បិទបញ្ចប់ការស្តារពង្រីកផ្លូវកៅស៊ូប្រវែង៥គីឡូម៉ែត្រ លើកំណាត់ផ្លូវខេត្តទៅកាន់ប្រាសាទបាណន់
បាត់ដំបង៖ក្រុមការងារវិស្វកម្មនៃមន្ទីរសាធារណការ និងដឹកជញ្ជូនខេត្តបាត់ដំបង បានបិទបញ្ចប់ការកែលម្អស្តារពង្រីកតួផ្លូវបន្ថែមកំណាត់ផ្លូវខេត្តលេខ១៥៧១ជំហានទី១ ប្រវែង៥គីឡូម៉ែត្រ ក្នុងខែមករាឆ្នាំ២០២៥នេះ។
កំណាត់ផ្លូវខេត្តលេខ១៥៧១ ពីចំណុចភ្លើងស្តុបផ្លូវវាងក្រុងឆ្ពោះទៅកាន់តំបន់ទេសចរណ៍មានសក្តានុពលនានា និងប្រាសាទបាណន់ ខេត្តបាត់ដំបងមានប្រវែងជិត២០គីឡូម៉ែត្រ ។កាលពីខែកញ្ញា ឆ្នាំ២០២៤កន្លងទៅក្រុមការងារវិស្វកម្មនៃមន្ទីរសាធារណការនិងដឹកជញ្ជូនខេត្តបាត់ដំបង បានអនុវត្តគម្រោងកែលម្អស្តារពង្រីកលើតួផ្លូវបន្ថែមទំហំ១០ម៉ែត្រ ដោយចាក់ក្រាលកៅស៊ូពីរជាន់(DBST)ប្រវែងជិត៥គីឡូម៉ែត្រ មានគូសគំនូសខ័ណ្ឌចែកទ្រូងផ្លូវ២គន្លងទៅ-មកនិងគន្លងផ្លូវយានជំនិះម៉ូតូនៅសងខាងផ្លូវ ។ក្រោយគូសគំនូសនៅលើទ្រូងផ្លូវរួចរាល់ និងត្រូវបិទបញ្ចប់ការសាងសង់ជំហានទី១របស់ខ្លួន ក្នុងខែមករា ឆ្នាំ២០២៥នេះ។
លោក ព្រួញ រិទ្ធថា ប្រធានមន្ទីរសាធារណការ និងដឹកជញ្ជូនខេត្តបាត់ដំបង បានឱ្យដឹងថា ការងារសាងសង់កែលម្អស្តារនិងពង្រីកផ្លូវដ៏មានសារៈសំខាន់នេះ បានផ្តល់នូវអត្ថប្រយោជន៍ច្រើនក្នុងវិស័យទេសចរណ៍ វិស័យដឹកជញ្ជូនសព្វសារពើនិងជួយសម្រួលដល់ការធ្វើចរាចរយានជំនិះគ្រប់ប្រភេទ។ការដ្ឋាននេះក៏ជួយកាត់បន្ថយគ្រោះថ្នាក់ចរាចរផងដែរ។
ក្នុងឱកាសអញ្ជើញពិនិត្យវឌ្ឍនភាពនៃការដ្ឋានក្នុងសប្ដាហ៍នេះលោកប្រធានមន្ទីរសាធារការខេត្តបាត់ដំបងក៏បានអំពាវនាវដល់ប្រជាពលរដ្ឋដែលប្រើប្រាស់ដងផ្លូវមួយនេះសូមបើកបរគោរពច្បាប់ចរាចរណ៍ និងបើកបរដោយការប្រុងប្រយ័ត្ន។
ក្រោយពីបិទបញ្ចប់ជំហានទី១នេះលោក ព្រួញ រិទ្ធថា បញ្ជាក់ថា មន្ទីរនឹងចាប់ផ្តើមការដ្ឋានកែលម្អស្តារពង្រីកតួផ្លូវជំហានទី២បន្តនៅដើមខែកុម្ភៈខាងមុខ លើកំណាត់ដដែលប្រវែង៥គីឡូម៉ែត្របន្ថែមទៀត៕
អត្ថបទ-រូបភាព៖ អ៊ុក សំអាន បប.
