ភ្នំពេញ៖កូនផ្សោតទើបកើតថ្មីមួយក្បាល មានអាយុប្រមាណ២ថ្ងៃ ត្រូវបាន​ប្រទះឃើញដោយក្រុមការងារស្រាវជ្រាវនៃ​រដ្ឋបាលជលផលនិងអង្គការ WWF វេលាម៉ោង៣:២០នាទីរសៀលថ្ងៃទី៩ ខែកុម្ភៈ ឆ្នាំ២០២៥ នៅអន្លង់ជ្រោយ​បន្ទាយ ភូមិជ្រោយបន្ទាយ ឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ។ នេះ​បើយោងតាមក្រសួងកសិកម្ម រុក្ខាប្រមាញ់ និងនេសាទបានឱ្យដឹង។

ប្រភពដដែលបានពណ៌នាថា កូនផ្សោតថ្មីនេះស្ថិតនៅក្នុងក្រុមសត្វផ្សោត​ពេញវ័យចំនួន៨ក្បាលផ្សេងទៀត។ វាគឺជាកូន​ផ្សោតទី៣ ដែលបានកើតនៅ​ដើមឆ្នាំនេះ។

ជាមួយវត្តមានសត្វដ៏កម្រថ្មីនេះ ក្រសួងកសិកម្ម បានថ្លែងអំណររគុណ​ចំពោះ​បងប្អូនឆ្មាំទន្លេ អាជ្ញាធរមូលដ្ឋាន និងប្រជា​ពល​រដ្ឋ​ដែលបាន ចូលរួមថែរក្សានិង​ការពារធនធានជលផលដ៏មានតម្លៃ។

ក្រសួងកសិកម្មបានអំពាវនាវដល់ប្រជានេសាទថា បើបានប្រទះឃើញ​សត្វ​ផ្សោត ពិសេសកូនផ្សោត សូមផ្តល់ព័ត៌មានម​កសមត្ថកិច្ចជលផល ដែលមាន​លេខទូរសព្ទចំនួនប្រាំខ្សែ រួមមានលេខ ០១២ ៨៩៧ ៩៤៣, ០១១ ៣៥៥ ៨៨៣ ,០៩៩ ៧៩១ ៩១៩ ,០៩២ ៩១៨ ១៤ ៤ និង ០១៧ ៨១៨ ៣៨២៕
ដោយ៖ម៉ាដេប៉ូ