(ភ្នំពេញ)៖ ឆ្លងកាត់ការប្រកួតប្រជែងយ៉ាងស្វិតស្វាញអស់រយៈ ២ថ្ងៃនៃការប្រកួត Rasson Cam bodia Women’s Billiards Championship 2025 ដែលរៀបចំដោយ​ក្លឹប​ប៊ីយ៉ា Lux98 ចាប់ពីទី១៥ដល់១៦ ខែ កុម្ភៈ ឆ្នាំ២០២៥ កីឡាការិនី ហ៊ាន់ សុធារ៉ា បានក្លាយជាម្ចាស់ជើងឯក ក្រោយ​យកឈ្នះកីឡាការិនី ខុន សំណាង នៅវគ្គផ្តាច់ព្រ័ត្រ។

កញ្ញា ហេង ចាង ប្រធានក្លឹបប៊ីយ៉ា Lux98 បានថ្លែងបញ្ជាក់ថា ការប្រកួតប៊ីយ៉ា Rasson Cambodia Women’s Billiards Championship 2025នេះ មានកីឡាការិនីចូលរួមសរុប ១៦នាក់ ដែលមានរយៈពេល២ថ្ងៃ ដោយមាន​ប្រាក់រង្វាន់​​សម្រាប់ជ័យលាភីពីលេខ១ទៅដល់លេខ៣ ស រុបចំនួន ៥០០០ដុល្លារអាមេរិក។

កញ្ញា បានរំលេចទៀតថា សម្រាប់ការប្រកួតកីឡាប៊ីយ៉ា​នារី​នេះ ក្លឹបប៊ីយ៉ា Lux98ដែលមានទីតាំងស្ថិតនៅក្នុងខណ្ឌ ច្បារអំពៅ បានរៀបចំឡើងជារៀងរាល់ឆ្នាំក្នុងគោលដៅ​ពង្រឹងសមត្ថភាពកីឡាការិនីប៊ីយ៉ាកម្ពុជា និងជាការបំផុស​លើកទឹកដល់កីឡាការិនីដែលចូលចិត្តវិស័យកីឡាប៊ីយ៉ា ។ ជាពិសេស ក៏ជាផ្តល់ឱកាសជូនកីឡាការិនីប៊ីយ៉ាបាន​បង្ហាញ​ទេពកោសលចំពោះវិស័យកីឡាដែលខ្លួនស្រលាញ់ និងអាច​វិវឌ្ឍខ្លួនទៅជាកីឡាការិនីអាជីពនាពេលអនាគត ដែលនឹង​អាច​ទទួលបានឱកាសទៅលេងតំណាងជាតិប្រកួតលើឆាក​អន្តរជាតិ។

ដោយឡែក កីឡាការិនីប៊ីយ៉ា ខុន សំណាង ម្ចាស់ជើងឯករង បានថ្លែងលើកឡើងថា មូលហេតុដែលរូបគេចូលរួមប្រកួត​ប្រជែង​ក្នុងការប្រកួតនេះ ដោយសារតែខ្លួនចង់បង្ហាញថា កីឡាមួយប្រភេទនេះនារីក៏អាចលេងបានដូចបុរស ហើយ​ម្យ៉ាងទៀត ក៏ចង់ចូលរួមក្នុងការអភិវឌ្ឍវិស័យកីឡាប៊ីយ៉ា​នៅកម្ពុជាឱ្យកាន់តែរីកចំរើន ខណៈកីឡាការិនីក៏អាចអភិវឌ្ឍ​សមត្ថភាពក្លាយជាអ្នកខ្លាំងបានដែរ។

សូមបញ្ជាក់ថា ការប្រកួតសម្រាប់នារីដែលក្លឹបប៊ីយ៉ា Lux98 រៀបចំនេះ ជាលើកទី២ហើយ ខណៈគោលដៅក្លឹបគឺចង់​ផលិតបាននូវធនធានកីឡាការិនីឆ្នើមៗសម្រាប់កម្ពុជាត្រៀមសម្រាប់ការប្រកួតនៅលើឆាកអន្តរជាតិតំណាងព្រះរាជាណាចក្រកម្ពុជា៕

រូបភាព ៖ ជីម ភារ៉ា
អត្ថបទ ៖ ជាវ ចន្ធូ