ទោះជាខេត្តជាប់មាត់សមុទ្រ ក៏អភិបាលខេត្តនៅតែរំលឹកឱ្យយកចិត្តទុកដាក់លើបញ្ហាទឹក
កែប៖ ខណៈអញ្ជើញចុះពិនិត្យស្ថានភាពបណ្តាទំនប់ទឹក ស្ថិតនៅឃុំពងទឹក ស្រុកដំណាក់ចង្អើរ ឯកឧត្តមបណ្ឌិត សោម ពិសិដ្ឋ អភិបាលខេត្តកែបបានបញ្ជាក់ប្រាប់មន្រ្តីជំនាញដែលរួមដំណើរអំពីការធ្វើយ៉ាងដើម្បីធានាការផ្តល់ទឹកបានគ្រប់ គ្រាន់ជូនប្រជាពលរដ្ឋសម្រាប់ប្រើប្រាស់ប្រចាំថ្ងៃ ក៏ដូចជាការបង្កបង្កើនផលស្រូវប្រាំង និងដំណាំរួមផ្សំដទៃទៀត។
ក្នុងសកម្មភាពកាលពីថ្ងៃទី២ ខែកុម្ភៈ ឯកឧត្តមអភិបាលខេត្តបានពិនិត្យទំនប់រនេស ដែលមានប្រវែង២ ៥០០ ម៉ែត្រ។ទំនប់នេះអាចស្តុកទឹកបានប្រមាណជាង ៦លានម៉ែត្រគូប និងមានលទ្ធភាពស្រោចស្រពលើផ្ទៃដីស្រូវប្រាំងចំនួន ៣០០ហិកតា និងដំណាំរួមផ្សំចំនួន ១៥០ហិកតា ។ទំនប់នេះ ក៏ជាកន្លែងស្តុកទឹកមួយដ៏មានសារៈប្រយោជន៍សម្រាប់ប្រជាពលរដ្ឋចំនួនពីរឃុំ គឺ ឃុំពងទឹក និង ឃុំអង្កោល។ទំនប់នេះបម្រុងទុកប្រើប្រាស់ក្នុងរដូវប្រាំងដែលអាចជួយផ្គត់ផ្គង់បានភូមិចំនួន៧ រួមមាន ភូមិរនេស ភូមិអូរដូង ភូមិព្រៃតាកុយ ភូមិភ្នំលាវ ឃុំពងទឹក និងភូមិកោះសោម ភូមិអំពេង ភូមិអង្កោល ឃុំអង្កោល នៃស្រុកដំណាក់ចង្អើរ។
ក្នុងឱកាសនេះឯកឧត្តមបណ្ឌិត សោម ពិសិដ្ឋ បានណែនាំដល់អាជ្ញាធរពាក់ព័ន្ធត្រូវពិនិត្យ និងតាមដានជាប្រចាំចំពោះបញ្ហាទឹកស្រោចស្រពដំណាំជូនប្រជាកសិករ ធ្វើយ៉ាងណាឱ្យស្រូវ និងដំណាំផ្សេងៗ របស់ប្រជាពលរដ្ឋមានទឹកគ្រប់គ្រាន់ សម្រាប់ការស្រោចស្រព ហើយមិនត្រូវឱ្យស្រូវ និងដំណាំ របស់ប្រជាពលរដ្ឋខូចខាតដោយការខ្វះខាតទឹកស្រោចស្រពនៅក្នុងភូមិសាស្ត្រខេត្តកែបឡើយ។
ជាមួយគ្នានេះដែរ ឯកឧត្តមអភិបាលខេត្ត បានសំណូមពរដល់ប្រជាកសិករទាំងអស់ ដែលធ្វើស្រែប្រាំង ឬដាំដុះដំណាំផ្សេងៗសូមប្រើប្រាស់ដោយសន្សំសំចៃ និងទៅតាមតម្រូវការចាំបាច់៕
ដោយ៖ សិលា សារិន
