កំពង់ចាម៖ប្រសិនជាពុំមានអ្វីប្រែប្រួលទេផ្លូវក្រាលកៅស៊ូមួយខ្សែប្រវែងជាង​ប្រាំគីឡូម៉ែត្រស្ថិតឃុំតាំងក្រសាំង ស្រុកបាធាយ ខេត្តកំពង់ចាមនឹងសម្ពោធ​ដាក់ឱ្យប្រើប្រាស់នៅថ្ងៃទី៩ ខែមីនា រួមជាមួយសមិទ្ធផលនានា​នៅវត្តភ្នំព្រះវិហារ​ផងដែរ។

ឯកឧត្តម អ៊ុន ចាន់ដា អភិបាលខេត្តកំពង់ចាម រួមជាមួយមន្រ្តីក្រុម​ការងារនៅ​ថ្ងៃទី១ ខែកុម្ភៈ ឆ្នាំ២០២៥​បានអញ្ជើញ​ពិនិត្យផ្លូវក្រាលកៅស៊ូមួយខ្សែប្រវែង ៥ ៥០០ ម៉ែត្រ និងសមិទ្ធផលនានានៅវត្តព្រះវិហារ នៃឃុំតាំងក្រសាំង ស្រុកបាធាយ ដើម្បីត្រៀមសម្ពោធដាក់ឱ្យប្រើប្រាស់ជាផ្លូវការនៅថ្ងៃទៅ៩ ខែមីនា ឆ្នាំ២០២៥ ខាងមុខ។ផ្លូវកៅស៊ូមួយខ្សែ ដែល​បាន​ស្ថាបនា​រួចរាល់ដោយភ្ជាប់ពីទី​ប្រជុំជន ឃុំតាំងក្រសាំង ទៅវត្តភ្នំព្រះវិហារ និងភូមិក្រដាស”ក” ភូមិក្រដាស”ខ” ។

នេះជាសមិទ្ធិថ្មីរបស់ខេត្តកំពង់ចាមក្នុងចំណោមសមិទ្ធផលនានាជាច្រើនទៀតនៅដើមឆ្នាំ២០២៥ ខណៈការដ្ឋានផ្លូវជាតិលេខ៧ពីទីប្រជុំជនស្គន់​មក​កាន់​ក្រុង​កំពង់ចាមក៏កំពុងលេចចេញជារូបរាង៕
ដោយ៖លី ពៅ