នាយករដ្ឋមន្ដ្រី លើកទឹកចិត្តឱ្យពលរដ្ឋរាយការណ៍ បើគ្រូពេទ្យរូបណា មិនយកចិត្ដទុកដាក់ ពេលប្រើបណ្ណសមធម៌ ឬបណ្ណ ប.ស.ស.
(ភ្នំពេញ)៖ សម្ដេចនាយករដ្ឋមន្ដ្រី ហ៊ុន ម៉ាណែត សូមឱ្យប្រជាពលរដ្ឋ រាយការណ៍លើករណីគ្រូពេទ្យរូបណា មិនយកចិត្ដទុកដាក់ នៅពេលប្រើប្រាស់ បណ្ណសមធម៌ ឬបណ្ណប.ស.ស. ជាដើម ព្រោះគ្មានការរើសអើង លើការប្រើប្រាស់បណ្ណទាំងនេះទេ ។ សម្តេច ថា ក្រសួងសុខាភិបាល ត្រូវធានាចំពោះពលរដ្ឋគ្រប់រូប ទាំងពលរដ្ឋ ដែលប្រើប្រាស់បណ្ណសមធម៌ បណ្ណងាយរងហានិភ័យ ឬបណ្ណ ប.ស.ស ត្រូវទទួលបានទាន់ពេល នូវសេវាសុខាភិបាល ដើម្បីចៀសវាងការថ្នាំថ្នាក់ពីសំណាក់ប្រជាពលរដ្ឋ ដែលបានអនុវត្តគោលនយោបាយអាទិភាពចំពោះវិស័យសុខាភិបាលរបស់រាជរដ្ឋាភិបាល ។
សម្ដេចមហាបវរធិបតី បានថ្លែងដូច្នេះ ក្នុងពិធី “បើកសប្តាហ៍គាំពារសង្គមកម្ពុជា ឆ្នាំ២០២៥ និង ប្រកាសដាក់ឱ្យអនុវត្តជាផ្លូវការក្របខណ្ឌគោលនយោបាយជាតិគាំពារសង្គម ឆ្នាំ ២០២៤-២០៣៥” នៅព្រឹកថ្ងៃទី២០ ខែកុម្ភៈ ឆ្នាំ២០២៥ នៅសណ្ឋាគាររ៉េស៊ីដង់សុខាភ្នំពេញ ។
ពាក់ព័ន្ធនឹងវិស័យសុខាភិបាល សម្តេចបវរធិបតី បានគូសបញ្ជាក់ថា ត្រង់ចំណុចនេះ សូមលើកទឹកចិត្ត ដល់ប្រជាពលរដ្ឋ ត្រូវហ៊ានរាយការណ៍ ករណីគ្រូពេទ្យរូបណា ដែលមិនបានយកចិត្តទុកដាក់ ចំពោះខ្លួន ឬអ្នកប្រើប្រាស់បណ្ណសមធម៌ បណ្ណ ប.ស.ស ដើម្បីទទួលបានសេវាពិនិត្យ និងព្យាបាលជំងឺ។ ចំណុចនេះ សម្ដេច បានបញ្ជាក់យ៉ាងច្បាស់ទៅកាន់ ឯកឧត្តមរដ្ឋមន្ត្រីក្រសួងសុខាភិបាល និងឯកឧត្តមរដ្ឋមន្ត្រីក្រសួងការងារ ក៏ដូចជាឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ រួចហើយ ។
សម្តេចបវរធិបតី បានបន្ថែមថា តម្លៃកម្មវិធីគាំពារសង្គម មិនមែនស្ថិតនៅលើទិន្នន័យ ឬតម្លៃចំនួនថវិការយឺតយ៉ាវនេះទេ។ តម្លៃពិតប្រាកដ គឺប្រជាពលរដ្ឋ ដែលជាអ្នកទទួលបានផល និងជាអ្នកផ្តល់ឲ្យ អ៊ីចឹង ការគិតគូរពីគុណភាព សេវាព្យាបាល ជាការចាំបាច់ ទាំងថ្នាំ ទាំងឧបករណ៍ ទាំងកន្លែងព្យាបាលត្រូវមាន។ តម្លៃ មិនមែនត្រឹមកញ្ចប់ថវិកាទេ គឺនៅពេលប្រជាពលរដ្ឋ ទៅព្យាបាល ត្រូវទទួលបានសេវាទាន់ពេលវេលា មានការយកចិត្តទុកដាក់ ដែលចំណុចនេះ គឺត្រូវតែយកចិត្តទុកដាក់យ៉ាងសំខាន់ ។
ជាមួយគ្នានោះដែរ សម្តេចបវរធិបតី ក៏បានលើកឡើងដែរថា ចំពោះការផ្តល់បណ្ណសមធម៌ ត្រូវតែធ្វើឲ្យបានម៉ត់ចត់ មានតម្លាភាព ដោយកុំឲ្យមានករណីទៅព្យាបាលផង តែធ្វើបណ្ណសមធម៌ ដើម្បីទទួលបានលុយ គឺអត់មានទេ។ លើសពីនេះ ត្រូវតែអនុវត្តឲ្យតឹងរឹង ចំពោះអ្នក ដែលមិនបានអនុវត្តតាមគោលការណ៍ ឬអ្នកមានការគេងបន្លំតាមរូបភាពណាមួយ ។
សម្តេចបវរធិបតី បានសង្កត់ធ្ងន់ថា លុយសម្រាប់ជួយប្រជាពលរដ្ឋ ហើយសម្រាប់ត្រៀមបម្រុងជួយប្រជាពលរដ្ឋនៅពេលជួបការលំបាក ហើយបើសិនមូលដ្ឋាន ឬដៃគូរណាមិនអនុវត្ត គឺត្រូវចាត់វិធានការឲ្យតឹងរឹង តែម្តង។ យើងត្រូវទទួលស្គាល់ ១ដុល្លារ សម្រាប់មនុស្សម្នាក់ សម្រាប់ស្ត្រី ការបើកឲ្យចូលរួម នូវវិស័យឯកជន គឺជាកិច្ចការចាំបាច់ ។
សម្តេចបវរធិបតី បានបន្ថែមទៀតថា ត្រូវគ្រប់គ្រងថវិកា ត្រូវរៀបចំឲ្យចំគោលដៅ ហើយធានាឲ្យមានប្រសិទ្ធភាព មិនថា គ្រឹះស្ថានរដ្ឋ ឬគ្រឹះស្ថានឯកជន នោះទេ។ ដូច្នេះ សម្ដេច សូមអំពាវនាវដល់តួអង្គ ដែលពាក់ព័ន្ធទាំងអស់ ត្រូវប្រកាន់ភ្ជាប់ នូវក្រមសីលធម៌ តម្លាភាព និងការប្រព្រឹត្តិឲ្យបានត្រឹមត្រូវ ដើម្បីធ្វើយ៉ាងណាធានាការជួយដល់ប្រជាពលរដ្ឋរបស់យើង បានដោយចីរភាព ៕
អត្ថបទ ៖ វណ្ណលុក
រូបភាព ៖ វ៉េង លីមហួត និង សួង ពិសិដ្ឋ
