បរទេស ៖ អ្នកជំនាញបានកោតសរសើរ ការរចនាដ៏ឆ្លាតវៃ ៤យ៉ាង របស់យន្តហោះកាណាដា ដែលជួបហេតុការណ៍ក្រឡាប់ផ្ងារជើង នៅឯអាកាសយានដ្ឋានអន្តរជាតិ Toronto Pearson នាពេលថ្មីៗនេះ តែ មនុស្សលើយន្តហោះ ទាំង៨០នាក់ នៅមានជីវិតទាំងអស់។

ទីភ្នាក់ងារព័ត៌មាន CNN បានចុះផ្សាយថា ដកស្រង់សម្តីរបស់ អ្នកជំនាញយន្តហោះ លោក Michael McCormick បានប្រាប់ថា នេះគឺជាការកែលម្អិតសុវត្ថិភាពយន្តហោះ ដែលមិនធ្លាប់មាន ក្នុងពេលជាច្រើនទសវត្សរ៍មកនេះ។

ចំណុចទីមួយ លោកសាស្ត្រារ្យ នៅសកលវិទ្យាល័យអាមេរិក Embry-Riddle Aeronautical រូបនេះ បានលើកឡើងថា «វាពិតជាអស្ចារ្យណាស់ ដែលមនុស្សអាចដើរចេញខ្នង យន្តហោះមកក្រៅ ដោយសុវត្ថិភាព ដោយលោកគិតថា នេះគឺជាការរចនាផ្នែកវិស្វកម្ម ចេញពីការសិក្សាស្រាវជ្រាវអាកាសចរណ៍ស៊ីវិល»។

ចំណុចទី២ លោកក៏បានលើកឡើងពី ធុងឥន្ធនៈរបស់យន្តហោះ ត្រូវបានទុក នៅក្នុងស្លាបយន្តហោះ
មិនមែន ដាក់ផ្ទាល់នៅក្រោមផ្នែកខាងក្រោមកន្លែងអ្នកដំណើរជិះនោះទេ។ ដូច្នេះ នៅពេលដែលយន្តហោះ Bombardier CRJ900 របស់ក្រុមហ៊ុន Delta មួយគ្រឿងនេះ ក្រឡាប់ និងរអិលចុះ ពីលើផ្លូវរត់ ស្លាបខាងស្តាំ ដែលផ្ទុកប្រេងរបស់យន្តហោះ បានដាច់ចេញពីតួយន្តហោះ មិនបង្កឲ្យគ្រោះមហន្តរាយ ដ៏ធំ។

ចំណុចមួយទៀត ពាក់ព័ន្ធនឹង កៅអី 16G ត្រូវបានរចនាឡើង សុវត្ថិភាព តែ មិនចាំបាច់ខ្លាំង លើផាសុកភាព នោះទេ។ លោក McCormick បាននិយាយថា យន្តហោះពាណិជ្ជកម្មទំនើប ភាគច្រើន តម្រូវឱ្យ មានកៅអី 16G ដែលមានន័យថា ពួកគេអាចទប់ទល់នឹងកម្លាំងទំនាញ ១៦ដង។ លោកថា កៅអីប្រភេទនេះ ត្រូវបានរចនាឡើង ផ្តោតលើភាពធន់ ជាជៀងដើម្បីអង្គុយឲ្យស្រួល ក្នុងករណីមានគ្រោះថ្នាក់ផ្សេងៗ។

ចំណុចទី៤ លោក Michael McCormick បានលើកឡើងពី រៀបចំបុគ្គលិកលើយន្តហោះដែលមានជំនាញសង្គ្រោះ។ទោះបីជាអ្នកដំណើររាប់សិបនាក់ត្រូវបានចងជាប់ នឹងកៅអីរបស់ពួកគេ ហើយដេកផ្អៀងចុះក្រោម ដូចសត្វប្រចៀវក៏ដោយ ក៏ក្រុមអ្នកបម្រើការលើយន្តហោះ អាចជម្លៀសបាន ក្នុងរយៈពេលតិចជាង ៩០ វិនាទី។ ក្នុងនោះ លោក McCormick ក៏បានលើកឡើង ពីអ្នកបម្រើលើយន្តហោះ ពីរនាក់ ដែលត្រូវបានចាត់ទុកថា ជាវីរជន ព្រោះបានបំពេញការងាររបស់ពួកគេ យ៉ាងល្អឥតខ្ចោះ ចូលរួមជម្លៀស ទាំងគ្មានបទពិសោធន៍ជួបហេតុការណ៍បែបនេះ ដែលបង្ហាញថា ពួកគេទទួលខុសត្រូវច្រើន ជាងគ្រាន់តែការប្រមូលសំរាម និង បម្រើសូដា នៅលើយន្តហោះ៕

ប្រភពពី CNN ប្រែសម្រួល៖ សារ៉ាត