(ភ្នំពេញ)៖ គិតត្រឹមថ្ងៃទី ២៥ ខែមករា នេះ គឺនៅសល់តែ១១ថ្ងៃទៀតប៉ុណ្ណោះ ការទទួលចុះឈ្មោះ ចូលរួមក្នុងព្រឹត្តិការណ៍ ទិវារត់ប្រណាំងស្ដ្រីចម្ងាយ ១០គីឡូម៉ែត្រ (Women Run 10K) លើកទី៤ ឆ្នាំ២០២៥ នឹងបិទបញ្ចប់ជាផ្លូវការហើយ ពោលគឺនៅថ្ងៃទី៥ ខែកុម្ភៈ ខាងមុននេះ ។ ខណៈដែលការប្រកួតនឹងចាប់ផ្ដើមជាផ្លូវការ នាព្រឹកថ្ងៃទី ៨ ខែមីនា នៅសួនច្បារមុខវត្តបទុមវតី រាជធានីភ្នំពេញ។

ការរៀបចំនេះ គឺគោរពតាមគោលការណ៍របស់គណៈកម្មាធិការអូឡាំពិកអន្ដរជាតិ (IOC) ដែលបានជំរុញឲ្យបណ្ដាប្រទេសសមាជិក ជួយរៀបចំទិវាស្ដ្រី និងកីឡា ឲ្យបានច្រើន ពិសេសជំរុញ និងលើកទឹកចិត្តឲ្យស្ដ្រីចូលរួមដឹកនាំ និងសកម្មភាពកីឡាពីដែលស្របទៅនឹងអ្វីដែលរាជរដ្ឋាភិបាលកម្ពុជា កំពុងយកចិត្តទុកដាក់ ហើយក្រសួងអប់រំ យុវជន និងកីឡា និងគណៈកម្មាធិការជាតិអូឡាំពិកកម្ពុជា (NOCC) ក៏កំពុងជំរុញ និងលើកកម្ពស់សុខុមាលភាពប្រជាពលរដ្ឋ តាមរយៈការលេងកីឡានេះផងដែរ។

ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) បានមានប្រសាសន៍ថា៖ «ការចូលរួមរបស់បងប្អូនប្រជាពលរដ្ឋ គឺបង្ហាញអំពីការយកចិត្តទុកដាក់លើបញ្ហាសុខភាពសាធារណៈ ក៏ដូចជាការបញ្ហាសុខភាពផ្ទាល់ខ្លួន។ ដូច្នេះកាលដែលយើងខិតខំប្រឹងប្រែងនេះ គឺអត់មានអ្វីក្រៅពីជួយដល់សង្គមជាតិ ជួយដល់ការរស់នៅប្រកបដោយគុណភាពជីវិតរបស់មនុស្សម្នាក់ៗនោះទេ ព្រោះកាលណាយើងធ្វើសកម្មភាពកីឡា ពិសេសការរត់ប្រណាំងនេះ គឺធ្វើឲ្យយើងសមត្ថភាព គុណភាព និងសុខភាពល្អ។ អ៊ីចឹងអ្នកចូលរួមនឹងទទួលបាននូវអត្ថប្រយោជន៍សម្រាប់ជីវិតរបស់ពួកគាត់ពិតប្រាកដ»។

សូមបញ្ជាក់ថា ទិវារត់ប្រណាំងបែបកម្សាន្ដ និងសុខភាពនេះ នឹងត្រូវចេញដំណើរ នាព្រឹកព្រលឹមថ្ងៃទី០៨ ខែមីនា ឆ្នាំ២០២៥ នៅបរិវេណមុខវត្តបទុមវតី ជាមួយការប្រកួត ២វិញ្ញាសា គឺរត់ចម្ងាយ ១០គីឡូម៉ែត្រ និង ៤គីឡូម៉ែត្រ ដោយមានគាំទ្រពេញទំហឹងពីរដ្ឋបាលរាជធានីភ្នំពេញ និងអាជ្ញាធរពាក់ព័ន្ធ។ កម្មវិធីនេះដែរ រៀបចំឡើងក៏ដើម្បីអបអរសាទរទិវាសិទ្ធិនារីអន្ដរជាតិ ៨មីនា និងចូលរួមលើកតម្កើងសិទ្ធិ និងតួនាទីរបស់ស្ដ្រី ក្នុងគ្រួសារ ក្នុងវិស័យកីឡា និងសង្គមជាតិផងដែរ៕