ភ្នំពេញ៖ កិច្ចការអភិរក្ស ការពារ និងអភិវឌ្ឍសិល្បៈវប្បធម៌ ជាការងារគ្មាន​ទីបញ្ចប់ និងទាមទារឱ្យមានកិច្ចខិតខំ ប្រឹង ប្រែងជាប់មិនដាច់ ព្រមទាំង​កសាងឱ្យបាននូវយុវជនបន្តវេនប្រកបដោយជំនាញវិជ្ជាជីវៈ និងមន​សិការ​ខ្ពស់ ។ នេះជា ប្រសាសន៍របស់លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ ក្នុង ពិធីបិទ សន្និបាត​បូក​សរុបការងារវប្បធម៌ និងវិចិត្រសិល្បៈ ឆ្នាំ២០២៤ និងលើកទិស​ដៅការងារឆ្នាំ២០២៥ នៅសាលសន្និសីទចតុមុខ កាលពីព្រឹកថ្ងៃទី៦ ខែកុម្ភៈ ឆ្នាំ២០២៥ ។

លោកជំទាវបណ្ឌិតសភាចារ្យ បានរំលឹកពីការកកើតប្រទេស​កម្ពុជា​ជាមួយប្រវត្តិសាស្ត្រ វប្បធម៌ អរិយធម៌ ប្រពៃណី​ទំនៀម​ទម្លាប់ដ៏យូរលង់ និងច្បាស់លាស់ ដែលមកទល់បច្ចុប្បន្ន សិល្បៈ វប្បធម៌ បេតិកភណ្ឌ​ទាំងរូបី និងអរូបីដ៏សម្បូរបែប ដែល​ត្រូវបានបង្កើត បន្សល់ទុក និងថែរក្សា​ការពារ ដោយបុព្វបុរសគ្រប់ជំនាន់ គឺជាសក្ខីភាព និងបាន​ក្លាយជា​អត្តសញ្ញាណ​ដ៏ថ្លៃថ្លារបស់ជាតិនិងប្រជាជន ។ លោកជំទាវបន្តថា កិច្ចការបន្តវេនថែរក្សា ការពារ និងអភិវឌ្ឍន៍ បានក្លាយជា​កាតព្វកិច្ចរបស់​កូនខ្មែរគ្រប់ៗរូប ហើយបច្ចុប្បន្ន ភារកិច្ចនេះ មិនត្រឹមតែផ្តោតគោលដៅ​ការការពារអត្តសញ្ញាណ​ជាតិ​មួយមុខនោះទេ ប៉ុន្តែថែមទាំងជាកិច្ចខិត​ខំបង្វែរទិសបន្ថែម ដល់វិស័យសិល្បៈវប្បធម៌ ក្នុងការចូលរួមដោយ​ផ្ទាល់និង​ដោយប្រយោលដល់កំណើនសេដ្ឋកិច្ច និងទ្រទ្រង់ជីវភាព ប្រជាជន តាមរយៈការកសាងជំនាញបន្តវេន បង្កបង្កើតការងារ និងតាមរយៈការរីកចម្រើនរបស់វិស័យឧស្សាហកម្ម វប្បធម៌ ។

លោកជំទាវរដ្ឋមន្ត្រី បានបញ្ជាក់ថា កិច្ចការអភិរក្ស ការពារ និងអភិវឌ្ឍ​សិល្បៈវប្បធម៌ ជាការងារគ្មានទីបញ្ចប់ និងទាមទារ​ឱ្យមានកិច្ចខិតខំ ប្រឹងប្រែងជាប់មិនដាច់ ព្រមទាំងកសាងឱ្យបាននូវយុវជនបន្តវេន​ប្រកបដោយជំនាញវិជ្ជាជីវៈ និងមនសិការ​ខ្ពស់ ។ លោកជំទាវ មានជំនឿថា កិច្ចសហការប្រមូលផ្តុំកម្លាំងរួមមួយ រវាងគ្រប់អង្គភាព​ជំនាញរបស់​ក្រសួងវប្បធម៌ និងវិចិត្រសិល្បៈ ជាមួយក្រសួងស្ថាប័ន​ពាក់ព័ន្ធ វិស័យឯកជន និងប្រជាជនគ្រប់មជ្ឈដ្ឋាន គឺជាភាពចាំ​បាច់បំផុត ដែលនាំឱ្យយើងសម្រេចបានទិសដៅការងារដែលបានគ្រោងទុក ។ កិច្ចខិតខំប្រឹងប្រែង របស់យើងទាំងអស់គ្នា នឹងមិនត្រឹមតែដើម្បីបុព្វហេតុ​សិល្បៈវប្បធម៌ និងប្រជាជនប៉ុណ្ណោះទេ ប៉ុន្តែអ្វីដែលយើងកំពុងរៀប​ចំតម្រង់ទិស ទាំងយន្ត​ការការងារ ក្របខ័ណ្ឌគតិយុត្តគាំទ្រដល់​ការអនុវត្តការងារ ការកសាង ធនធានមនុស្ស ទម្រង់នៃកិច្ចសហការ​ជាតិ-អន្តរជាតិ ភាពជិតស្និទ្ធជាមួយវិស័យឯកជន ព្រមទាំងលទ្ធផល​សម្រេចបានកន្លងមក និងទៅអនាគត នឹងក្លាយជាមរតក ទុកជូនជន​បន្តវេន ជាមួយក្តីសង្ឃឹម នៃការបង្កលក្ខណៈអនុគ្រោះ និងតម្រាយផ្លូវ​ដ៏ល្អ សម្រាប់ការបន្តបុព្វហេតុការងារ​សម្រាប់​វិស័យ​សិល្បៈវប្បធម៌ ។

