រយៈពេលជាង៦ខែនៃយុទ្ធនាការ «ពន្លកបៃតង»ក្រសួងបរិស្ថានបណ្តុះកូនឈើបានជាង៩សែនដើម
ភ្នំពេញ៖គិតចាប់ពីថ្ងៃទី១៧ ខែកក្កដា ឆ្នាំ២០២៤ ដល់ថ្ងៃទី២៧ ខែមករា ឆ្នាំ២០២៥ ក្រសួងបរិស្ថានបានបន្តបណ្តុះកូនឈើសរុបចំនួន ៩១៣ ២៦៧ ដើម ក្នុងនោះកូនត្នោតចំនួន ៦០៧ ០៣៦ ដើម, កូនឈើព្រៃ ២៨៣ ៩៤២ ដើម និងកូនឈើហូបផ្លែចំនួន ២២ ២៨៩ ដើម ។នេះបើតាមប្រភពក្រសួងបរិស្ថានបញ្ជាក់នៅថ្ងៃទី២៨ ខែមករា ឆ្នាំ២០២៨។
ប្រភពដដែលបានឱ្យដឹងថា កាលពីថ្ងៃទី២៧ ខែមករា ក្រសួងបរិស្ថាន តាមរយៈមន្ទីរបរិស្ថានខេត្តព្រះសីហនុ ខេត្តកំពង់ចាម និងខេត្តកំពត បាននាំកូនឈើដែលបានបណ្តុះសរុបចំនួន ១ ១២៣ ដើម ដើម្បីត្រៀមទុកសម្រាប់ចែកជូនអាជ្ញាធរ និងប្រជាពលរដ្ឋយកទៅដាំនៅតាមមូលដ្ឋានរបស់ខ្លួន។
គួររំលឹកថា ក្រសួងបរិស្ថានបានធ្វើការចែកកូនឈើ ក្នុងឱកាសពិព័រណ៍ផ្សព្វផ្សាយ និងចែកកូនឈើ «ពន្លកបៃតង» កន្លងមកក្នុងគោលបំណងបណ្តុះផ្នត់គំនិត ដល់ប្រជាពលរដ្ឋកម្ពុជាគ្រប់វ័យឱ្យស្រឡាញ់ដើមឈើ។
តាមរយៈយុទ្ធនាការនេះ កូនឈើចម្រុះរាប់ម៉ឺនដើម រួមមានទាំងពូជឈើប្រណិត ពូជឈើលម្អ ឈើហូបផ្លៃ និងពូជឈើព្រៃលិចទឹកនិងកោងកាង ត្រូវបានចែកជូនប្រជាពលរដ្ឋ យកទៅដាំដោយឥតគិតថ្លៃ។យុទ្ធនាការនេះគឺដើម្បីធានាឱ្យបាននូវចីរភាពបរិស្ថាន និងសុក្រឹតកម្មបរិស្ថាន ឆ្លើយតបទៅនឹងការប្រែប្រួលអាកាសធាតុ និងលើកកម្ពស់សេដ្ឋកិច្ចបៃតង សំដៅសម្រេចឱ្យបាននូវគោលដៅយុទ្ធសាស្ត្របញ្ចកោណ ជាប្រទេសអព្យាក្រឹតកាបូន និងមានគម្របព្រៃឈើ៦០ភាគរយ នៅឆ្នាំ២០៥០៕
ដោយ៖ម៉ាដេប៉ូ
