កំពង់ធំ៖ឯកឧត្តមបណ្ឌិត ខាន់ ខុន អនុរដ្ឋលេខាធិការក្រសួងធម្មការ និងសាសនា និងជាប្រធាន សមាគមគ្រីស្ទបរិស័ទ​ក្នុងសន្តិភាព តំណាងឯកឧត្តមបណ្ឌិត ចាយ បូរិន រដ្ឋមន្ត្រីក្រសួងធម្មការនិងសាសនា បានអញ្ជើញជាធិបតីភាព​ក្នុងពិធី​ប្រគល់អណ្ដូងទឹកស្អាតមួយកន្លែងជូនដល់យោធិន កងវរសេនាតូចលេខ ៤៤៨ នៃបញ្ជាការដ្ឋានតំបន់ប្រតិបត្តិការ​សឹករង​កំពង់ធំ និងក្រុមគ្រួសារយោធិនសម្រាប់ប្រើប្រាស់ នៅភូមិតាឡែក ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ កាលពីរសៀលថ្ងៃទី៣១ ខែមករា ឆ្នាំ២០២៥ ។ អណ្ដូងទឹកនេះមានតម្លៃជាង២ពាន់ដុល្លារ។

ឯកឧត្តមបណ្ឌិតបានថ្លែងថា ក្រោមជំនួយឧបត្ថម្ភពីសប្បុរសជននានា និងដៃគូអភិវឌ្ឍន៍ អណ្តូងទឹកស្អាតនៃ សមាគម​គ្រីស្ទបរិស័ទក្នុងសន្តិភាព និងក្រុមជំនុំបេសកកម្មដំណឹងល្អ បានកសាងអណ្ដូងទឹកស្អាតជូនប្រជាពលរដ្ឋ នៅតាម​សាលារៀន តាមសហគមន៍តាមជនបទ និងនៅតាមមូលដ្ឋាននានា នៅទូទាំងប្រទេសបានចំនួនជិត ៧០០ អណ្ដូងរួច​មកហើយ នៅ២៤ខេត្តនៃប្រទេសកម្ពុជា។ឯកឧត្តមបណ្ឌិត ក៏បានជួយស្ថាបនាអណ្ដូងទឹកស្អាតចំនួនពីរ នៅលើដី​សម្បទាន​សង្គម កិច្ចសម្រាប់ផ្ដល់ជូនអតីតយុទ្ធជនដែលមានជីវភាពលំបាកខ្វះខាតនៅឃុំក្រយា ស្រុកសន្ទុក ខេត្តកំពង់ធំ បានប្រើប្រាស់នាពេលកន្លងមកដែរ។ឮ

ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានថ្លែងអំណរគុណចំពោះឯកឧត្តមបណ្ឌិត ខាន់ ខុន អនុរដ្ឋលេខាធិការក្រសួងធម្មការ និងសាសនា និងជាប្រធាន សមាគមគ្រីស្ទបរិស័ទក្នុងសន្តិភាព ដែលជានិច្ច​ជាកាល ឯកឧត្តមបណ្ឌិត តែងតែជួយឧបត្ថម្ភ និងដោះស្រាយនូវការលំបាកនានា ពិសេសជួយដល់​អង្គភាព​បញ្ជាការដ្ឋាន​តំបន់ប្រតិបត្តិការសឹករង ក៏ដូចជាសមាគមអតីតយុទ្ធជនកម្ពុជា ខេត្តកំពង់ធំ នាពេលកន្លងទៅ ៕

ដោយ៖ ប៊ុន រដ្ឋា