ឯកឧត្តម ខូវ ឆាយ៖ ជើងឯកថ្នាក់ជាតិគុនខ្មែរផ្តោតសំខាន់លើគោលបំណង៣សំខាន់ៗលើជំហានអភិវឌ្ឍន៍គុនខ្មែរ
(កំពង់ឆ្នាំង)៖ ការប្រកួតប្រដាល់ជ្រើសរើសជើងឯកថ្នាក់ជាតិឆ្នាំ២០២៤ រៀបចំឡើងផ្តោតលើគោលបំណងសំខាន់ៗចំនួន៣ រួមមាន៖ ទី១.ផ្តល់ឱកាសដល់យុវជន សិស្សានុសិស្ស បានចូលរួមប្រកួតប្រជែង ដើម្បីជ្រើសរើសកីឡាករ កីឡាការិនីគុនខ្មែរថ្នាលដែលមានទេពកោសល្យ ចូលរួមប្រកួតតំណាងជាតិ ក៏ដូចជាបង្កើនចំនួនកីឡាករ កីឡាការិនីឆ្នើម ឱ្យកាន់តែច្រើនបន្ថែមទៀត។
ទី២.ផ្តល់ឱកាសដល់មន្រ្តីបច្ចេកទេសសហព័ន្ធកីឡាជាតិ បានអនុវត្តការងារជាក់ស្តែង ដើម្បីទទួលបានចំណេះដឹង និងបទពិសោធន៍បច្ចេកទេសជំនាញកាន់តែល្អប្រសើរ។ ទី៣.លើកកម្ពស់គុណភាពនៃការរៀបចំការប្រកួតត្រៀមលក្ខណៈឆ្ពោះទៅការប្រកួតអន្តរជាតិនានា។
នេះបើយោងតាមការបញ្ជាក់របស់ឯកឧត្តម ខូវ ឆាយ ប្រធានសហព័ន្ធកីឡាប្រដាល់គុនខ្មែរ ក្នុងពិធីបើកការប្រកួតប្រដាល់គុនខ្មែរជ្រើសរើសជើងឯកថ្នាក់ជាតិឆ្នាំ២០២៤ នាល្ងាចថ្ងៃទី ១៧-២០ ខែកុម្ភៈ ឆ្នាំ២០២៥ នៅភូមិអន្លង់ត្នោត ឃុំលង្វែក ស្រុកកំពង់ត្រឡាច ខេត្តកំពង់ឆ្នាំង។
ប្រធានសហព័ន្ធ បានគូសបញ្ជាក់ទៀតថា ព្រឹត្តិការណ៍ប្រកួតថ្នាក់ជាតិមួយនេះ គឺផែនការសកម្មភាពប្រចាំឆ្នាំ២០២៤ របស់សហព័ន្ធកីឡាប្រដាល់គុនខ្មែរ និងបានការអនុញ្ញាតជាគោលការណ៍ពីក្រសួងអប់រំ យុវជន និងកីឡា សហព័ន្ធកីឡាប្រដាល់គុនខ្មែរ សហការជាមួយរដ្ឋបាលខេត្តកំពង់ឆ្នាំង និងឧបត្ថម្ភគាំទ្រពីក្រុមហ៊ុនវឌ្ឍនៈ ប្រ៊ូវើរី ឯ.ក។
ឯកឧត្តម ប៉ុន សុខ អគ្គនាយកកីឡា ក្រសួងអប់រំ យុវជន និងកីឡាថ្លែងថា ការប្រកួតកីឡាប្រដាល់គុនខ្មែរជ្រើសរើសជើងឯកថ្នាក់ជាតិនេះ បានបង្ហាញឱ្យឃើញពីសន្ទុះចូលរួមយ៉ាងផុសផុលពីគ្រប់មជ្ឈដ្ឋាន គាំទ្រកីឡាអត្តសញ្ញាណជាតិរបស់យើង ដែលកំពុងមានប្រជាប្រិយភាព និងរីកចម្រើនគួរជាទីមោទននាពេលបច្ចុប្បន្ន និងជាបុព្វសិទ្ធស្របច្បាប់ផ្តាច់មុខរបស់សហព័ន្ធ ក្នុងការរៀបចំព្រឹត្តការណ៍ប្រកួតបែបនេះរៀងរាល់ឆ្នាំ។
