំងរបស់ប្រជាកសិករដែលកំពុងប្រឈមខ្វះខាតទឹកបានកើតឡើងនៅក្នុងស្រុកមង្គលបូរី​ ស្រុកស្វាយចេក​ និងស្រុកព្រះ​នេត្រព្រះ​។លោកបន្តថា តាមការ​ពិនិត្យនៅតាមតំបន់ទាំងបីខាងលើ ស្រុកមង្គលបូរី និងស្រុកស្វាយចេក ដំណាំ​ស្រូវភាគ​ច្រើនពុំមានការប្រឈមធ្ងន់ធ្ងរទេ ។ចំណែកស្រូវប្រាំងនៅភ្នំស្រុក និង​ស្រុកព្រះនេតព្រះ ដែលជួបកង្វះទឹកត្រូវបានបើក​ទ្វារទឹកនាំយកទឹកទៅជួយ​ស្រោចស្រពដើម្បីសង្គ្រោះពីការប្រឈមកង្វះនេះហើយ។

ឯកឧត្តមអភិបាលខេត្តបានជំរុញអាជ្ញាធរមូលដ្ឋាន និងមន្ត្រីកសិកម្ម សហគមន៍​ប្រើប្រាស់ទឹកតាមឃុំនីមួយៗរបស់​ស្រុក​បន្តចុះពិនិត្យមើលនូវការងារបង្ក​បង្កើន​ផលស្រូវប្រាំងរបស់ប្រជាកសិករជាប្រចាំ ។

ទាក់ទងនឹងការសង្រ្គោះស្រូវប្រាំងនេះដែរ លោក យឹម ប៊ុនរ៉ុម ប្រធានមន្ទីរ​ធនធានទឹកនិងឧតុនិយមខេត្តបន្ទាយមានជ័យ បានបញ្ជាក់ថា មន្ត្រីបច្ចេក​ទេសនៃមន្ទីរធនធានទឹក និងសហគមន៍ប្រើប្រាស់ទឹក បានបើកទ្វារទឹក​អាងត្រពាំងថ្ម ស្រុកភ្នំស្រុក នាំយកទឹកតាមប្រឡាយមេទៅជួយ​ស្រោចស្រព​ស្រូវប្រាំងរបស់ប្រជាកសិករនៅស្រុកព្រះនេតព្រះ និងស្រុកភ្នំស្រុកដែល​មានចំងាយ៣៨គីឡូម៉ែត្រ។ សរុបស្រូវប្រាំងចំនួន ១៤ ៣០០ ហិកតា ត្រូវ​បានជួយសង្គ្រោះរួចផុតពីការខ្វះទឹក។

ក្នុងឱកាសថ្នាក់ដឹកនាំខេត្ត និងមន្ត្រីមន្ទីរធនធានទឹក អាជ្ញារធរមូលដ្ឋាន សហគមន៍ប្រើប្រាស់ទឹក ចុះអន្តរាគមន៍​សង្គ្រោះ​ស្រូវកាលពីថ្ងៃទី២៣ ខែមករា ឆ្នាំ២០២៥នេះ តំណាងកសិករបានបង្ហាញនូវក្តីរំភើបរីករាយ​និងអរគុណដល់​ថ្នាក់ដឹកនាំ​ក្រសួងធនធានទឹកនិងឧតុនិយម ឯកឧត្តមអភិបាលខេត្ត និងថ្នាក់​ដឹកនាំមន្ទីរធនធានទឹក ដែលបានជួយសង្គ្រោះស្រូវប្រាំង​របស់​ពួកគាត់បាន​ទាន់វេលា ៕
ដោយ៖ គៀនច័ន្ទហ៊ីន