រដ្ឋបាលខេត្តបាត់ដំបង តុបតែងមុខមាត់រមណីយដ្ឋានភ្នំសំពៅបន្ថែមដើម្បីទាក់ទាញទេសចរជិតឆ្ងាយ
បាត់ដំបង៖រដ្ឋបាលខេត្តបាត់ដំបង សម្រេចបើកការដ្ឋានសាងសង់សួនច្បារ និងកែលម្អហេដ្ឋារចនាសម័្ពន្ធផ្លូវនៅក្នុងតំបន់រមណីយដ្ឋានភ្នំសំពៅ នៃស្រុកបាណន់ ។សកម្មភាពមួយនេះគឺជាការខិតខំបន្ថែមទៀតរបស់រដ្ឋបាលខេត្ត ដើម្បីកែលំអសោភណភាព បរិស្ថាន និងគោលដៅសំខាន់បម្រើឱ្យវិស័យទេសចរណ៍។
ពិធីបើកការដ្ឋានសាងសង់សួនច្បារ និងពង្រីកផ្លូវចូលរមណីយដ្ឋានភ្នំសំពៅដែលមានទីតាំងនៅភូមិសំពៅកើត ឃុំភ្នំសំពៅ ស្រុកបាណន់ បានប្រព្រឹត្តទៅក្រោមអធិបតីភាព ឯកឧត្តម សុខ លូ អភិបាលខេត្តបាត់ដំបង កាលពីរសៀលថ្ងៃទី៩ ខែកុម្ភៈ ឆ្នាំ២០២៥។
មានប្រសាសន៍ក្នុងឱកាសនេះឯកឧត្តម សុខ លូ បានលើកឡើងការដ្ឋានអនុវត្តការងារចម្រុះគ្នាក្នុងពេលនេះ គឺដោយមានការចង្អុលបង្ហាញពីសម្តេចក្រឡាហោម សខេង ឧត្តមប្រឹក្សាផ្ទាល់ព្រះមហាក្សត្រ និងជាអ្នកតំណាងរាស្ត្រមណ្ឌលខេត្តបាត់ដំបង ឯកឧត្តមអភិសន្តិបណ្ឌិត សសុខា ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃនិងឯកឧត្តម កើតរិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជា ប្រធានក្រុមការងាររាជរដ្ឋាភិបាលចុះមូលដ្ឋានខេត្ត។
សូមជម្រាបថា ការដ្ឋានដែលត្រូវធ្វើមានការ សាងសង់ខ្លោងទ្វារ ,សួនច្បារជើងភ្នំសំពៅ ផ្លូវថ្នល់ ដាំដើមឈើ ដើមផ្កានិងរៀបចំឱមានផ្លូវថ្មើរជើងក្នុងតំបន់តំបន់រមណីយដ្ឋានភ្នំសំពៅ ។ឯកឧត្តមអភិបាលខេត្តបាត់ដំបងបង្ហាញនូវក្តីរំពឹងថា ការកែលម្អតំបន់រមណីយដ្ឋានប្រវត្តិសាស្រ្តមួយនេះឱ្យប្រែក្លាយជាតំបន់ទេសចរណ៍ឱ្យកាន់តែល្បីល្បាញ ។កាន់តែបង្កើននូវការទាក់ទាញភ្ញៀវទេសចរជាតិ និងអន្តរជាតិដែលមកទស្សនាម្តងហើយនិងចង់មកម្ដងទៀត។
គួររំលឹកថា កាលពីថ្ងៃទី៧ ខែធ្នូ ឆ្នាំ២០២៤ សម្ដេចក្រឡាហោម សខេង និងលោកជំទាវ ញ៉ែម សាខន បានផ្ដួចផ្ដើមដឹកនាំប្រារព្ធពិធីបុណ្យផ្កាប្រាក់មហាសាមគ្គីមួយដើម្បីប្រមូលបច្ច័យរៀបចំកសាងបង្ហើយនូវ ព្រះពុទ្ធរូបអង្គធំ និង កសាងខឿនសួនច្បារជើងភ្នំសំពៅ ។
ភ្នំសំពៅគឺជារមណីយដ្ឋានវប្បធម៌ប្រវត្តិសាស្ត្រមួយស្ថិតនៅតាមដងផ្លូវជាតិលេខ៥៧ ឬ អតីតផ្លូវជាតិលេខ១០ស្ថិតក្នុងឃុំភ្នំសំពៅ ស្រុកបាណន់ខេត្តបាត់ដំបង មានចំងាយប្រមាណ១២គីឡូម៉ែត្រ ពីទីរួមខេត្តបាត់ដំបង។ ភ្នំនេះមានកម្ពស់ប្រមាណ ១០០ម៉ែត្រ។ មានកាំជណ្តើរឡើង ចំនួន ១ ០៣០កាំ។អ្វីដែលទាក់ទាញភ្ញៀវទេសចរទៅកាន់តំបន់នោះ គឺដោយ
សារទស្សនីយភាពនៃហ្វូងទ័ពសត្វប្រចៀវ រាប់លានក្បាល ដែលហោះចេញពីល្អាងភ្នំ ជារៀងរាល់ថ្ងៃនៅមុនពេលដែលព្រះសូរិយាហៀបអស្តង្គត៕
អត្ថបទ-រូបភាព÷ អ៊ុក សំអាន បប.
