បន្ទាយមានជ័យ៖នគរបាលខេត្តបន្ទាយមានជ័យ បានបន្តធ្វើការផ្សព្វផ្សាយ​ច្បាប់ចរាចរណ៍ជាប្រចាំតាមដងផ្លូវជាតិ គ្រឹះស្ថាន​​អប់រំនានានិងបានដាក់​កម្លាំងទូទាំងខេត្តជួយសម្រួលចរាចរណ៍តាមទីប្រជុំជនបញ្ចៀសការកកស្ទះ និងជួយដល់សិស្សានុសិស្សជាប្រចាំ។

លោកវរសេនីយ៍ត្រី ង៉ាន់ចិន្ដា ស្នងការរងទទួលផែនផែនការងារសណ្តាប់​ធ្នាប់បានឱ្យដឹងនៅព្រឹកថ្ងៃទី១ ខែកុម្ភៈ ថាក្នុងន័យ រួមចំណែកកាត់​បន្ថយអត្រាគ្រោះថ្នាក់ចរាចរណ៍ឱ្យនៅកម្រិតទាបបំបផុត ឧត្តមសេនីយ៍ទោ សិទ្ធិ ឡោះ ស្នងការនៃស្នង​ការ​ដ្ឋាន​នគរបាលខេត្តបន្ទាយមានជ័យ បានដាក់ចេញ​នូវផែនការដល់កងកម្លាំងនគរបាលគ្រប់ស្រុក/ក្រុង ឱ្យបន្តពង្រឹង បន្តចុះ​ផ្សព្វផ្សាយ​ច្បាប់ចរាចរណ៍ផ្លូវគោក តាមគ្រឹះស្ថានសិក្សា និងតាមដងផ្លូវជាតិ​ក្នុងទីប្រជុំជន។

ការផ្សព្វផ្សាយច្បាប់ចរាចរណ៍ផ្លូវគោកក្នុងគោលបំណងដើម្បីបង្កើនការយល់ដឹងដល់ប្រជាពលរដ្ឋ ដែលធ្វើដំណើរ​តាម​ដងផ្លូវសាធារណៈ ឱ្យមានស្មារតីយក​ចិត្តទុកដាក់ក្នុងការបើកបរ និងយល់ដឹងពីច្បាប់ស្តីពីចរាចរណ៍ផ្លូវគោក ឱ្យបាន​ច្បាស់លាស់ ដើម្បីគេចផុតពីការល្មើសច្បាប់ ការពិន័យ និងគ្រោះថ្នាក់ជាយ​ថា​ហេតុ៕
ដោយ៖ឃិន គន្ធា