បរទេស៖ មេដឹកនាំប្រទេសអ៊ុយក្រែន លោក Zelensky បាននិយាយថា ពិភពលោកប្រឈមមុខនឹងជម្រើស ថាតើ «នៅជាមួយពូទីន» ឬ «នៅជាមួយសន្តិភាព»។

ប្រធានាធិបតី នៃប្រទេសអ៊ុយក្រែន លោក Volodymyr Zelensky និយាយថា ពិភពលោកប្រឈមមុខនឹងជម្រើស នៃការនៅជាមួយ លោក វ្ល៉ាឌីមៀ ពូទីន របស់រុស្ស៊ី ឬ រស់នៅដោយសន្តិភាព បន្ទាប់ពីលោក ដូណាល់ ត្រាំ ប្រធានាធិបតីអាមេរិក ហាក់បានផ្តល់ភាពកក់ក្តៅ ដល់ទីក្រុងមូស្គូ ដែលបានធ្វើឱ្យអឺរ៉ុប និងក្រុងគៀវ ភ្ញាក់ផ្អើល។

លោក Zelensky បាននិយាយ នៅក្នុងសុន្ទរកថាប្រចាំថ្ងៃ របស់លោកថា «អនាគត មិនមែនជាមួយ ពូទីន ទេ ប៉ុន្តែ ត្រូវមានសន្តិភាព..ហើយវាគឺជាជម្រើស សម្រាប់មនុស្សគ្រប់គ្នា នៅក្នុងពិភពលោក និង សម្រាប់អ្នកដែលមានអំណាច – ដើម្បីនៅជាមួយពូទីន ឬ ជាមួយសន្តិភាព។ យើងគួរតែជ្រើសរើសសន្តិភាព។ ខ្ញុំសូមអរគុណអ្នកគ្រប់គ្នា សម្រាប់ការគាំទ្រ»។

ការលើកឡើងបែបនេះ ក្រោយពេលដែលប្រមុខកាទូតអាមេរិកនិងរុស្ស៊ីបានជួបគ្នា នៅប្រទេសអារ៉ាប់ប៊ី សាអ៊ូឌីត ដោយគេជឿថា ជាការត្រៀមឲ្យមានជំនួបកំពូល រវាងលោកប្រធានាធិបតី Trump និង លោកប្រធានាធិបតីរុស្ស៊ី Putin នាចុងខែកុម្ភៈនេះ៕

ប្រភពពី AFP ប្រែសម្រួល៖ សារ៉ាត