ឯកឧត្តម អគ្គនាយកកីឡាគូសបញ្ជាក់ទៀតថា តាមរយៈកិច្ចគាំទ្រពីក្រសួងអប់រំ យុវជន និងកីឡា សហព័ន្ធកីឡាប្រដាល់គុនខ្មែរ ក្រោមការជួយឧបត្ថម្ភពីអ្នកឧកញ៉ា សំអាង វឌ្ឍនៈ អគ្គនាយក ក្រុមហ៊ុនវឌ្ឍនៈ ប្រ៊ូវើរី ឯ.ក បានរៀបចំឱ្យមាន ការប្រកួតកីឡាប្រដាល់គុនខ្មែរជ្រើសរើសជើងឯកថ្នាក់ជាតិប្រចាំឆ្នាំ២០២៤ គឺជាការបោះជំហានថ្មីមួយទៀត ផ្តល់ឱកាសឱ្យគ្រប់សមាគម ក្លឹបទូទំាងប្រទេស អាចបញ្ជូនយុវកីឡាថ្នាល ចូលរួមប្រកួតប្រជែងក្នុងព្រឹត្តិការណ៍ធំៗ ដែលនេះគឺជាយុទ្ធនាការកសាងធនធានមនុស្សនៅកម្រិតមូលដ្ឋាន ដើម្បីបន្តនិរន្តរភាព និងរក្សាបានគុណផលកីឡា ធ្វើឱ្យប្រដាល់គុនខ្មែរ នៅតែជាកីឡាសក្តានុពល និងឈានមុខនៅកម្ពុជា ក្នុងការប្រកួតកម្រិតអន្តរជាតិ។
ឯកឧត្តម ប៉ុន សុខ បានលើកឡើងទៀតថា ជាការពិត ការប្រកួតនេះ ផ្អែកតាមបេសកកម្ម និងផែនការសកម្មភាពរបស់សហព័ន្ធកីឡាប្រដាល់គុនខ្មែរ ដើម្បីបំផុសគំនិតយុវជន មហាជន សិស្សានុសិស្សឱ្យស្រឡាញ់ ចូលចិត្ត និងលេងកីឡាប្រដាល់ ជៀសឆ្ងាយពីអំពើអបាយមុខផ្សេងៗនៅក្នុងសង្គម ស្របតាមយុទ្ធនាការអប់រំ “ប្រជាជនម្នាក់ លេងកីឡាមួយមុខយ៉ាងតិចប្រចាំជីវិត” និងបានផ្តល់លទ្ធភាពឱ្យអត្តពលិកប្រដាល់គុនខ្មែរវ័យក្មេង បានបញ្ចេញទេពកោសល្យ ពង្រឹងបច្ចេកទេសដែលបានហ្វឹកហាត់កន្លងមក ធ្វើយ៉ាងណាសំដៅឱ្យការប្រកួតប្រជែងឈរលើស្មារតីកីឡា គោរពវិន័យ និងបទដ្ឋានបច្ចេកទេសត្រឹមត្រូវ ប្រកបដោយក្រមសីលធម៌ល្អ ដោយយើងចាប់ផ្តើមពីកម្រិតថ្នាល់នេះផ្ទាល់តែម្តង។
ជាងនេះទៀត ការរៀបចំព្រឹត្តិការណ៍ប្រកួតនាពេលនេះ គឺជាការអនុវត្តផែនការសកម្មភាព នៃផែនការយុទ្ធសាស្រ្តរបស់សហព័ន្ធ ក្នុងការត្រៀមខ្លួនចូលរួមប្រកួតព្រឹត្តិការណ៍អន្តរជាតិនានា ទាំងក្នុងប្រទេស និងជុំវិញពិភពលោក។
គួរបញ្ជាក់ថា ការប្រកួតកីឡាប្រដាល់ជើងឯកថ្នាក់ជាតិនេះ មានសមាគមកីឡាប្រដាល់គុនខ្មែរក្រសួង រាជធានី-ខេត្តចូលរួមសរុបចំនួន១៥ ដោយមានកីឡាករ ១០៦នាក់ និងកីឡាការិនី ៣៣នាក់ សរុប ១៣៩នាក់ ប្រកួតលើ ១៩វិញ្ញាសាក្រោមអាយុ១៨ឆ្នាំ ក្នុងនោះមានផ្នែកនារី ៨វិញ្ញាសា ដោយមានមេដាយ សរុបចំនួន ៧៦ គ្រឿង៕
រូបភាព ៖ ជីម ភារ៉ា
អត្ថបទ ៖ ជាវ ចន្ធូ
