កំពង់ធំ៖ ឯកឧត្តមទេសរដ្ឋមន្ត្រី នាយឧត្តមសេនីយ៍ គន់ គីម អនុប្រធាន និងជាអគ្គលេខាធិការសមាគមបតីតយុទ្ធជនកម្ពុជា តំណាង​ដ៏ខ្ពង់ខ្ពស់​សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងជាអនុប្រធានទី១ សមាគមអតីតយុទ្ធជនកម្ពុជា កាលពី​ព្រឹកថ្ងៃទី១៧ ខែកុម្ភៈ ឆ្នាំ២០២៥ បានអញ្ជើញជាអធិបតីក្នុងប្រគល់ផ្ទះថ្មីចំនួន១០០ខ្នងជាអំណោយដ៏​ថ្លៃថ្លារបស់​សម្ដេច​បវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី តាមរយៈលោកអ្នកឧកញ៉ា លាង ឃុន សហស្ថាបនិក និងជា​ប្រធានក្រុមប្រឹក្សាភិបាលក្រុមហ៊ុន ជីប ម៉ុង ជូនដល់អតីតយុទ្ធជន រស់​នៅលើដីសម្បទាន​សង្គមកិច្ច ស្ថិតនៅឃុំ ក្រយា ស្រុកសន្ទុក ខេត្តកំពង់ធំ ។

ក្នុងពិធីប្រគល់ផ្ទះថ្មីចំនួន១០០ខ្នងជាអំណោយដ៏​ថ្លៃថ្លារបស់​សម្ដេច​បវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ឧត្តម​សេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង និងជាប្រធានសមាគមអតីត​យុទ្ធជនកម្ពុជាខេត្ត​កំពង់ធំ បានបញ្ជាក់ថា នៅឆ្នាំ២០២១ សម្ដេចអគ្គមហា​សេនាបតីតេជោ ហ៊ុន សែន ប្រធានសមាគមអតីតយុទ្ធជន និង​សម្ដេច​កិត្តិ​ព្រឹទ្ធបណ្ឌិត ប៊ុន រ៉ានី ហ៊ុនសែន បានប្រគល់ផ្ទះ​និងដីសម្បទានសង្គមកិច្ច​ជូនក្រុមគ្រួសារអតីតយុទ្ធជនដែល​មានជីវភាព​​លំបាក​​ចំនួន ១៤១គ្រួសារ​រួចមកហើយ។ដោយឡែកថ្ងៃនេះបងប្អូនអតីតយុទ្ធជន ចំនួន១០០គ្រួសារ មានភព្វសំណាង​ទទួលបានផ្ទះថ្មី១០០ខ្នងផ្ទះបន្ថែមទៀត ពីសម្ដេចបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី សម្រាប់អ​តីតយុទ្ធជន​រស់នៅលើដីសម្បទានសង្គមកិច្ច ក្នុងខេត្តកំពង់ធំ ក្នុងនោះមាន ៦៥ខ្នងផ្ទះ បានសាង​សង់ជូនគ្រួសារ​អតីត​យុទ្ធជន​រួចហើយ ។

ឯកឧត្តមទេសរដ្ឋមន្ត្រី នាយឧត្តមសេនីយ៍ គន់ គីម ក្នុងឱកាសនេះបាន​ថ្លែងនូវការអរគុណសម្ដេចបវរធិបតី ហ៊ុន ម៉ាណែត និងលោក​ជំទាវ និងលោកអ្នកឧកញ៉ា លាង ឃុន​ ដែលបានយកចិត្តទុកដាក់ក្នុងការដោះ​ស្រាយនៅរាល់ការលំបាកជូនដល់​បងប្អូន​អតីតយុទ្ធជនកម្ពុជានៅទូទាំង​ប្រទេស។ឯកឧត្តមក៏បានណែនាំដល់ក្រុមគ្រួសារអតីតយុទ្ធជន ដែលបានមករស់នៅ​លើផ្ទះថ្មី សូមថែរក្សាសុខភាព បង្កបង្កើនផល កសាងជីវភាពរស់នៅថ្មីឱ្យបានល្អប្រសើរ ។

នៅក្នុងឱកាសនេះ លោកអ្នកឧកញ៉ា លាង ឃុន បានឧបត្ថម្ភថវិកាចំនួន៨០ លានរៀល ចូលរួមក្នុងការសាងសង់​ទីស្នាក់ការ​​សមាគមអតីតយុទ្ធជនកម្ពុជា ខេត្តកំពង់ធំ៕
ដោយ៖ប៊ុន រដ្ឋា