បាត់ដំបង៖គម្រោងស្ថាបនាលូប្រអប់នៅតាមបណ្តោយផ្លូវក្រុងលេខ ៤០៩ ដែលមានមុខកាត់២ម៉ែត្រគុណនឹង២ម៉ែត្រ ប្រវែង៩០០ម៉ែត្រ ស្ថិតនៅក្នុងសង្កាត់ទទួលតាឯក ក្រុងខេត្តបាត់ដំបង បានប្រារព្ធបើកការដ្ឋានកាលពីរសៀលថ្ងៃទី២៩ ខែមករា ឆ្នាំ២០២៥ ក្រោមអធិបតីភាព ឯកឧត្តម សុខ លូ អភិបាលខេត្តបាត់ដំបង ។

នាយកដ្ឋានសាងសង់ និងថែទាំប្រព័ន្ធចម្រោះទឹកកខ្វក់ នៃ អគ្គនាយកដ្ឋានប្រព័ន្ធចម្រោះទឹកកខ្វក់ ក្រសួង
សាធារណ​​ការ​និងដឹកជញ្ជូន សហការជាមួយរដ្ឋបាលខេត្តបាត់ដំបង ដោយមានមន្ទីរសាធារណការ​ខេត្ត ជាមន្ទីរជំនាញ​សហការសម្របសម្រួល បានរៀបចំធ្វើពិធីបើកការដ្ឋាននៃគម្រោងស្ថាបនាលូប្រអប់ នៅតាមបណ្តោយផ្លូវក្រុង លេខ ៤០៩ ដែល​មានមុខកាត់២ម៉ែត្រគុណនឹង២ម៉ែត្រ ប្រវែង៩០០ម៉ែត្រ ស្ថិតនៅក្នុងសង្កាត់ទួលតាឯក ក្រុងខេត្តបាត់​ដំបង។

សំដៅលើការដ្ឋានដែលបានប្រារព្ធបើក លោក ព្រួញ រិទ្ធថា ប្រធានមន្ទីរសាធារណ​​ការនិងដឹកជញ្ជូនខេត្តបាត់ដំបងបានឱ្យ
ដឹងថា គម្រោងស្ថាបនាលូប្រអប់បណ្តោយផ្លូវក្រុងលេខ៤០៩ មានសារៈសំខាន់សម្រាប់រំដោះទឹកចេញពីក្រុង និងជួយ​សម្រួលដល់ការរស់ប្រចាំថ្ងៃរបស់ប្រជាពលរដ្ឋក្នុងតំបន់នេះ។ ព្រោះថាបើតំបន់យើងរស់នៅប្រចាំថ្ងៃជន់លិចដោយទឹកនោះ ធ្វើឱ្យ​យើងពិបាកក្នុងការរស់នៅ លំបាកក្នុងប្រកបអាជីវកម្មនានា និងធ្វើឱ្យបាត់បង់ សោភណភាពទីក្រុងផងដែរ។

ឯកឧត្តម សុខ លូ អភិបាលខេត្តបាត់ដំបង​ដោយមានវត្តមានរបស់ឯកឧត្តម ចៅ សុភ:ភិបាល អគ្គនាយកនៃអគ្គ​នាយក​ដ្ឋានប្រព័ន្ធប្រព័ន្ធចម្រោះទឹកកខ្វក់ ក្រសួងសាធារណការ និងដឹកជញ្ជូន បានសំដែងនូវការគោរពដឹងគុណដ៏ជ្រាល​ជ្រៅ​​បំផុតជូនចំពោះសម្តេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ សម្តេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ ដែលបានលះបង់កម្លាំងកាយចិត្តទាំងប្រាជ្ញាស្មារតីដើម្បីការរស់ឡើងវិញរបស់ប្រជាជាតិ​កម្ពុជាពិសេសការបង្រួមបង្រួមជាតិ សន្តិភាព ស្ថិរភាព សង្គម និងការស្តារអភិវឌ្ឍន៍ សេដ្ឋកិច្ចជាតិកន្លងមកហើយត្រូវ​​បាន​បន្តដឹកនាំដ៏ឈ្លាសវៃនិងប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ឯកឧត្តម​​អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។

ឯកឧត្តមអភិបាលខេត្ត ក៏បានណែនាំដល់ប្រជាពលរដ្ឋទាំងអស់ ត្រូវចូលរួមកាត់សំយាប បញ្ឈប់ការរំលោភយកដី​ចំណី​ផ្លូវនិងចូលរួមសហការជាមួយអាជ្ញាធរដែនដី មន្រ្តីជំនាញដើម្បីអនុវត្តគម្រោងស្ថាបនាលូប្រអប់ឱ្យ​ប្រព្រឹត្តទៅដោយរលូន តាមផែនការគ្រោងទុក៕
( អត្ថបទ-រូបភាព៖ អ៊ុក សំអាន បប. )