សៀមរាប៖វត្តប្រាសាទគោកចក ស្ថិតនៅភូមិវាល សង្កាត់គោកចក ក្រុង​សៀមរាប ខេត្តសៀមរាបបានប្រារព្ធបុណ្យផ្កាប្រាក់សាមគ្គី និងទេសនា​មហាវេស្សន្តរជាតកដើម្បីប្រមូលបច្ច័យចូលរួមកសាងវិស័យពុទ្ធចក្រក្នុងទីអារាមមួយនេះ ។

ចូលរួមជាព្រះសង្ឃ គណៈកម្មការវត្ត ពុទ្ធបរិស័ទជិតឆ្ងាយ កាលពីថ្ងៃសៅរ៍ទី៨ ខែកុម្ភៈ ឆ្នាំ២០២៥ ឯកឧត្តម លី សំរិទ្ធ ប្រធានក្រុមប្រឹក្សាខេត្ត និងលោក សុខ ថុល អភិបាលរងខេត្តតំណាងឯកឧត្តម ប្រាក់ សោភ័ណ អភិបាលខេត្ត​សៀមរាប ប្រមូលបច្ច័យជាមួយថ្នាក់ដឹកនាំរដ្ឋបាលខេត្ត មន្ទីរ អង្គភាពនានា និងសប្បុរសជនជិតឆ្ងាយបានជាង ១២ លានរៀល ដើម្បីចូលរួមក្នុង​បុណ្យ​ផ្កាសាមគ្គី នៅវត្តប្រាសាទគោកចក។

ព្រះគ្រូវិចិត្រវង្សា ហែម គឹមសាន ចៅអធិការ​វត្តប្រាសាទគោកចកមាន​សង្ឃដីកា​ឱ្យដឹងថា បច្ច័យដែលប្រមូលបាន​នឹងយក​ទៅស្ថាបនាផ្លូវបេតុងប្រវែង ២០០ ម៉ែត្រ, ទទឹង ៦ ម៉ែត្រ និងដាក់លូបង្ហូរទឹកប្រវែង ២០០ ម៉ែត្រ។ ការសាងសង់នឹង​ចំណាយ​ប្រមាណ ៣៩ ២២១ ដុល្លារអាមេរិកឬប្រមាណ​ជាង១៦០លានរៀល ។ព្រះចៅអធិការបានថ្លែងអំណរគុណ និងកោតសរសើរ​ចំពោះថ្នាក់ដឹកនាំខេត្ត និងប្រជាពុទ្ធបរិស័ទ ដែលតែងតែគាំទ្រពុទ្ធសាសនា​តាមរយៈពិធីបុណ្យទាននានា។

ព្រះគ្រូចៅអធិការ បានអំពាវនាវដល់សប្បុរសជនជិតឆ្ងាយ ឱ្យជួយបរិច្ចាគ​ធនធានថវិកា បន្តការគាំទ្រការអភិវឌ្ឍ​វិស័យ​ព្រះពុទ្ធសាសនា៕
ដោយ៖ប៊ុន រដ្ឋា