លោកជំទាវបណ្ឌិតសភាចារ្យ បានផ្តល់ការតម្រង់ទិសបន្ថែមទៅលើ​ចំណុចសំខាន់ៗមួយចំនួន រួមមាន៖ ស្នើសុំថ្នាក់ដឹកនាំ​កម្រិតនយោបាយ រួសរាន់បញ្ចប់ឯកសារសំខាន់ៗ សម្រាប់បន្តរក្សាសកម្មភាពរបស់ក្រសួង​ឱ្យស្ថិតនៅគន្លងមួយត្រឹមត្រូវ រលូន និងជោគជ័យ ឱ្យបានមុនដំណាច់​ខែកុម្ភៈ ។ ប្រគល់ភារកិច្ចជូនអគ្គនាយកដ្ឋានបេតិកភណ្ឌ តាមដាន ត្រួតពិនិត្យ​ផ្ទាល់​ទៅលើសកម្មភាពជាក់ស្តែងរបស់គ្រប់មន្ទីរ និងដាក់​ចេញនូវវិធានការជំរុញសកម្មភាព ដើម្បីធានាឱ្យបានថា គ្រប់បុរាណដ្ឋាន​ដែលបានចុះបញ្ជី និងត្រៀមចុះបញ្ជី ត្រូវបានកំណត់និយាមការួចរាល់ ព្រមទាំងបញ្ជូនឱ្យបានទាន់​ពេលវេលាទៅក្រសួងរៀបចំដែនដី នគរូបនីយកម្ម និងសំណង់ ដើម្បីការពារបាន ពីការរំលោភបំពាន និងការបំផ្លិចបំផ្លាញ ជាពិសេស មិនរាំងស្ទះដល់យុទ្ធនាការចេញ​ប្លង់កម្មសិទ្ធិដីធ្លីជូនប្រជាពលរដ្ឋនៅទូទាំងប្រទេស ។ អគ្គនាយក​ដ្ឋានបច្ចេក​ទេសវប្បធម៌ ត្រូវរៀបចំឱ្យចេញជាយន្ត​ការច្បាស់លាស់ រួមបញ្ចូលទាំងសកម្មភាពអនុវត្តជាក់ស្តែង​ពាក់ព័ន្ធនឹង​កម្មវិធី​បណ្តុះបណ្តាលជំនាញវិជ្ជាជីវៈ ជំនាញដូនតា ។ អគ្គនាយកដ្ឋាន​បច្ចេកទេស វប្បធម៌ ចាត់ចែងសម្រេចឱ្យបាននូវ​សេចក្តីព្រាងគោល​នយោបាយអមដោយយន្តការអនុវត្តសម្រាប់វិស័យឧស្សាហកម្មវប្បធម៌ ឬឧស្សាហកម្មច្នៃប្រឌិត​ឱ្យបាននៅដំណាច់ឆ្នាំ២០២៥ ព្រោះនៅកម្ពុជា វិស័យនេះ នៅក្មេងខ្ចីនៅឡើយ ។ អគ្គនាយកដ្ឋានបេតិកភណ្ឌ ត្រូវដឹកនាំសម្របសម្រួលជាមួយគ្រប់អង្គភាពពាក់ព័ន្ធ ដោយរាប់បញ្ចូលទាំងមន្ទីរទាំង២៥ រាជធានី-ខេត្ត បង្កើតឱ្យបាន​នូវបញ្ជីសារពើភណ្ឌរូបី រួមបញ្ចូលទាំងវត្ថុបុរាណក្នុង និងក្រៅឃ្លាំង ក្រោមទម្រង់ប្រមូលផ្តុំតែមួយ ចៀសវាងការបន្ត ស្ថិតក្នុងស្ថានភាព នៃការចុះបញ្ជីដាច់ដោយឡែកដូចបច្ចុប្បន្ន ក្នុងទិសដៅជំរុញដល់កិច្ចការអភិរក្ស គ្រប់គ្រង និងដែលអាចប្រើប្រាស់បានទាំងអស់គ្នា ព្រោះបញ្ជី និងផែនទីនេះ ពិតជាមានសារៈសំខាន់ ដែលនឹងចង្អុលបង្ហាញពីទីតាំង ប្រភព និងប្រភេទបេតិកភណ្ឌអរូបី ដែលអាចជាជំនឿ ប្រពៃណី ទំនៀមទំលាប់ ទេពកោសល្យ សិប្បកម្មប្រពៃណី ភាសា ប្រវត្តិ និងអត្តសញ្ញាណ ផ្សេងទៀតទៅតាមតំបន់ ៕

អត្ថបទ៖ វណ្ណលុក