រាជរដ្ឋាភិបាល បើកកម្មវិធីសប្តាហ៍គាំពារសង្គមកម្ពុជា ឆ្នាំ២០២៥ និងប្រកាសឱ្យអនុវត្ត ក្របខណ្ឌគោលនយោបាយជាតិគាំពារសង្គម ឆ្នាំ២០២៤-២០៣៥
(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជាអធិបតីដ៏ខ្ពង់ខ្ពស់ក្នុងពិធី “បើកសប្តាហ៍គាំពារសង្គមកម្ពុជា ឆ្នាំ ២០២៥ និង ប្រកាសដាក់ឱ្យអនុវត្តជាផ្លូវការក្របខណ្ឌគោលនយោបាយជាតិគាំពារសង្គម ឆ្នាំ ២០២៤-២០៣៥” នៅព្រឹកថ្ងៃទី២០ ខែកុម្ភៈ ឆ្នាំ២០២៥ នៅសណ្ឋាគាររ៉េស៊ីដង់សុខា ភ្នំពេញ។
សប្តាហ៍គាំពារសង្គមកម្ពុជា ឆ្នាំ ២០២៥ ដែលមានរយៈពេលពីរថ្ងៃនេះ ត្រូវបានរៀបចំឡើង ក្រោមមូលបទ អភិវឌ្ឍប្រព័ន្ធគាំពារសង្គមកម្ពុជា ដើម្បីការគ្របដណ្តប់កាន់តែប្រសើរ ទៅតាម ហានិភ័យនៃវដ្តជីវិត និង អមដោយការធ្វើបទបង្ហាញគន្លឹះ, កិច្ចពិភាក្សាពេញអង្គ, កិច្ចពិភាក្សា តាមក្រុម, និង ការប្រកួតតស៊ូមតិរបស់យុវជន លើប្រធានបទពាក់ព័ន្ធ ដោយមានការចូលរួមពី គណៈអធិបតី, ភ្ញៀវកិត្តិយស ជាថ្នាក់ដឹកនាំក្រសួង-ស្ថាប័នពាក់ព័ន្ធ, អភិបាលនៃគណៈអភិបាលរាជធានី-ខេត្ត ឯកអគ្គរាជទូត-ឯកអគ្គរដ្ឋទូត, តំណាងដៃគូអភិវឌ្ឍន៍ពាក់ព័ន្ធ, តំណាងស្ថាប័ន ស្រាវជ្រាវ, សិស្ស-និស្សិត និង អ្នកទទួលផលសរុបចំនួនប្រមាណ ១ ០០០ នាក់ ទាំងអ្នកចូលរួម ដោយផ្ទាល់នៅទីនេះ និង អ្នកចូលរួមតាមរយៈប្រព័ន្ធប្រជុំអនឡាញ ។
ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និង ហិរញ្ញវត្ថុ និង ជាប្រធានក្រុមប្រឹក្សាជាតិ គាំពារសង្គម បានថ្លែងថា “ចាប់តាំងពីឆ្នាំ ២០២២មក ក្រុមប្រឹក្សាជាតិគាំពារសង្គមបានរៀបចំសប្តាហ៍គាំពារសង្គមកម្ពុជា ជារៀងរាល់ឆ្នាំ ។សប្តាហ៍គាំពារសង្គម គឺជាវេទិកាមួយដែលផ្តល់ឱកាសដល់ភាគីពាក់ព័ន្ធ ដើម្បីពិភាក្សា និងផ្លាស់ប្ដូរទស្សនវិស័យ គោលនយោបាយ ចែករំលែកចំណេះដឹង បទពិសោធ និងឧត្តមានុវត្តន៍ នៃគោលនយោបាយគាំពារសង្គម ពីប្រទេសផ្សេងៗ ទាំងក្នុងតំបន់ និងលើសកលលោក ជាពិសេស ដើម្បីផ្សព្វផ្សាយពីវឌ្ឍនភាព នៃប្រព័ន្ធគាំពារសង្គមកម្ពុជាដល់អ្នកទទួលផល និង សាធារណជនឲ្យបានជ្រាបកាន់តែច្បាស់”។
ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និង ហិរញ្ញវត្ថុ និងជាប្រធានក្រុមប្រឹក្សាជាតិ គាំពារសង្គម បានថ្លែងបន្តថា “ចាប់តាំងពីឆ្នាំ ២០២២ ក្រុមប្រឹក្សាជាតិគាំពារសង្គមបានរៀបចំ សប្តាហ៍គាំពារសង្គមកម្ពុជាប្រចាំឆ្នាំ។ សប្តាហ៍គាំពារសង្គម ជាវេទិកាមួយដែលផ្ដល់ឱកាសដល់ភាគីពាក់ព័ន្ធ ដើម្បីពិភាក្សា