លោកជំទាវ ហ៊ុន ម៉ាណា អញ្ជើញប្រគល់សមិទ្ធផលធំៗចំនួនបី និងផ្ដល់អាហារមួយពេលជូនដល់សិស្សនៃសាលាបឋមសិក្សាទួលចំប៉ី
កំពង់ចាម៖ លោកជំទាវ ហ៊ុន ម៉ាណា អគ្គនាយិការវិទ្យុ-ទូរទស្សន៍បាយ័ន និងក្រុមការងារកាលពីព្រឹកថ្ងៃទី២១ ខែកុម្ភៈ ឆ្នាំ២០២៥ បានអញ្ជើញចូលរួមក្នុងពិធីប្រគល់នូវសមិទ្ធផលធំៗចំនួនបីដែលជាអំណោយដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលទើបត្រូវបានសាងសង់រួចស្ថិតក្នុងសាលាបឋមសិក្សាទួលចំប៉ី ភូមិកោះរកាក្នុង ឃុំកោះរកា ស្រុកកំពង់សៀម ខេត្តកំពង់ចាម។
សមិទ្ធផលដែលប្រគល់ជូនសិស្ស និងសាលាបឋមសិក្សាទួលចំប៉ីរួមមាន អគារបណ្ណាល័យមួយខ្នងមានពីរបន្ទប់, អគារទីចាត់ការមួយខ្នងមានមួយបន្ទប់, បន្ទប់ទឹកមួយខ្នង មានបួនបន្ទប់ ព្រមទាំងលាបថ្នាំអគារសាលាចាស់ឱ្យស្អាតឡើងវិញ។
គប្បីជម្រាបជូនថា អគារសមិទ្ធផលថ្មីៗនេះ បានសាងសង់ឡើងបន្ទាប់ពីលោកជំទាវ ហ៊ុន ម៉ាណា ចុះមកប្រគល់អំណោយផ្ទះទេវតាជូនដល់ពលរដ្ឋនៅក្នុងភូមិនេះកាលពីខែមិថុនា ឆ្នាំ២០២៤កន្លងទៅ។ ពេលនោះលោកជំទាវបានចុះមកពិនិត្យមើលឃើញពីការខ្វះខាតអគារទីចាត់ការ អគារបណ្ណាល័យ និងអគារបន្ទប់ទឹកនៅទីនេះ ទើបលោកជំទាវសម្រេចរៀបចំសាងសង់ជូនដល់សិស្សានុសិស្សនៅទីនេះតែម្តង៊
ក្នុងឱកាសនេះលោកជំទាវ ហ៊ុន ម៉ាណា បាននាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន, សម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ដែលជានិច្ចកាលលោកតែងគិតគូរពីសុខទុក្ខដល់ពលរដ្ឋ និងក្មួយៗសិស្សានុសិស្សគ្រប់ទីកន្លែង និងគ្រប់ពេលវេលា។
ក្នុងឱកាសនេះដែរ លោកជំទាវក៏បានរៀបចំនូវអាហារមួយពេលសម្រាប់ក្មួយៗសិស្សានុសិស្ស១០០នាក់ដែលកំពុងសិក្សានៅសាលានេះនិងចែកជូននូវកាតា ដែលមានជាសម្ភារៈសិក្សា សំលៀកបំពាក់ និងរបស់របរប្រើប្រាស់ជាច្រើន៕
ដោយ៖លីពៅ