និងផ្លាស់ប្តូរទស្សនវិស័យ, គោលនយោបាយ, ចែករំលែកចំណេះដឹង, បទពិសោធ, និងឧត្តមានុវត្តន៍នៃគោលនយោបាយគាំពារសង្គម ពីបណ្តាប្រទេសនានា ទាំងក្នុងតំបន់ និងសកល ជាពិសេស ដើម្បីផ្សព្វផ្សាយពីវឌ្ឍនភាពនៃប្រព័ន្ធគាំពារសង្គមកម្ពុជា ដល់សាធារណជន ឱ្យជ្រាបកាន់តែច្បាស់។ សម្រាប់ឆ្នាំ២០២៥នេះ, សប្តាហ៍គាំពារសង្គមកម្ពុជាត្រូវរៀបចំឡើងក្រោមមូលបទ “អភិវឌ្ឍប្រព័ន្ធគាំពារសង្គមកម្ពុជា ដើម្បីការគ្របដណ្តប់កាន់តែប្រសើរ ទៅតាមហានិភ័យនៃវដ្ដជីវិត” ។
“ក្របខណ្ឌគោលនយោបាយជាតិគាំពារសង្គមឆ្នាំ២០២៤-២០៣៥” ដែលប្រកាសដាក់ឱ្យអនុវត្តជាផ្លូវការក្នុងគោលបំណងធានានិរន្តរភាព នៃការអភិវឌ្ឍប្រព័ន្ធគាំពារសង្គមកម្ពុជា ដោយបន្តតម្រង់ទិស សម្រាប់រយៈពេល ១១ឆ្នាំ ទៅមុខ ដោយផ្តោតលើការកសាងភាពធន់ និងរក្សាភាពទន់ភ្លន់ដើម្បីឆ្លើយតបនឹងការប្រែប្រួលអាកាសធាតុ គ្រោះអាសន្ន និងវិបត្តិនានា ក៏ដូចជាការវិវឌ្ឍនៃកត្តាសេដ្ឋកិច្ច កត្តាសង្គម និងកត្តាប្រជាសាស្ត្រ ជាទូទៅ, សំដៅរួមចំណែកលើកកម្ពស់សុខុមាលភាពសង្គម និងកំណើនសេដ្ឋកិច្ចប្រកបដោយចីរភាព និងបរិយាបន្ន។
ក្របខណ្ឌគោលនយោបាយជាតិគាំពារសង្គមឆ្នាំ២០២៤-២០៣៥ កំណត់យក គោលការណ៍សំខាន់ៗចំនួន៧ សម្រាប់បន្តអភិវឌ្ឍប្រព័ន្ធគាំពារសង្គមទៅមុខបន្ថែមទៀតដែលមានដូចជា៖ ១). ការធានានូវ សមធម៌ និង បរិយាបន្ន ក្នុងប្រព័ន្ធគាំពារសង្គម, ២). ការគិតគូរពី ភាពគ្រប់គ្រាន់ និង ភាពសមរម្យនៃកញ្ចប់អត្ថប្រយោជន៍,៣). ការធានានូវភាពអាចទ្រទ្រង់បាននៃថវិកា និងចីរភាពហិរញ្ញវត្ថុ,៤). ការធានានូវ ស័ក្កិសិទ្ធភាព នៃការគ្រប់គ្រង និង ការចាត់ចែងកម្មវិធីជាតិជំនួយសង្គម និង របបសន្តិសុខសង្គម,៥). ការរក្សាបានភាពទន់ភ្លន់ ឆ្លើយតបនឹងការប្រែប្រួល និង ការ វិវដ្ដ របស់កត្តាខាងក្រៅ,៦). ការប្រកាន់ខ្ជាប់នូវអភិបាលកិច្ចល្អ ក្នុងប្រព័ន្ធគាំពារសង្គម, និង៧). ការឆ្លើយតបនឹងយេនឌ័រ ។
ជាមួយគ្នានេះ ដើម្បីធានាចីរភាពហិរញ្ញវត្ថុ និងនិរន្តរភាព នៃប្រព័ន្ធគាំពារសង្គមកម្ពុជា, រាជរដ្ឋាភិបាលកំណត់យក គោលការណ៍រួមនៃការរៀបចំប្រព័ន្ធគាំពារសង្គមរបស់ជាតិ ដែល ពលរដ្ឋគ្រប់រូប មានកាតព្វកិច្ចបង់ភាគទាន ដើម្បីទទួលបានការគាំពារ។ ប៉ុន្តែ រដ្ឋ រ៉ាប់រងលើការគាំទ្រក្រុមពលរដ្ឋក្រីក្រ, ងាយរងគ្រោះ, និងងាយរងហានិភ័យ ដែលមិនមាន ឬមានលទ្ធភាពតិចតួចបំផុត ដោយត្រូវគិតគូរឱ្យបានហ្មត់ចត់ លើភាពអាចទ្រទ្រង់បាននៃថវិកាជាតិ និង “យុទ្ធសាស្ត្រចាកចេញ” ពីភាពក្រីក្រ ៕
អត្ថបទ ៖ វណ្ណលុក
រូបភាព ៖ វ៉េង លីមហួត និង សួង ពិសិដ្ឋ
